រឿងទាំង ៦យ៉ាង អ្នកត្រូវប្រយ័ត្ន ក្រោយសម្រាលកូនដោយការវះកាត់

2017-11-21 05:02:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបង្កើតកូនដោយវះកាត់ជាដំណើរការដ៏សំខាន់មួយ ដែលរាងកាយរបស់អ្នកងាយនឹងឆ្លងជំងឺផ្សេងៗបំផុត ដោយសារការអស់កម្លាំងក្រោយពីការផ្ដល់កំណើតរួច។

ផលប៉ះពាល់នៃការសម្រាលកូនដោយវះកាត់ត្រូវបានស្គាល់ច្រើនរួចមកហើយ បើទោះបីជាអ្នកត្រូវបានណែនាំឲ្យសម្រាកឲ្យបានត្រឹមត្រូវ ដើម្បីឲ្យស្នាមរបួសជាសះស្បើយក៏ដោយ អ្នកត្រូវដឹងពីសញ្ញាសំគាល់មួយចំនួនដែលត្រូវប្រយ័ត្នផងដែរ។

ខាងក្រោមនេះគឺជារឿងទាំង ៦យ៉ាងដែលអ្នកត្រូវប្រយ័ត្នក្រោយពេលសម្រាលកូនដោយការវះកាត់ ៖

១. ឡើងកម្ដៅក្នុងខ្លួនខ្លាំង

ការកើតជំងឺគ្រុនក្ដៅ គឺជារឿងធម្មតាបន្ទាប់ពីឆ្លងកាត់ដំណាក់កាលវះកាត់និងសម្រាលកូន ប៉ុន្តែប្រសិនបើកម្ដៅក្នុងខ្លួនអ្នកកើនឡើងលើសពី ៤០អង្សា អ្នកគួរតែពិគ្រោះជាមួយគ្រូពេទ្យព្រោះថាខ្លួនប្រាណរបស់អ្នកអាចនឹងឆ្លងជំងឺផ្សេងៗ។

២. មានក្លិនមិនល្អ

ប្រសិនបើមានការឆ្លងមេរោគផ្សិតឬរលាកស្បែក តំបន់នៃការវះកាត់អាចមានក្លិនមិនល្អ។ អ្នកត្រូវទុកវាឲ្យស្ងួត និងធ្វើឲ្យមានខ្យល់ចេញចូល។ មនុស្សជាច្រើនបានផ្ដល់ដំបូន្មានឲ្យប្រើម៉ាស៊ីនផ្លុំសម្ងួតនៅសីតុណ្ហភាពទាប បន្ទាប់ពីងូតទឹក ដើម្បីកុំឲ្យសើមកន្លែងវះកាត់ ប៉ុន្តែប្រសិនបើវានៅតែមានក្លិនទៀត អ្នកគួរតែណាត់ជួបគ្រូពេទ្យជាបន្ទាន់។

៣. ជំងឺគ្រុនផ្ដាសាយ

ប្រសិនបើអ្នកមានអាការទាក់ទងនឹងជំងឺគ្រុនផ្ដាសាយ ដូចជា ក្អក រងា វិលមុខ គ្រុនញាក់ ឈឺបំពង់ក និងអស់កម្លាំងខ្លាំង អ្នកគួរតែទៅពិនិត្យសុខភាពជាបន្ទាន់ ព្រោះវាអាចជារោគសញ្ញានៃការឆ្លងមេរោគ ហើយកូនរបស់អ្នកក៏អាចឆ្លងមេរោគផងដែរ។

៤. មុខរបួសក្ដៅឧណ្ហៗ

ក្រោយការវះកាត់ ស្នាមអុចក្រហមនឹងមាននៅលើមុខរបួស ប៉ុន្តែរោគសញ្ញានេះនឹងបាត់ទៅវិញក្នុងរយៈពេលពីរទៅបីថ្ងៃ។ ក្នុងករណីដែលអ្នករកឃើញថា តំបន់នៃការវះកាត់នៅតែមានភាពក្ដៅឧណ្ហៗនៅពេលដែលយកដៃប៉ះ ហើយវានៅតែមានស្នាមពណ៌ក្រហមដដែល វាអាចបង្ហាញពីការឆ្លងមេរោគដែលត្រូវការព្យាបាលភ្លាមៗ។

៥. មានខ្ទុះនៅមុខរបួស

ប្រសិនបើមានខ្ទុះមួយចំនួនហូរចេញពីមុខរបួស វាត្រូវបានគេចាត់ទុកថាជារឿងធម្មតា។ ប៉ុន្តែប្រសិនបើអ្នកមានអារម្មណ៍ថា មានខ្ទុះច្រើនជាងធម្មតា ហើយខ្ទុះប្រែជាពណ៌លឿង ឬបៃតងខុសធម្មតានិងឈឺចាប់ខ្លាំង វាមានន័យថា អ្នកបានឆ្លងមេរោគហើយ ដូច្នេះអ្នកត្រូវតែប្រញាប់ទៅជួបគ្រូពេទ្យ។

៦. ការហើមនិងការរលាក

ប្រសិនបើអ្នកមានអារម្មណ៍ថាហើម និងឈឺចាប់នៅតំបន់មុខរបួស កាន់តែខ្លាំង វាអាចជាការឆ្លងមេរោគ។ ជួនកាល ជើង ភ្លៅ និងកជើង ក៏រលាកដែរ។ អ្នកគួរតែទៅជួបជាមួយគ្រូពេទ្យឲ្យបានទាន់ពេលវេលា៕

ចុចអាន៖

ប្រភព៖ momjunction ប្រែសម្រួល៖ សុភារ័ត្ន