អប្បិយជំនឿ លើដើមឈើធំៗក្នុងសង្គមខ្មែរ ហាក់សាបរលាប

2017-11-24 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែសម័យកាលប្រែប្រួលពីមួយជំនាន់ទៅមួយជំនាន់នោះ អប្បិយជំនឿខ្លះដែលមនុស្សខ្មែរជំនាន់ដើមប្រកាន់ខ្ជាប់នោះ បានចាប់ផ្តើមសាមរលាបបន្តិចម្តងក្នុងសង្គមខ្មែរបច្ចុបន្ន។ ទាក់ទងនឹងជំនឿបុរាណ ដើមឈើធំមួយចំនួនដូចជាស្នូល ដើមអំពិល អំពិលទឹកបារាំង ដើមពោធិនិងដើមជ្រៃក្រឹម ជាដើមត្រូវគេជឿថាជាប្រភេទឈើដែលមានខ្មោចព្រាយបិសាចរស់នៅ។

ទោះយ៉ាងណាជំនឿនេះមិនបានស្ថិតក្នុងដួងចិត្តពលរដ្ឋខ្មែរច្រើនដូចមុននោះទេ។ អ្នកស្រី ម៉ម សុខុម វ័យ៦០ឆ្នាំ រស់នៅក្នុងឃុំេរវៀង ស្រុកសំរោង ខេត្តតាកែវ លើកឡើងថាតាមជំនឿបុរាណដើមឈើធំៗមិនអាចទុកឲ្យនៅក្នុងភូមិលំនៅដ្ឋាន ឬក្បែរផ្ទះបានទេ ដោយអ្នកស្រីអះអាងថាតាមជំនឿ គេជឿថាជាជម្រករបស់ខ្មោចព្រាយបិសាច។

ដើមជ្រៃក្រឹម ក្នុងបរិវេណវត្តអារាម

អ្នកស្រីបន្ថែមថាៈ «អានេះបើតាមជំនឿពីចាស់បុរាណមក ដើមឈើធំៗគាត់អត់ឱ្យទុកក្បែរផ្ទះទេ ដូចជាដើមស្នួល ដើមអំពិល ដើមធ្លកអីហ្នឹង។ ចាស់ៗគាត់ថាដើមអស់ហ្នឹងវាសំបូរអាពពួកខ្មោចព្រាយបិសាចអីនៅ ដូចថាវាត្រូវធាតុគ្នាចឹងហា ចឹងហើយគាត់អត់ឱ្យទុកក្បែរផ្ទះទេ»។

( ដើមអំពិល ក្នុងសាលារៀនមួយកន្លែង

ទោះយ៉ាងណា អ្នកស្រីថា ជំនឿនេះមិនសូវមានឥទ្ធិពលលើមនុស្សសម័យបច្ចុប្បន្ននោះទេ ដោយថាមនុស្សសម័យនេះមិនសូវជៀលើរឿងទាំងនេះ។ អ្នកស្រីបន្តថាៈ « ប្រជាជនខ្លះគេនៅតែជឿលើជំនឿអស់ហ្នឹង ខ្លះទៀតគេលែងសូវជឿហើយ ...ដូចជាដើមអំពិលទឹកបារាំង(ចន្ទន៍គីរី) ក៏ធ្លាប់ត្រូវបានចាស់បុរាណហាមប្រាមដែរ ប៉ុន្តែបច្ចុប្បន្នឃើញមានប្រជាពលរដ្ឋដាំដុះនៅខាងមុខផ្ទះជាហូរហែរ»។

ចំណែកអ្នករស់នៅឃុំរវៀងម្នាក់ទៀតគឺ អ្នកស្រី កាន់ ម៉េង វ័យ៧០ឆ្នាំដែលមានដើមអំពិលទឹកបារាំងដុះនៅខាងមុខផ្ទះមានប្រសាសន៍ថាអ្នកស្រីមិនសូវជឿលើអប្បិយជំនឿទាំងនេះនោះទេ។ អ្នកស្រីបន្ថែមថាៈ «អ្នកខ្លះគេធ្លាប់ឭដូនតាគេប្រាប់កុំឱ្យដាំក៏មិនហ៊ានដាំទៅ ប៉ុន្តែឥឡូវគេដាំជាទូទៅ ដូចមិនឃើញមានហេតុភេទអ្វីនោះទេ»៕

អត្ថបទដោយៈ សូទ្រី