ម្ដាយ​មើល​កូន​មិន​ស្គាល់​ ក្រោយ​ពេល​កែ​សម្ផស្ស​រួច

  • 2017-11-20 14:00:41
  • ចំនួនមតិ

ចន្លោះមិនឃើញ

បុរស​ជា​កម្មករ​រោងចក្រ​វ័យ ២២​ឆ្នាំ​មួយ​ បាន​ធ្វើ​ឲ្យ​ម្ដាយ​ខ្លួន​ភ្ញាក់​ផ្អើល​យ៉ាង​ខ្លាំង​ជាមួយ​នឹង​ភិនភាគ​មុខ​ថ្មី​របស់​ខ្លួន​ក្រោយ​កែ​សម្ផស្ស​រួច។

បុរស​នោះ​មាន​ឈ្មោះ Noppajit Monlin កាល​ពី​មិន​ទាន់​កែ​កុន​មុខ មាន​ថ្គាម​វៀច​ ពី​កំណើត ដែល​ស្ថានភាព​នេះ​បាន​ធ្វើ​ឲ្យ​រូប​គេ​ពិបាក​ក្នុង​ការ​ទំពា​អាហារ​យ៉ាង​ខ្លាំង។ ជាមួយ​នឹង​ភាព​មិន​ប្រក្រតី​បែប​នេះ ធ្វើ​ឲ្យ Noppajit ​ចូល​ចិត្ត​នៅ​ឆ្ងាយ​ពី​មិត្ត​រួម​ការងារ​ជាមួយ​ខ្លួន និង​តែង​តែ​ទទួល​ទាន​បាយ​ថ្ងៃ​ត្រង់​តែ​ម្នាក់​ឯង ពេល​ម៉ោង​សម្រាក​ធ្វើ​ការ។

ប៉ុន្តែ​ភិន​ភាគ​មុខ​បែប​នេះ​ត្រូវ​បាន​ផ្លាស់​ប្ដូរ​ទាំង​ស្រុង ពេល​ដែល Noppajit បាន​ចូល​រួម​ក្នុង​កម្មវិធី​ទូរទស្សន៍​របស់​ថៃ​មួយ​ឈ្មោះ​ថា Let Me In Thailand ហើយ​បុរស​រូប​នេះ​ត្រូវ​បាន​ជ្រើស​រើស​ឲ្យ​ទៅ​ធ្វើ​ការ​កែ​សម្ផស្ស​នៅ​ប្រទេស​កូរ៉េ​ខាង​ត្បូង។ នៅ​ទី​នោះ Noppajit បាន​ធ្វើ​ការ​វះ​កាត់​ឆ្អឹង​ថ្គាម ថ្ងាស និង​ភ្នែក។ ក្នុង​ដំណើរ​ការ​វះ​កាត់​សម្ផស្ស​នោះ​ ក៏​មាន​ការ​ចាក់​ថ្នាំ​កុំ​ឲ្យ​មាន​ការ​ហៀរ​ទឹក​មាត់​ជ្រុល ក៏​ដូច​ជា​មាន​ការ​ព្យាបាល និង​ថែ​ទាំ​ស្បែក​ផង​ដែរ​ដើម្បី​បំបាត់​ស្នាម​អុជ​ខ្មៅ​ដែល​មាន​លើ​មុខ​របស់​បុរស​ថៃ​រូប​នេះ។

៣​ ខែ​ក្រោយ​មក បន្ទាប់​ពី​ជា​សះ​ស្បើយ​ពី​ការ​វះ​កាត់​នេះ Noppajit បាន​មក​ជួប​ម្ដាយ​របស់​ខ្លួន​វិញ​នៅ​ក្នុង​អាហារដ្ឋាន​មួយ​កន្លែង។ បើ​ទោះ​ជា​អង្គុយ​តុ​ជិត​គ្នា​ក៏​ដោយ ស្ត្រី​ជា​ម្ដាយ​មិន​បាន​ចំណាំ​កូន​របស់​ខ្លួន​ឡើយ។ ក្រោយ​មក​ទើប Noppajit បាន​ងើប​ពី​តុ​ខ្លួន រួច​ដើរ​សំដៅ​ទៅ​តុ​ដែល​ម្ដាយ​របស់​ខ្លួន​កំពុង​អង្គុយ ដើម្បី​ប្រាប់​អំពី​រឿង​ហេតុ។ ក្រោយ​ដឹង​ថា​ជា​កូន​ខ្លួន ស្ត្រី​ជា​ម្ដាយ​យំ​យ៉ាង​ខ្លាំង ដោយ​ម្យ៉ាង​នឹក​កូន​ផង ព្រោះ​មិន​បាន​ជួប​គ្នា​ជា​ច្រើន​ខែ​កន្លង​មក​ហើយ និង​ម្យ៉ាង​ទៀត​ស្ទើរ​តែ​មិន​ជឿ​ថា​ កូន​ខ្លួន​ប្រែ​ប្រួល​ភិន​ភាគ​បែប​នេះ។

ក្រោយ​ពី​កែ​សម្ផស្ស Noppajit បាន​និយាយ​ថា​ខ្លួន​មាន​អារម្មណ៍​ល្អ​ជាង​មុន ដោយ​សង្គម​ទទួល​ស្គាល់​ខ្លួន​ច្រើន​ជាង​កាល​ពី​ពេល​មុន​ ហើយ​ឥឡូវ​ខ្លួន​ក៏​មាន​មិត្ត​ភក្ដិ​ច្រើន​ដែរ៕


ប្រភព៖ Coconut ប្រែ​សម្រួល៖ ហ៊ីម រស្មី