បើធ្វើ៥យ៉ាងនេះបាន មនុស្សធ្លាប់មើលងាយយើង ដឹងតែចាញ់ហើយខ្មាសងើបមុខមិនរួច

2017-11-15 03:18:55
ចំនួនមតិ 0 | ចំនួនចែករំលែក 0

ចន្លោះមិនឃើញ

កើតមកជាមនុស្សម្នាក់ទោះបីតាំងចិត្តធ្វើជាព្រះ ក៏គង់តែមានមារតាមចងពារ ទោះខំធ្វើល្អយ៉ាងណាក៏ជៀសមិនផុត ពីប្រភេទមនុស្សខ្វះលក្ខណៈសម្បត្តិ ជាមនុស្សមានគុណធម៌ សីលធម៌ក្នុងការរស់នៅ។ ក្នុងចំណោមមនុស្សមានសន្ដានមិនល្អជាច្រើនប្រភេទ ក្នុងនោះក៏មានប្រភេទមនុស្សចូលចិត្តមើលងាយគេដែរ។ បើជួបមនុស្សបែបនោះក្នុងជីវិត តើគួរធ្វើដូចម្ដេច ទើបអាចយកឈ្នះបាន? សូមមកដកស្រង់បទពិសោធន៍ល្អៗដូចខាងក្រោមនេះ៖

១. មិនតបតនៅតែញញឹម តែមិនមែនមានន័យថាល្ងង់ទេ

«កុំព្យាយាមតបតទៅមនុស្សបន្ទាបតម្លៃយើង ធ្លាប់មើលងាយយើង មិនបាច់ខឹងក្រោធ កុំយកចិត្តទុកដាក់ស្ដាប់ពាក្យសម្ដីមិនបានប្រយោជន៍ទាំងនោះ ព្រោះថាបើមនុស្សនោះ ជាអ្នកមានចំណេះដឹង សីលធម៌ក្នុងខ្លួនគេនឹងមិនធ្វើទង្វើបែបនេះទេ។» ដូច្នេះកាយវិការដ៏ល្អ និងសក្ដិសមបំផុត គឺការញញឹមដាក់វិញ ធ្វើចរិតធម្មតាហាក់ដូចមិនមានរឿងអ្វី ដើម្បីកុំឲ្យគេគិតថា យើងខ្វល់នឹងសម្ដីរបស់គេ។ ប៉ុន្តែក៏ត្រូវកត់ចំណាំទុក ចំពោះមនុស្សប្រភេទនោះ កុំយកខ្លួនបៀត និងត្រូវប្រុងប្រយ័ត្នជានិច្ច។ នេះបើតាមបទពិសោធន៍របស់ លោក វណ្ណដេត បុគ្គលិកក្នុងធនាគារឯកជនមួយ។

២. ខំប្រឹងធ្វើការ រកស៊ីមិនដាក់ដៃ

វណ្ណដេត បន្តមួយចំណុចទៀតថា បើពិតជាឈឺចាប់នឹងការមើលងាយពីនរណាម្នាក់ គឺត្រូវកែប្រែពីការឈឺចាប់នោះ ងាកមកតាំងជំហរ ហើយខិតខំប្រឹងប្រែងរកស៊ី ធ្វើការកុំទម្លាក់ដៃឲ្យសោះ។ ប្រសិនបើយើងកាន់តែទន់ជ្រាយ អ្នកទាំងនោះកាន់តែមើលងាយយើងថែមទៀត។ ដូច្នេះមិនចាំបាច់ខ្វល់ត្រូវចាត់ទុកថា គ្រាន់តែជាពាក្យសម្ដីរសាត់តាមខ្យល់ហើយមកប៉ះនឹងត្រចៀកយើងប៉ុណ្ណោះ វាគ្មានតម្លៃអ្វីត្រូវឲ្យយើងឈឺចាប់ទេ។

៣. ចេះស្រឡាញ់គ្នាក្នុងគ្រួសាររវាងឪពុកម្ដាយបងប្អូន

ដោយឡែក បើតាមបទពិសោធន៍ជីវិតរបស់ លោក ជី ដានិត ធ្លាប់តស៊ូពីគ្រួសារក្រខ្សត់ រហូតក្លាយជាមន្រ្តីរាជការមួយរូបលើកឡើងថា បើអ្នកដទៃកំពុងមើលងាយគ្រួសារអ្នក ហើយអ្នកបែរជាឈ្លោះប្រកែកក្នុងគ្រួសារ បែកបាក់សាមគ្គី បងដោយបង ប្អូនដោយប្អូន នោះមនុស្សទាំងនោះកាន់តែជាន់អ្នកថែមទៀត។ ដូចនេះត្រូវចេះស្រឡាញ់គ្នា រួមសាមគ្គីគ្នា ដើម្បីបង្ហាញថា គ្រួសារអ្នកកំពុងមានសុភមង្គលបំផុត បើទោះជាមិនមានទ្រព្យសម្បត្តិច្រើនដូចគេ ហើយក៏មិនបានឈឺចាប់នឹងការមើលងាយរបស់អ្នកណាដែរ។

៤. កាន់តែរៀបឥរិយាបថឲ្យថ្លៃថ្នូរ ឲ្យខ្ពង់ខ្ពស់សក្ដិសមជាអ្នកលំដាប់ខ្ពស់

លោក ជី ដានិត ដដែលបន្ថែមថា អ្នកដែលចូលចិត្តមើលងាយអ្នកដទៃ តែងគិតថាខ្លួនឯងអស្ចារ្យ គ្មានអ្នកណាស្មើ គឺមានន័យថា គេជាមនុស្សដែលមានតម្លៃទាបទៅហើយ ដូច្នេះបើយើងយកខ្លួនទៅបៀត ឫតបតទៅវិញ មានន័យថា យើងក៏បន្ទាបខ្លួនយើងដែរ។ ជម្រើសល្អបំផុត ត្រូវធ្វើខ្លួនឲ្យឆ្ងាយ ធ្វើខ្លួនឲ្យថ្លៃថ្នូរ ឲ្យសក្ដិសមនឹងចំណេះវិជ្ជាដែលយើងមាន នោះទើបជាមនុស្សខ្ពង់ខ្ពស់ពិតប្រាកដ។

៥. សម្រេចជោគជ័យក្នុងជីវិត និងបង្ហាញឲ្យអ្នកធ្លាប់មាក់ងាយភ្លឺភ្នែក

លទ្ធផលដែលយើងទទួលបានបន្ទាប់ពីការខិតខំប្រឹងប្រែងធ្វើការ រកស៊ី មិនទន់ខ្សោយ កែប្រែពីការមើលងាយអ្នកដទៃ គឺយើងនឹងទទួលបានជោគជ័យក្នុងជីវិត ស្របទៅនឹងការតាំងចិត្ត និងគោលដៅ។ ជោគជ័យដែលទទួលបាននេះ មិនគ្រាន់តែក្នុងរឿងការងារ រឿងរកស៊ីប៉ុណ្ណោះទេ តែជាជោគជ័យដ៏ធំមួយនោះ គឺការឈ្នះចិត្តមនុស្សដោយសន្តិភាព ដោយស្ងប់សុខ មិនបានឈឺចាប់ មិនបានតបតដោយហិង្សា មិនបានធ្វើអ្វីឲ្យមានវិប្បដិសារីក្នុងជីវិត៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ