ប៉ូលិសថៃចាត់បើកយុទ្ធនាការទ្រង់ទ្រាយធំ ត្រួតពិនិត្យជនបរទេសហួសកំណត់ទិដ្ឋាការ
- 2017-11-14 07:29:08
- ចំនួនមតិ 0 | ចំនួនចែករំលែក 0
ប៉ូលិសថៃចាត់បើកយុទ្ធនាការទ្រង់ទ្រាយធំ ត្រួតពិនិត្យជនបរទេសហួសកំណត់ទិដ្ឋាការ
ចន្លោះមិនឃើញ
ឧបនាយកមន្ត្រីថៃ លោក Prawit Wongsuwan បានជួបជាមួយយោធានិងភ្នាក់ងារសន្តិសុខជាតិដើម្បីចាត់វិធានស៊ើបអង្កេតជនបរទេសដែលស្នាក់នៅហួសកំណត់ទិដ្ឋាការដើម្បីដេញចេញពីប្រទេស ដោយរកឃើញថាជនបរទេសទាំងនោះអាចជាប់ពាក់ព័ន្ធជាមួយបទឧក្រិដ្ឋផ្សេងៗ ឬក៏អាចរត់គេចពីការតាមចាប់ខ្លួននៅក្នុងប្រទេសរបស់ពួកគេ។
តាមរបាយការណ៍របស់ The Nation បានបង្ហាញថា មានជនបរទេសប្រមាណជាជាង ១០ម៊ឺននាក់ដែលកំពុងរស់នៅក្នុងប្រទេសថៃដោយហួសកំណត់ទិដ្ឋាការ។ ជនបរទេសទាំងនោះអាចនឹងជាប់ពាក់ព័ន្ធបទល្មើសផ្សេងៗដូចជា ការជួញដូរមនុស្ស អាវុធ ថ្នាំញៀន ការក្លែងបន្លំពេជ្រ ពេស្យាចារ ល្បែងស៊ីសង និងការបោកប្រាស់តាមទូរសព្ទនិងអ៊ីនធឺណិតជាដើម។
ការស៊ើបអង្កេតនេះបានចាប់ផ្ដើមឡើងក្នុងខេត្តភូកេត ដោយប៉ូលិសកំពុងតាមចាប់ខ្លួនជនបរទេសចំនួន ១៤២នាក់ដែលត្រូវបានរកឃើញថាពួកគេបានសូកប៉ាន់ប៉ូលិសក្នុងតំបន់ចំនួនទឹកប្រាក់ ៣លានដុល្លារក្នុងមួយខែជាថ្នូរនឹងការស្នាក់នៅដោយហួសទិដ្ឋាការ។
របាយការណ៍របស់ Bangkok Post បានឲ្យដឹងថា មេបញ្ជាការរងម្នាក់និងអនុប្រធានអគ្គស្នងការនគរបាលម្នាក់ត្រូវបានផ្ទេរចេញពីខេត្តភូកេតក្រោមការសង្ស័យថាជាប់ពាក់ព័ន្ធអំពើពុករលួយ។ លើសពីនេះទៅទៀតប៉ូលិសមួយចំនួននៅក្នុងខេត្តក៏ត្រូវបានបញ្ឈប់ពីតួនាទី ចំណែកឯប៉ូលិស១៥នាក់ផ្សេងទៀតកំពុងស្ថិតក្រោមការស៊ើបអង្កេត។
ទោះបីជាប៉ូលិសទើបតែបើកការស៊ើបអង្កេតពីបញ្ហានេះក៏ដោយ ខេត្ត ២ផ្សេងទៀតដូចជា ខេត្តឈុនបុរី និងខេត្តឈៀងម៉ៃក៏នឹងត្រូវបានស៊ើបអង្កេតផងដែរ ដោយសារតែខេត្តទាំងពីរនេះសម្បូរទៅដោយជនបរទេសរស់នៅ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
