កម្មវិធី​ទូរ​ទស្សន៍បែប​ជីវិត​ពិតថ្មី​មួយ​ អាច​ធ្វើ​ឱ្យ​អ្នក​ទស្សនា​ស្រក់​ទឹក​ភ្នែក​ដោយ​មិន​ដឹង​ខ្លួន​

  • 2017-11-12 02:20:22
  • ចំនួនមតិ

ចន្លោះមិនឃើញ

កម្មវិធី​ទូរ​ទស្សន៍​ដែល​ផលិត​ដោយ​ផលិត​ករ​វ័យ​ក្មេង​របស់​កម្ពុជា​៣រូប​ នឹង​ធ្វើ​ឱ្យ​អ្នក​ទស្សនា​រំជើប​រំជួល​ចិត្ត​ ព្រោះ​វា​ជា​កម្មវិធី​ជីវិត​ពិត​ និង​ជា​សាច់រឿង​លើក​ទឹក​ចិត្ត​ដល់​យុវវ័យ​ដែល​សម្រេច​ក្តី​សុបិនរបស់​ខ្លួន​។

លោក​ ឈួង​ យីវ​ឆូវ​ ផលិត​ករ​ម្នាក់​តំណាង​ឱ្យ​ក្រុម​ផលិត​ បាន​រៀប​រាប់​ថា​ ៖ «យើង​ដឹង​ហើយ​ថា​មនុស្ស​យើង​ម្នាក់​ៗ​មាន​ក្តី​ស្រម៉ៃ ហើយ​មាន​មនុស្ស​ជា​ច្រើន​ព្យាយាម​ស្វែង​រក​អ្វី​ដែល​គេ​ស្រម៉ៃនោះ​ ពេល​ខ្លះ​ក៏​សម្រេច​បាន​ ពេល​ខ្លះ​ក៏​មិន​សម្រេច​បាន​ ដូច​នេះ​ពួក​គេ​ត្រូវ​ធ្វើ​បែប​ណា​ដើម្បី​ដោះ​ស្រាយ​បញ្ហា​ទាំង​នោះ​»។

ផលិតករទាំងបីរូប

ផលិត​ករ​រូប​នេះ​បន្ត​ទៀត​ថា​ នេះ​ជា​កម្ម​វិធី​ បែប​ជីវិត​ពិត​ ហើយ​យើង​ចង់​បង្ហាញ​ពី​បំណងប្រថ្នារបស់​យុវ​វ័យ​របស់​យើង​ ដើម្បី​ជំរុញ​លើក​ទឹកចិត្ត​ដល់​យុវ័យ​ដទៃ​ទៀត​។ ក្នុង​រដូវ​កាល​ទីមួយ​នេះ​ កម្ម​វិធី​ទូរទស្សន៍​បែប​ថ្មី ​បែប​យុវ​វ័យ​ និង​បែប​រសជាតិ​ជីវិត​ពិត​ ដែល​មាន​ឈ្មោះ​ថា​ «ស្ថា​នីយ​ក្តី​ស្រម៉ៃ» ក៏​ជា​ផ្នែក​មួយ​នៃ​កម្មវិធី​ក្លាហាន​៩​ នឹង​ចាប់​ផ្តើម​ចាក់​បញ្ចាំង​ជា​ផ្លូវ​ការ​លើ​ស្ថានីយ​ទូរ​ទស្សន៍ CTN នៅ​សប្តាហ៍ទី​៣ ខែ​វិច្ឆិកា​ ឆ្នាំ​ ២០១៧​នេះ​។

កម្មវិធី​នេះ​នឹង​បង្ហាញ​សាច់​រឿង​ពិត​របស់​យុវវ័យ​ ចំនួន១៥​រឿង​ផ្សេងៗ​ពី​គ្នា​ជុំ​វិញ​កម្ពុជា​ ដែល​ក្នុង​មួយ​សាច់​រឿង​មាន​រយៈ​ពេល​ប្រហែល​ ៤៥​នាទី​។ ក្នុង​នោះ​ទស្ស​និក​ជន​នឹងបាន​រៀន​សូត្រ​ កម្សាន្ត​ ជា​មួយ​សាច់​រឿង​ពិត​ៗ​របស់​យុវវ័យ​ម្នាក់ៗ​ដែល​ហ៊ាន​លះបង់​ទាំង​ការ​សិក្សា​ និង​ហ៊ាន​ពលី​អ្វីៗ​គ្រប់​យ៉ាង​ដើម្បីតែ​សម្រេច​ក្តី​ស្រម៉ៃរបស់​ខ្លួន​។

សាច់​រឿង​នីមួយៗ​របស់​កម្មវិធីថ្មីនេះត្រូវ​ប្រើ​រយៈ​ពេល​ថត​រាប់​ខែ ​ព្រោះ​ជា​សាច់​រឿង​នៃ​ជីវិត​ពិត​ ផលិត​ករ និង​ក្រុម​ការងារ​បាន​ព្យា​យាម​ស្វែង​រក​យុវ​វ័យ​ដែល​មាន​ភាព​លេច​ធ្លោ​ ហើយ​មាន​ភាព​ខុស​ប្លែក​ និង​មាន​គំនិត​ ឬ​គោល​ដៅ​ក្នុង​ជីវិត​ ដើម្បី​សម្រេច​បាន​នូវ​ក្តី​ស្រម៉ៃរបស់​ខ្លួន​ពី​បណ្តាខេត្ត​នានា​។

លោក​ ឈួង យីវឆូវ

បើ​តាម​ផលិត​ករវ័យ​ក្មេង​លោក​ ឈួង យីវឆូវ រំពឹង​ថា​សារ​អប់​រំ​នៃ​សាច់​រឿង​បែប​ជីវិត​ពិត​នេះ ​នឹង​បាន​ទៅ​ដល់​យុវ​ជន​ផ្សេង​ទៀត​នៅ​ទូទាំង​ប្រទេស​ ហើយ​ពិសេស​យុវ​វ័យ​ដែល​មិន​មាន​ឱកាស​បាន​ស្វែង​យល់​ដឹង​ពី​អ្វីដែលគួរធ្វើ ស្គាល់ពីខ្លួនឯង ត្រូវបានជំរុញលើកទឹកចិត្ត ឱ្យ​បាន​ទស្សនា​តាម​កញ្ចក់​ទូរទស្សន៍​ ហើយ​សាច់​រឿង​នេះ​នឹង​ក្លាយ​ជា​ការ​បង្ហាញ​ផ្លូវ​ជូន​ដល់​ពួកគេ​ ដើម្បី​ហ៊ាន​សម្រេច​ក្តី​ស្រម៉ៃរបស់​ខ្លួន​។

កម្មវិធីសម្ពោធ កម្មវិធីទូរទស្សន៍បែបជីវិតពិត «ស្ថានីយក្តីស្រម៉ៃ»

ចុចអាន៖

-៣ ចំណុច ផលិត​ភាព​យន្តឲ្យជោគជ័យ​របស់​ផលិតករ​ជប៉ុន​

-Sweet កប់​ហ្មង! អេដា បង្ហាញ​មុខ​គូ​ស្នេហ៍​ក្នុង​វីដេអូ​ចម្រៀង​ថ្មី​របស់​ខ្លួន​(វីដេអូ)


អត្ថបទ៖ Sunny