ជួបអ្នកដឹកនាំវ័យក្មេងចូលចិត្តផលិតរឿងបែប Sci-fi ម្តងមើល៍ ប្រាក់ចំណូលឡើងកប់

2017-11-24 00:54:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងប្រភេទភាពយន្តជាច្រើន ឬគេហៅថា Genre យើងកម្រឃើញផលិតករខ្មែរណាផលិតរឿងបែប Sci-fi នោះទេតែ Sabay បានជួបជាមួយផលិតករ និងអ្នកដឹងនាំរឿងវ័យក្មេងរបស់កម្ពុជាម្នាក់ ឈ្មោះថា ហេង លីម ដែលមានវ័យត្រឹមតែ ២៥ឆ្នាំទេ តែផលិតកររូបនេះអាចផលិតរឿងបែប Sci-fi បាន ហើយថែមទាំងជាអ្នកផលិតស្ប៉តពាណិជ្ជកម្មជាមួយនឹង Motion Graphic និង Animation Graphic ទៀតផង។

ផលិតករភាពយន្ត Sci-fi ហេង លីម

វីដេអូ Sci-Fi គឺជាភាពយន្តបែបវិទ្យាសាស្រ្តច្នៃប្រឌិត វាអាចកើតឡើងមុនសម័យកាល គ្មានបច្ចុប្បន្ន ឬមិនដែលកើតឡើង តែវាជាប្រភេទខ្សែភាពយន្តទាក់ទាញ និងពិបាកក្នុងការផលិត ព្រោះវាទាមទារឱ្យមានជំនាញ ផ្នែក Motion Graphic, 3D និង Visual Effect ជាដើមដើម្បីបង្កើតឈុតឆាកទៅតាមការស្រមើស្រមៃរបស់អ្នកនិពន្ធ ឬអ្នកដឹងនាំរឿង។ ផលិតករវ័យក្មេង ហេងលីម ប្រាប់ថា ការផលិតរឿងបែប Sci-fi វាដូចជាការច្នៃប្រឌិតរឿងមួយឱ្យទៅក្នុងពិភពលោកថ្មីមួយផ្សេងទៀត ដោយប្រើប្រាស់ការប្រៀបធៀបជាមួយជីវិតមនុស្សក្នុងសង្គមពិតមួយឬបច្ចុប្បន្នភាពពិតមួយ។

កន្លងមកផលិតកររូបនេះក៏បានផលិតភាពយន្តខ្លី ចំនួន ៣រឿង មកហើយដែលរឿងនិមួយសុទ្ធតែធ្លាប់ជាប់ក្នុងជំរើសប្រកួតក្នុងមហោស្រពភាពយន្តខ្នាតខ្លីទាំងក្នុងស្រុក និងភាពច្រើនមហោស្រពអន្តរជាតិ ក្នុងនោះដូចរឿង «13th July : The time machine» ដែលមានរយៈពេល១៥នាទីដែលនិយាយពីម៉ាសុីនឆ្លងពេលវេលាទៅកាន់អតីតកាលរបស់យុវជនម្នាក់ រឿងនេះជាប់នៅក្នុងមហោស្រពភាពយន្តខ្លីចតុមុខឆ្នាំ ២០១៣ និងរឿង «Arrested ReamEyso» ដែលជាភាពយន្តខ្លី ២នាទី និយាយអំពីការតាមចាប់ខ្លួនព្រះឥសូរ ដោយពួកម៉ាសុីនមនុស្សយន្ត និង រឿង «Money» ដែលនិយាយពីមនុស្សក្នុងសម័យ ២០៣៩ ការស្លាប់រស់ដោយសារវិបត្តនៃលុយ និងអំណាច ដែលជាប់ក្នុងការជ្រើសរើសប្រកួតក្នុងមហោស្រពអន្តរជាតិនៅបរទេស។

នៅក្នុងការផលិតរឿងប្រភេទ Sci-fi បែបនេះចំណាយអស់ច្រើនលើការកាត់តជាងពេលថតទៅទៀត ពិសេសរបៀបដាក់ Visual Effect ឬ Special Effect ដូចជាចលនាមនុស្សយន្ត រូបភាពអច្ឆរិយ យាន្តអាវកាស ឬរូបភាពនិមិត្តផ្សេងៗទៀត ដែលដូចជាវេទមន្តជាដើម ទាំងនេះមិនមែនជាបញ្ហារបស់ ផលិតករ ហេង លីម នោះទេព្រោះវាជាជំនាញដែលខិតខំស្រាវជ្រាវនិងអនុវត្តមុខកញ្ចក់កុំព្យូទ័ររាប់ឆ្នាំ។ ហេង លីម អ្នកដឹងនាំ Sci-fi ក៏បានបញ្ជាក់ឱ្យដឹងដែរថា៖ «នៅក្នុងGraphic Design យើងអាចធ្វើអ្វីបានទាំងអស់ តាមដែលអ្នកដឹកនាំរឿងចង់បាន វាក៏ជាសំណាងមួយដែរដែលខ្ញុំចេះផ្នែកហ្នឹង»។

យុវជន ហេងលីម ជាកូនអ្នកភ្នំពេញ ហើយកាលពីក្មេងៗ រូបគេមានការជប់ចិត្តនឹងរូបភាពវីដេអូហ្គេម នៅក្នុងហាងអុីធើនេត ជាខ្លាំងដ៏ថ្នាក់ពេលមួយថ្ងៃសម្ងំរៀននៅអុីធើនេតច្រើនជាងនៅសាលារៀន ដែលរូបភាពសិល្បៈឌីជីថលទាំងនោះហើយបានជម្រុញយុវជនវ័យក្មេងម្នាក់ឱ្យក្លាយជាអ្នក Graphic Design និង Motion Graphic Design នេះ ហើយពេលរៀនត្រឹមថ្នាក់ទី ១១ ហេង លីម មានលទ្ធភាពរកប្រាក់ចំណូលពីការងារឌីហ្សាញរបស់ខ្លួនតែជាង១០០ដុល្លាប៉ុណ្ណោះ តែបច្ចុប្បន្ន ហេង លីម ប្រាប់ថារូបគេអាចរកចំណូលពី ៨ពាន់ដុល្លារ ទៅជាង ១មុឺនដុល្លារ ពី Project និមួយៗហើយក្នុងមួយខែៗ ក៏មាន២ ឬ៣ project ដែរ។

ក្រោយបញ្ចប់វិទ្យាល័យ ហេង លីម ក៏ចូលរៀនខាងផ្នែក Graphic Design នៅសាលកវិទ្យាល័យ Limkokwing ហើយក៏បន្តការងារផ្នែកក្រាហ្វិកនេះ រហូតបើកជាក្រុមផលិតករមួយឈ្មោះថា Will Studio ដែលផ្តល់សេវាកម្មខាងផ្នែកឌីហ្សាញ Visual Effect និងផលិតស្ប៉តពាណ្ជិកម្មជាដើម។ លើសពីនេះ ហេង លីម ក៏បានរួមចំណែកឌីហ្សាញ Visual effect និង Special Effect សម្រាប់រឿងធំៗមួយចំនួនទៀតដែល ពិសេស Visual Effect ក្នុងរឿង វិលកចារិក ដែលចេញកាលឆ្នាំ ២០១៦ រឿង នារីវេទមន្ត ចេញកាលឆ្នាំ២០១៦ដូចគ្នា។

ជាក់ស្តែងការផលិតភាពយន្ត និង ស្ប៉ត របៀប Sci-fi និងដោយការប្រើប្រាស់ Visual Effect ជាការលំបាក តែវាសម្បូរទីផ្សារការងារយ៉ាងច្រើន ខណៈអ្នកមានជំនាញលើផ្នែកនេះនៅមានតិចតួចមែនទែន ហើយមានអ្នកចង់ធ្វើការលើផ្នែកនេះជាច្រើនបានបោះបង់ក្តីស្រមៃរបស់ខ្លួនដោយសារខ្វះធនធាន និងភាពអំណត់។ រីឯ ផលិតករវ័យក្មេងរូបនេះ វិញនិយាយថា៖ «គ្មានអ្វីដែលយើងធ្វើមិនបាននោះទេបើយើងមិនបោះបង់ ហើយខ្ញុំតែងគិតថាគេធ្វើបានម្តេចខ្ញុំធ្វើមិនបាន ខ្ញុំត្រូវតែធ្វើឱ្យបាន ហើយពេលខ្ញុំរៀនធ្វើវិដេអូ Effect ហ្នឹង ក៏ធ្វើបានដូចគេ ក្រោយមកខ្ញុំក៏ចេះតែបំបែបក្បាច់វា ហើយខ្ញុំក៏ជ្រើសរើសវិធីធ្វើ Effect ហ្នឹងឱ្យបានច្រើនវិធី ច្រើនរបៀបដែរ»។ ហើយវាជាមោទនភាពបំផុតពេលដែលយើងធ្វើអ្វីដែលអ្នកដទៃថាធ្វើមិនបាន ឬមិនអាចទៅរួចទេ ហេង លីម បន្ថែម។

រាល់ខ្សែភាពយន្តខ្លីរបស់ ហេង លីម ត្បិតមិនទាន់ជាប់បានពានរង្វន់ណាមួយក៏ដោយ តែរូបគេនៅតែរក្សាជំហរផលិតរឿងអ្វីដែលខ្លួនចូលចិត្ត បើទោះជាអ្នកទស្សនាគិតថាពិបាកយល់ តែផលិតករវ័យក្មេងរូបនេះសង្ឃឹមថា៖ «ប្រហែល ១០ឆ្នាំក្រោយ គេអាចភ្ញាក់ផ្អើរពេលបានមើលរឿងរបស់ខ្ញុំវិញ ព្រោះខ្ញុំតែងផលិតរឿងអ្វីមួយដែលប្លែកខុសពីគេ ហើយមុនគេ ហើយតាមរបៀបរបស់ខ្ញុំ»។ ហេង លីម ក៏សំនូមពរដែរថា ៖ «ជាផលិតករគួរតែមានអ្វីមួយជារបស់ខ្លួន ជាស្តាយ៍របស់ខ្លួន ហើយខ្មែរយើងគួរតែឈប់ធ្វើអ្វីៗតាមតែគ្នាទៅ គួរតែមានអ្វីដែល Unique ដែលគេអាចសម្គាល់ថា អ៎រ នេះជារឿងរបៀបខ្មែរយើង»។

ខាងក្រោមជាវិដេអូរឿងខ្លីរបស់ ហេង លីម៖

13th July : The time machine