ការចង់ឲ្យស្បែកសកាន់តែលឿន គ្រោះថ្នាក់កម្រិតធ្ងន់ធ្ងរក៏កាន់ខ្លាំង
- 2017-11-17 07:54:07
- ចំនួនមតិ 0 | ចំនួនចែករំលែក 0
ការចង់ឲ្យស្បែកសកាន់តែលឿន គ្រោះថ្នាក់កម្រិតធ្ងន់ធ្ងរក៏កាន់ខ្លាំង
ចន្លោះមិនឃើញ
បច្ចុប្បន្ននេះមានមនុស្សមួយចំនួនបានរងនូវផលប៉ះពាល់ទាំងធ្ងន់ ទាំងស្រាលដោយសារការលាបផលិតផលខុសនឹងប្រភេទស្បែកដែលអ្នកខ្លះក៏អាច មានគ្រោះថ្នាក់ដល់ជីវិតក៏មានដែរ។
តាមគ្រូពេទ្យឯកទេសជំនាញរោគសើស្បែកបានបញ្ជាក់ប្រាប់បណ្ដាសារព័ត៌មានឲ្យដឹងថា ឡេលាយ ផ្សំឡើងពីសារជាតិអាស៊ីតខ្លាំង និងវត្ថុធាតុគីមីមួយចំនួនដែលនឹងនាំឲ្យស្បែកឆាប់សតែស្បែកនោះនឹងខូចទៅវិញ ហើយនឹងប៉ះពាល់ដល់សុខភាពយ៉ាងធ្ងន់ធ្ងរនាពេលខាងមុខ។ឡេលាយលាបស្បែកអាចធ្វើឲ្យស្បែករបស់អ្នកឡើងកន្ទួលក្រហម រមាស់ រលាក ហើយប្រសិនបើស្បែករបស់អ្នកឆាប់មានប្រតិកម្ម អ្នកនឹងអាចរងផលប៉ះពាល់ធ្ងន់ធ្ងរជាងនេះ។
អ្នកជំនាញបានបន្តថា សារធាតុ ដែលមាននៅក្នុងឡេលាយបង្កឱ្យមានបញ្ហាប្រតិកម្មលើស្បែក ដូចជាបណ្ដាលឱ្យកើតជារមាស់កន្ទួល ឬខូចស្បែក។ អ្នកខ្លះមានបញ្ហារមាស់ដល់ថ្នាក់អេះចេញឈាម និងឡើងកន្ទួលធំៗ ដែលឡេលាយអាចជ្រាបចូលដល់កោសិកាខាងក្នុង ប៉ះទង្គិចដល់សុខភាពស្បែកនិងសុខភាពរាងកាយ។ ដូច្នេះ អ្នកគួរប្រើផលិតផលដែលមានគុណភាពល្អ និងចុះបញ្ជីការត្រឹមត្រូវទទួលស្គាល់ដោយក្រសួងសុខាភិបាល ។
កន្លងទៅធ្លាប់មានស្ត្រីមួយចំនួន បានរងគ្រោះខូចស្បែកដោយសារការលាបឡេលាយឲ្យស្បែកស និងការដែលប្រើប្រាស់ផលិតផល ដែលមិនមានប្រភពច្បាស់លាស់និងច្បាប់អនុញ្ញាត្រឹមត្រូវនេះ។ រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង ស្នើឲ្យប្រជាពលរដ្ឋមានការប្រុងប្រយ័ត្នខ្ពស់ និងចៀសវាងការប្រើឡេលាយលាបស្បែក ដោយថា «មិនដែលណាទៅលាបឡេភ្លាម សភ្លាម មើលតែដាក់ទឹកក្តៅកោសជ្រូកចឹង យូរៗទៅខ្ទេចខ្ទីអស់ហើយ។ សបានមួយភ្លែតហ្នឹង អាស៊ីត ហើយដាក់វត្ថុសម្រាប់ធ្វើឲ្យស្បែកស មួយភ្លែតទៅវាពុល ធ្វើឲ្យរលាកស្បែកថ្ងៃក្រោយទៅ»។
បច្ចុប្បន្នក្រសួងកំពុងបន្តយុទ្ធនាការបង្ក្រាបជារៀងរាល់ថ្ងៃចំពោះចរាចរណ៍ឡេលាយសម្រាប់លាបស្បែកឲ្យស និងរៀបចំប្រព័ន្ធចុះបញ្ជីការតាមអនឡាញដើម្បីកំណត់ពីប្រភពនាំចូលឡេលាបស្បែកត្រឹមត្រូវផងដែរ។ ដូចនេះ សម្រាប់មិត្តៗនារីដែលចង់ប្រើប្រាស់ឡេដើម្បីជួយដល់សុខភាពស្បែក សូមជ្រើសរើសផលិតផលដែលមានស្លាកសញ្ញា ឈ្មោះផលិតផល និងប្រភពផលិតច្បាស់លាស់ ព្រមទាំងមានការទទួលពិនិត្យសារធាតុផ្សំត្រឹមត្រូវពីក្រសួងសុខភិបាលដើម្បីចៀសផុតពីបញ្ហាទាំងឡាយដូចដែលអ្នកជំនាញបានលើកឡើង៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
