“ភូមិគ្រឹះ១០០ល្បិច" គាស់កកាយសម្លៀកបំពាក់សម័យលង្វែក

2017-11-15 05:13:02
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះទូរទស្សន៍ប៉ុស្តិ៍លេខ៥បានធ្វើពិធីក្រុងពាលីខ្សែភាពយន្តភាគថ្មីរឿង "ភូមិគ្រឹះ១០០ល្បិច" នៅសណ្ឋាគារសូហ្វីតែលភ្នំពេញ ដោយតួអង្គក្នុងរឿងតម្រូវឲ្យស្លៀកសម្លៀកបំពាក់ប្រពៃណីនាសម័យលង្វែក។

ចំពោះការស្លៀកសម្លៀកបំពាក់ក្នុងសម័យកាលខាងលើនេះដែរ លោក ស៊ិន សុផាត ប្រធានគណៈកម្មការត្រួតពិនិត្យកម្មវិធីផ្សាយទូរទស្សន៍ប៉ុស្តិ៍លេខ៥ បានមានប្រសាសន៍ថា ដោយសារតែសាច់រឿងទាំងមូលបានបង្ហាញទិដ្ឋភាពទាំងស្រុង នាសម័យកាលលង្វែក ។ដូច្នេះតួសម្ដែងទាំងអស់ត្រូវស្លៀកសម្លៀកបំពាក់ និងការតុបតែងខ្លួនឲ្យសមស្របទៅតាមសម័យកាលហ្នឹងតែម្ដង។

លោកថា ក្រោយរឿង "ភូមិគ្រឹះ១០០ល្បិច" នេះដាក់បញ្ចាំងនៅលើកញ្ចក់ទូរទស្សន៍ កូនខ្មែរមួយចំនួន នឹងបានដឹងហើយស្គាល់ម៉ូដសម្លៀកបំពាក់ក្នុងសម័យកាលលង្វែក ជាក់ជាពុំខាន់ ថាតើ់ក្នុងសម័យហ្នឹងប្រជាពលរដ្ឋក៏ដូចជាត្រកូលអភិជនស្លៀកពាក់បែបណា។

ក្រៅពីបង្ហាញម៉ូដសម្លៀកបំពាក់សម័យលង្វែក រឿង "ភូមិគ្រឹះ១០០ល្បិច" ជាប្រភេទរឿងបែបល្បិចកលឈ្នានីសគ្នាទៅវិញទៅមក ដើម្បីដណ្ដើមបុរសដែលខ្លួនស្រលាញ់ រិះរកគ្រប់មធ្យោបាយទាំងអស់មិនខ្វល់ពីអ្នកណាម្នាក់ឡើយ។ រឿងនេះមានជាង ៣០ភាគ គ្រោងនឹងចេញថតនៅថ្ងៃស្អែក។ ចំណែកឯទីតាំងថតនៅតាមខេត្តក្បែរទីក្រុងភ្នំពេញ។

“ភូមិគ្រឹះ១០០ល្បិច" ចូលរួមសម្ដែងដោយ លោក សាយ សៀរ៉ា កញ្ញា ឆុំ វត្តី លី ឌីណា លីម មួយហ្គិច ព្រមទាំងតារាសម្ដែងប្រុសស្រីជាច្រើនរូបផ្សេងទៀត៕