រំជួលចិត្ត! ឪពុកម្ដាយខាំស្មៅឲ្យគេមើលតាមផ្លូវ ដើម្បីរកប្រាក់ព្យាបាលជំងឺកូន

2017-11-09 02:20:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្ដីប្រពន្ធជនជាតិចិនមួយគូ បានប្រើប្រាស់វិធីចុងក្រោយ ដើម្បីរកប្រាក់ព្យាបាលកូនប្រុសដេកឈឺលើគ្រែ ដោយខំខាំស្មៅតាមចិញ្ចើមផ្លូវឲ្យគេមើល។

ឪពុកម្ដាយទាំងពីរបានអះអាងថា ពួកគេអស់លទ្ធភាពក្នុងការរកប្រាក់ចំណាយលើការព្យាបាលកូនហើយដែលកើតជំងឺមហារីកឈាម។ ពួកគេបានលុតជង្គង់អង្វរមហាជនឲ្យជួយកូនគាត់ផង ហើយពួកគាត់នឹងខាំស្មៅហូបឲ្យមើលវិញ។

អ្នកស្រី Weiling ជាម្ដាយប្រាប់ថា ខ្លួន និងប្ដីមិនមានទេពកោសល្យពិសេសអ្វីទេ ហើយវិធីខាំស្មៅនេះជាជម្រើសចុងក្រោយ ដើម្បីស្វែងរកសាធារណជនឲ្យជួយ។ គាត់បន្តថា គាត់បានខ្ចីប្រាក់គេគ្រប់កន្លែងអស់ហើយ ថែមទាំងលក់របស់របរមានតម្លៃអស់ដែរ ហើយគិតថា មិនអាចរកប្រាក់ទូទាត់ថ្លៃព្យាបាលបានទេ។

ចំណែកកូនប្រុសរូបនេះ ធ្លាប់ប្រាប់ឪពុកម្ដាយឲ្យឈប់ព្យាបាលខ្លួន និងបង្កើតកូនមួយទៀត បន្ទាប់ពីឃើញពួកគាត់លំបាកខ្លាំង។ រឿងរ៉ាវគ្រួសារក្រីក្រនេះ បានធ្វើឲ្យអ្នកប្រើប្រាស់អ៊ីនធឺណិតចិនអាណិតអាសូរជាខ្លាំង បន្ទាប់ពីឃើញវីដេអូពួកគេខាំស្មៅនៅថ្ងៃទី ៥វិច្ឆិកា ក្នុងទីក្រុង Sanhe ខេត្តហេបេ ភាគខាងជើងប្រទេសចិន។

ប្ដីប្រពន្ធដដែលប្រាប់ថា ពួកគាត់រស់នៅភូមិដាច់ស្រយាលមួយនៅខេត្តហ៊ូណាន។ កូនប្រុសនេះបានវះកាត់ប្ដូរខួរឆ្អឹងខ្នង តែសួតរបស់គេបែរជាឆ្លងជំងឺ។ ឪពុកអាយុ ៣៤ឆ្នាំ ឈ្មោះ Nengyong ធ្លាប់ជាកម្មករសំណង់ ប៉ុន្តែបានបាត់បង់ការងារដោយសារសុខភាពទ្រុឌទ្រោម។ តាមសម្ដីម្ដាយ មកទល់ពេលនេះ ជំងឺកូនប្រុសគាត់បានចំណាយប្រាក់ជិត ៨០ម៉ឺនយ័ន ឬប្រមាណ ១២ម៉ឺនដុល្លារហើយ៕