យុវតី កឹម ស្រីកែវ ត្រៀមបង្ហាញស្នាដៃគំនូរដ៏អស្ចារ្យលើឆាកអន្តរជាតិ(វីដេអូ)

2017-11-21 03:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីរូបស្រស់ កឹម ស្រីកែវ ដែលជាគ្រងតំណែងជាបវរកញ្ញាកម្ពុជាចំណាត់ថ្នាក់លេខ៣ និងកំពុងមានបេសកកម្មចេញទៅប្រកួតក្នុងកម្មវិធី Miss Tourism International 2017 ប្រាប់ថានាងបានត្រៀមទេពកោសល្យពិសេសមួយទៅបង្ហាញនៅកម្មវិធីប្រកួតនេះ។

សម្រាប់កម្មវិធីនេះ ស្រីស្អាតវ័យ២០ឆ្នាំប្រាប់ថា នាងត្រៀមយកទេពកោសល្យពិសេសមួយគឺ ការគូរគំនូរដែលប្រើរយៈពេលខ្លី ពោលគឺត្រឹម២ ទៅ៥នាទីប៉ុណ្ណោះ។ ដោយសុំលាក់ពីប្រភេទគំនូរ ស្រីកែវ និយាយថា៖ "អត់ទាន់អាចប្រាប់បានទេបង គ្រាន់តែចង់បង្ហើបថា គំនូរហ្នឹង គឺជាគំនូរម្យ៉ាងដែលបង្ហាញពីភាពអស្ចារ្យរបស់ប្រទេសកម្ពុជា"។

កញ្ញា បន្តថា ដោយសារកម្មវិធីខាងលើ ពាក់ព័ន្ធយ៉ាងស៊ីជម្រៅលើវិស័យទេសចរណ៍ ដូច្នេះរូបនាងមិនភ្លេចឡើយក្នុងការនាំយកតំបន់ទេសចរណ៍ខ្មែរ ទៅបង្ហាញ និងប្រាប់ដល់អន្តរជាតិ ពិសេសតំបន់វប្បធម៌នៅ ខេត្តសៀម និងតំបន់មាត់សមុទ្រ នៅខេត្តព្រះសីហនុ ។

ជានិស្សិតសិក្សាផ្នែកស្ថាបត្យកម្ម យុវតីរូបស្រស់បញ្ជាក់ថា វាហាក់ដូចជាលឿនបន្តិចមែន សម្រាប់នាង ក្នុងការចេញទៅប្រកួតក្នុងកម្មវិធីលំដាប់អន្តរជាតិដ៏ធំបែបនេះ តែទោះជាយ៉ាងណានាងបានហ្វឹកហាត់លើវិញ្ញាសាជាច្រើនហើយក្នុងរយៈពេលមុនចេញប្រកួត។

កម្មវិធី Miss Tourism International 2017 គឺជាព្រឹត្តិការណ៍មួយដែលកំពុងដំណើរការ និងត្រៀមប្រកាសលទ្ធផលនៅថ្ងៃទី ៦ ខែធ្នូ នៅទីក្រុងកូឡាឡាំពួរ ប្រទេសម៉ាឡេស៊ី៕

អត្ថបទ៖ សុខណា