ជាអ្នកធ្វើការ ត្រូវគិតទម្លាប់អាក្រក់ ៥យ៉ាង ធ្វើឲ្យខ្លួនមិនរីកចម្រើន

2017-08-04 03:01:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បុគ្គលិកល្អមិនមែនមានត្រឹមសមត្ថភាពទេ ប៉ុន្តែត្រូវចេះបត់បែនតាមកាលៈទេសៈ បូករួមនឹងភាពឆ្លាតវៃគ្រប់ពេលវេលា ព្រមទាំងដឹងថាអ្វីគួរធ្វើ អ្វីមិនគួរធ្វើ។ ពេលខ្លះអ្នកមិនដឹងឡើយថា ទម្លាប់ដែលធ្វើរាល់ថ្ងៃនៅកន្លែងការងារ បែរជាអាចជះឥទ្ធិពលអាក្រក់ដល់ខ្លួនឯង។

បើមានទម្លាប់ទាំង៥ ដូចខាងក្រោម គួរបញ្ឈប់ដាច់ខាត៖

១. ស្ងៀមស្ងាត់គ្មានមតិ

ស្ងៀមស្ងាត់មិនអាចធ្វើឲ្យមានការផ្លាស់ប្ដូរឡើយ ដូចនេះហើយត្រូវបញ្ចេញមតិឲ្យបានច្រើននៅកន្លែងធ្វើការ។ បុគ្គលិកមួយចំនួនគិតថាមតិរបស់ខ្លួនគ្មានប្រសិទ្ធភាព ទើបមិននិយាយអ្វីចេញមក ប៉ុន្តែអ្នកជំនាញបានបញ្ជាក់ថា មនុស្សតែងមានការផ្លាស់ប្ដូរគ្រប់ពេលវេលា។ ការបញ្ចេញមតិច្រើន មិនត្រឹមតែមានប្រយោជន៍ចំពោះកន្លែងការងារប៉ុណ្ណោះទេ ប៉ុន្តែវាក៏អាចបង្ហាញពីសមត្ថភាពរបស់អ្នកផងដែរ។

២. ក្ដោបការងារច្រើនមុខ

ប្រសិនបើអ្នកកំពុងព្យាយាមសម្រេចការងារច្រើនក្នុងពេលតែមួយ គួរបញ្ឈប់ជាបន្ទាន់ ព្រោះវាមិនអាចសម្រេចបានលទ្ធផលគាប់ប្រសើរឡើយ។ តាមការសិក្សារបស់សាកលវិទ្យាល័យ Stanford University បានបង្ហាញថាគុណភាពនឹងធ្លាក់ចុះ បើអ្នកប្រឹងប្រែងក្ដោបការងារច្រើនក្នុងពេលតែមួយ។

៣. លាតត្រដាងរឿងផ្ទាល់ខ្លួនច្រើនហួសកម្រិត

រៀបរាប់រឿងរ៉ាវផ្ទាល់ខ្លួនប្រាប់បុគ្គលិករួមការងារ ឬមេកើយច្រើនពេក អាចធ្វើឲ្យប៉ះពាល់ដល់ទំនាក់ទំនង។ ប្រសិនបើគ្មានអ្នកយល់ចិត្តច្បាស់ទេ រឿងរ៉ាវរាប់សែន រាប់លាន គួរលាក់ទុកជាលក្ខណៈឯកជន ជាជាងលាតត្រដាងប្រាប់អ្នករួមការងារ។

៤. មាត់ចាបមាត់ព្រាប

ចូលចិត្តនិយាយដើមក្រោយខ្នង មិនមែនជារឿងល្អឡើយសម្រាប់ក្រុមហ៊ុន ឬអ្នកធ្វើការ ទោះបីក្នុងគោលបំណងបែបណាក៏ដោយ។ មិនដឹងរឿងច្បាស់ បែរជានិយាយបន្តខុសការពិត ឬពេលខ្លះទៀតលើកចំណុចមិនល្អ វាយប្រហារគេក្រោយខ្នង សុទ្ធតែគួរបញ្ឈប់ដាច់ខាត។ ម្យ៉ាងវិញទៀត ការនិយាយរឿងអត់ប្រយោជន៍ច្រើន នាំឲ្យខាតពេលវេលា និងធ្វើឲ្យទំនាក់ទំនងឆាប់ប្រេះឆា។

៥. នាំអារម្មណ៍មិនល្អចូលកន្លែងធ្វើការ

តាមការសិក្សាស្រាវជ្រាវជាច្រើនបានបង្ហាញថា អារម្មណ៍មិនល្អអាចឆ្លងរាលដាលពីមនុស្សម្នាក់ទៅម្នាក់ផ្សេងទៀត។ មានន័យថាបើអ្នកចូលធ្វើការដោយទឹកមុខសោកសៅ វាអាចប៉ះពាល់ដល់អារម្មណ៍អ្នកផ្សេងទៀតបានយ៉ាងឆាប់រហ័ស។ ចំណែកការបង្ហោះរឿងរ៉ាវមិនសប្បាយចិត្តចូលក្នុងបណ្ដាញសង្គមពេលកំពុងធ្វើការ ក៏អាចប៉ះពាល់ដល់អ្នកដទៃឃើញហើយមិនសប្បាយចិត្តដែរ៕