បើលេងចរិត ៥យ៉ាងនេះនៅកន្លែងធ្វើការដឹងតែគ្មានអ្នកចង់រាប់រកទេ
- 2017-09-04 03:13:41
- ចំនួនមតិ 0 | ចំនួនចែករំលែក 0
បើលេងចរិត ៥យ៉ាងនេះនៅកន្លែងធ្វើការដឹងតែគ្មានអ្នកចង់រាប់រកទេ
ចន្លោះមិនឃើញ
ការរៀបចំឥរិយាបថឱ្យមានរបៀបរៀបរយ ថ្លៃថ្នូរ ដើម្បីឱ្យអ្នកដទៃគោរពស្រឡាញ់ចូលចិត្ត គឺជារឿងសំខាន់បំផុត នៅកន្លែងការងារ។ តែបើនិយាយពីចរិត ដែលធ្វើឱ្យមិត្តរួមការងារមិនចូលចិត្ត និងមិនឱ្យតម្លៃ មានចំណុចអ្វីខ្លះទៅ? ខាងក្រោមនេះជាទស្សនយល់ឃើញ ពីអ្នកធ្វើការមួយចំនួន លើកឡើងជុំវិញបញ្ហានេះ៖
១. ដូចមានតែឯងនៅកន្លែងការងារ
ចំណុចនេះសំដៅដល់មនុស្ស ធ្វើចរិតប្រុសស្អាត ស្រីស្អាតនៅកន្លែងការងារ ឫអាចនិយាយបានទៀតថា មនុស្សមានអំនួតជ្រុល ដើរហួសមកហួសមិនរាក់ទាក់ជាមួយមិត្តរួមការងារ។ ប្រសិនបើអ្នកធ្វើការប្រកាន់ចរិតបែបនេះ ប្រាកដជាគ្មានអ្នកណាសូវចូលចិត្តឡើយ។ ដូច្នេះបើអាចកែបាន គួរតែកែទៅ ដើម្បីមិត្តភាពនៅកន្លែងធ្វើការ ហើយម្យ៉ាងទៀតការលេងចរិតបែបនេះគ្មានបានប្រយោជន៍អ្វីក្រៅពីគ្មានញាតិរាប់រកនោះទេ។ នេះបើតាមការលើកឡើងរបស់ លោក ណារ័ត្ន បុគ្គលិកក្នុងក្រុមហ៊ុនឯកជនមួយ។
២. គេនិយាយអីក៏ដឹងគ្រប់រឿង
ណារ័ត្នដដែលបន្ថែមមួយចំណុចទៀតថា មនុស្សខ្លះតែងតាំងខ្លួនធ្វើចេះគ្រប់រឿង ទោះគេនិយាយអ្វីក៏ដឹងគ្រប់រឿង ឫអាចនិយាយថា មនុស្សពូកែអួត ដើម្បីឱ្យអ្នករួមការងារគិតថា ខ្លួនជាមនុស្សពូកែ។ ប្រសិនបើជាអ្នកចេះពិតប្រាកដមែន គ្រប់គ្នានឹងបានដឹងតាមរយៈសមត្ថភាពការងារហើយ មិនចាំបាច់អួតអាងនោះទេ ព្រោះមានតែអ្នកមិនចេះ តាំងខ្លួនធ្វើចេះនេះហើយ ដែលមានចរិតលក្ខណៈបែបនេះ។
៣. និយាយពីចំណុចខ្សោយក្រុមការងារទៅកាន់មេកើយ
ដោយឡែកចំណុចនេះវិញ សំដៅថា មិត្តរួមការងារប្រៀបដូចជាកីឡាករអុំទូក លុះត្រាតែរួមសហការគ្នាល្អ ទើបឈ្នះគូប្រកួត មិនខុសអីពីការធ្វើការជាក្រុម ត្រូវចេះសហការគ្នា និងជួយដោះស្រាយគ្នា។ ប៉ុន្តែមនុស្សខ្លះ ដើម្បីយកមុខមាត់ សុខចិត្តនិយាយពីចំណុចខ្សោយរបស់អ្នកដទៃប្រាប់មេកើយ ហើយព្យាយាមនិយាយពីចំណុចល្អរបស់ខ្លួន។ រឿងការងារល្អ មិនល្អថ្នាក់ដឹកនាំប្រាកដជាដឹងហើយ មិនចាំបាច់ទៅរៀបរាប់នោះទេ ព្រោះថ្នាក់ដឹកនាំអាចវាយតម្លៃបានថា យើងជាមនុស្សបែបណា។ នេះបើតាមការលើកឡើងរបស់ កញ្ញា ធារី ជាអ្នកធ្វើការក្នុងក្រុមហ៊ុនឯកជនមួយ។
៤. យកចិត្តយកថ្លើមមេកើយ
ធារី បន្តមួយចំណុចទៀតថា មនុស្សមួយចំនួនដើម្បីមុខមាត់ ដើម្បីឆាប់ឡើងដំណែង គឺតែងប្រើវិធីសាស្ត្រវាយអែបស៊ីអប យកចិត្តគ្រប់សព្វបែបយ៉ាងទាំងអស់។ ចំណុចនេះ គឺមានន័យថា ដើរខ្សែលើ មិត្តរួមការងារហើយ ព្រោះគ្រប់គ្នាសុទ្ធតែប្រើសមត្ថភាពពិតប្រាកដ មិនចេះធ្វើចរិតបែបនេះ ចំណែកខ្លួនវិញសមត្ថភាពការងារមិនសូវពូកែប៉ុន្មាន តែរឿងយកចិត្តមេវិញ លេខ១តែម្ដង។
៥. ឱ្យតែខ្លួនបានសុខអ្នកណាយ៉ាងម៉េចមិនខ្វល់
នៅក្នុងរង្វង់ការងារតែងជៀសមិនផុតពីកំហុសឆ្គង និងបញ្ហាប្រឈមនានា ហើយក្នុងនាមអ្នកមិត្តរួមការងារត្រូវរួមគ្នា ដើម្បីដោះស្រាយ។ ប៉ុន្តែមនុស្សប្រភេទនេះវិញ ពេលមានបញ្ហាយករួចខ្លួនតែឯង ទម្លាក់កំហុសលើអ្នកនេះ លើអ្នកនោះ ទោះដឹងហើយថា ការងារនោះមិនមែនជាលក្ខណៈបុគ្គលទេ គឺជាការងាររួម។ ចរិតបែបនេះ ទោះធ្វើការនៅកន្លែងណាក៏គ្មានអ្នកណាចូលចិត្តដែរ ហើយនៅទីបំផុតក្លាយជាមនុស្សដ៏ឯកា មិនសូវមានអ្នកចង់រាប់រកទេ៕
ចុចអាន៖
ជាអ្នកធ្វើការ ត្រូវគិតទម្លាប់អាក្រក់ ៥យ៉ាង ធ្វើឲ្យខ្លួនមិនរីកចម្រើន
ទម្លាប់អាក្រក់ ៦យ៉ាងរបស់បុគ្គលិក អាចឱ្យក្រុមហ៊ុនបញ្ឈប់ការងារមិនស្រណោះ
៥ជំហាន ដើម្បីមានការងារប្រាក់ខែខ្ទង់ពាន់ដុល្លារ ទាំងវ័យក្មេង
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
