Autumn Allen កំពុងសំងំនៅសៀមរាប ត្រៀមចេញបទចម្រៀងថ្មីលក្ខណៈអន្តរជាតិ

2017-11-16 03:19:16
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតី Autumn Allen បានត្រឡប់មករស់នៅកម្ពុជាវិញហើយតាំងពីប៉ុន្មាន៣ខែមុន ហើយក៏ជ្រើសរើសរស់នៅខេត្តសៀមរាប ជិតបង្កើយនឹងប្រាសាទអង្គរ។ Autumn Allen បានប្រាប់ Sabay ថា៖ «ខ្ញុំធ្លាប់ទៅលេងសៀមរាបពីរ បីដងកាលមុន តែក្រោយពីត្រឡប់មកវិញ ខ្ញុំក៏សម្រេចរស់នៅសៀមរាបតែម្តង ព្រោះវាមានសភាពស្ងប់ស្ងាត់ គួរឱ្យចង់រស់នៅជាងទីក្រុង»។

ខណៈរស់នៅក្នុងខេត្តសៀមរាប Autumn Allen ក៏នៅតែបន្តការងារសិល្បៈ ចម្រៀងរបស់ខ្លួនជាបន្តទៀតដែរ លើសពីនេះនាងក៏កំពុងត្រៀមខ្លួនសម្តែងលើឆាកក្នុងកម្មវិធីសិល្បៈជាច្រើនជាបន្តបន្ទាប់ និងថ្មីៗក៏បានលេចមុខថតបង្ហាញម៉ូដអាពាហ៍ពិពាហ៍ ដែលបង្កើតការភ្ញាក់ផ្អើរយ៉ាងខ្លាំងដល់អ្នកគាំទ្ររបស់នាង!

រូបភាពថតបង្ហាញម៉ូដសម្លៀកបំពាក់មង្គលការ

ក្រៅពីនោះយុវតី ឆោមស្រស់ រូបនេះក៏បានប្រាប់ Sabay ដោយផ្ទាល់ថា ៖ «ខ្ញុំក៏កំពុងត្រៀមថតវិឌីអូបទចម្រៀងថ្មីរបស់ខ្ញុំ និងត្រៀមច្រៀងបទចម្រៀងថ្មីមួយទៀត»។ តែនាងសូមរក្សាសិទ្ធមិនបញ្ចេញចំណងជើង ឬព័ត៌មានពិស្តារពីបទថ្មីនោះឡើយ ព្រោះវាជាកុងត្រាជាមួយក្រុមហ៊ុនអន្តរជាតិ ហើយ Autumn Allen សង្ឃឹមថា អ្នកគាំទ្ររូបនាង នឹងរង់ចាំតាមដានការងារថ្មីៗរបស់នាងជាបន្តទៀត។

រូបភាពផ្តល់ឱ្យដោយ Autumn Allen

បន្ថែមពីនេះ យុវតី កូនកាត់ខ្មែរអាមេរិចកាំងរូបនេះ បានលើកឡើងថា ខ្លួននឹងប្រឡូកការងារសិល្បៈថ្មីៗទៀតដូចជាការបង្ហាញម៉ូដ និងចូលរួមសម្តែងក្នុងខ្សែភាពយន្តខ្នាតធំផងដែរ។ Autumn Allen បន្តថា៖ «បន្ចុប្បន្នខ្ញូំក៏កំពុងរៀននៅផ្ទះជាមួយគ្រូបង្រៀនឯកជន ដូចនេះខ្ញុំអាចមានពេលសម្រាប់ការសម្តែង និងរីករាយជាមួយការងារសិល្បៈថ្មីៗ។»

គួររំលឹកផងដែរថា Autumn Allen ជាកុមារី កូនកាត់ខ្មែរអាមេរិចកាំងម្នាក់ ដែលមានទេពកោសល្យ និងមានសមត្ថភាពជាច្រើន តែនាងតែងតែពង្រីកទេពកោសល្យសិល្បៈរបស់ខ្លួន ក្រៅពីពូកែច្រៀង ក៏កំពុងក៏រៀនគូររូបគំនូរ និងហាត់លេងតន្ត្រីជាដើម។