ផលិតករភាពយន្តខ្មែរ-អូស្រ្តាលី ទោះជានៅឯនាយសមុទ្រក៏នៅតែនឹកដល់ខ្មែរ

2017-11-22 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

«រឿងរ៉ាវដែលជាប់ទាក់ទងនឹងប្រទេសកម្ពុជា គឺពិតជាគួរឱ្យចាប់អារម្មណ៍ វាមានបង្កប់អត្ថន័យសិល្បៈ ប្រពៃណី ទំនៀមទំលាប់ ដ៏ល្អផូរផង់ ដែលធ្វើឱ្យខ្ញុំបំភ្លេចមិនបាន បើទោះខ្ញុំនៅឆ្ងាយប៉ុណ្ណាក៏ដោយ។» នេះជាសម្តីររបស់ លោក ធីម បិុក ផលិតករ ខ្មែរ-អូស្រ្តាលី ដែលកំពុងរស់នៅប្រទេសអូស្រ្តាលីទីក្រុង Melbourn។

លោក ធីម បិុក ផលិតករ ខ្មែរ-អូស្រ្តាលី

ស្ថិតក្នុងវ័យ ៣៥ឆ្នាំ លោកបានប្រលូកការងារជាផលិតករ អ្នកដឹកនាំរឿង និងអ្នកកាត់តរឿងឱ្យក្រុមហ៊ុនផលិកម្មមួយរបស់ប្រទេសអូស្រ្តាលី និងជាអ្នករចនាក្រាហ្វិចឌីហ្សាញម្នាក់ជាង ១០ឆ្នាំមកហើយ។ ការងាររបស់ លោក មានដូចជាផលិតស្ប៉តពាណិជ្ជកម្ម ភាពយន្តខ្លី និងវែង ភាពយន្តឯកសារ និងវីដេអូបទចម្រៀងជាដើម។

លើសពីនេះទៀត ប៉ុន្មានឆ្នាំចុងក្រោយនេះ ផលិតករសញ្ជាតិខ្មែរ-អូស្រ្តាលីម្នាក់នេះ តែងតែឆ្លៀតពេលទំនេរមកកម្ពុជា រួចផលិតជាខ្សែភាពយន្តខ្លី និងផលិតបានស្ប៉តខ្លីមួយនិយាយពីប្រាសាទអង្គរវត្ត ដែលមានចំណងជើងថា « I am Angkor Wat» និងស្ប៉តខ្លីមួយទៀតដែលនិយាយអំពីប្រាក់ឌួង ក្នុងសម័យលង្វែករបស់ខ្មែរ។

សកម្មភាពផលិតភាពយន្តរបស់លោក ធីម បុិក

លោក ធីម បិុក បានប្រាប់ Sabay តាមរយៈវីដេអូ Call ថា៖ «ការផលិតវីដេអូខ្លីនេះជាទម្លាប់របស់ខ្ញុំ ហើយពិសេសខ្ញុំស្រលាញ់វប្បធម៌របស់ខ្មែរ និងចង់បង្កើតវាទុកជាអនុស្សាវរីយ៍សម្រាប់ប្រជាជនខ្មែរ»។ ការផលិតវីដេអូស្ប៉តខ្លីនេះ លោកចំណាយថវិកាផ្ទាល់ខ្លួន ជាង ៥០០ដុល្លា ក្នុងមួយវីដេអូ ហើយចំណាយពេលផលិតក្នុងពេលទំនេរដែលមកលេងកម្ពុជា ពិសេសដោយមានការចូលរួមពីមិត្តភ័ក្រ្តដែលនៅក្នុងស្រុលខ្មែរ ជួយថត និងរៀបចំការផលិត ដោយមិនយកកម្រៃ ដោយមានការចូលរួមសម្តែងដោយកញ្ញា ស៊ិន សក្កដា ទៀតផង។

កញ្ញា ស៊ិន សក្កដា សម្តែងឈុតមួយក្នុងស្ប៉ត «I am Angkor Wat»

ផលិតករដែលមានស្រុកកំណើតពីខេត្តបន្ទាយមានជ័យបន្តថា៖ «ខ្ញុំចូលចិត្តសិល្បៈតាំងពីអាយុ ៥-៦ឆ្នាំ ហើយខ្ញុំចេះគូររូបតាំងពីក្មេងៗមក រហូតខ្ញុំបានមកអូស្រ្តាលី ខ្ញុំក៏ចាប់យកជំនាញ ខាង Graphic Design ហើយបន្តមកទៀតខ្ញុំក៏ប្រលូកការងារក្នុងវិស័យផលិតភាពយន្តរហូតមកដល់ពេលនេះ»។

លោក ធីម បិុក ជាពលរដ្ឋខ្មែរម្នាក់ដែលបានភៀសខ្លួនទៅព្រំដែនប្រទេសថៃតាំងពីឆ្នាំ ១៩៨៤ ហើយ៤ឆ្នាំក្រោយមក លោកក៏មានឱកាសបន្តទៅរស់នៅក្នុងប្រទេសទី ៣ គឺនៅប្រទេសអូស្រ្តាលី ទីក្រុង Melbourn តាំងពីពេលនោះមក។

តាមរយៈពេល និងបទពិសោធន៍របស់ លោក ធីម បិុក ក្នុងការផលិតភាពយន្ត លោកមើលឃើញថា ការផលិតខ្សែភាពយន្តនៅកម្ពុជាពិតជាមានការរីកចំរើនច្រើនជាងការរំពឹងទុក ហើយក៏បានលើកទឹកចិត្តផលិតករខ្មែរថា៖ «និយាយទៅនៅស្រុកខ្មែរ មានសក្តានុពលក្នុងការផលិតភាពយន្តច្រើនមែនទែន ហើយផលិតករខ្មែរក៏អាចទាញយកឱកាសនេះមកផលិតខ្សែភាពយន្តណាដែលទាក់ទងអំពីខ្មែរឱ្យបានច្រើន និងពិស្តារ នោះផលិតករខ្មែរក៏មានឱកាសបង្ហាញភាពយន្តរបស់ខ្លួនមិនខាន»។

សកម្មភាពផលិតភាពយន្តរបស់លោក ធីម បុិក

ផលិតកររូបនេះ បន្ថែមទៀតថា នៅស្រុកខ្មែរ បើអ្នកចេះគាស់កកាយសាច់រឿងបែបប្រវិត្តិសាស្រ្តមកធ្វើការបង្ហាញនោះនឹងទទួលបានជោគជ័យ តែសាច់រឿងប្រភេទនេះត្រូវការចំណាយពេលវេលា និងដើមទុនច្រើន ដូចនេះអ្នកចាប់ផ្តើមផលិតខ្សែភាពយន្តថ្មីៗគួរផលិតរឿងរបៀបភ័យរន្ធត់ ដែលនេះគឺជាការផ្តួចផ្តើមកុនបែបកម្សាន្តដ៏ល្អម្យ៉ាងដែរ។ គ្រាន់តែលោក បញ្ជាក់ថា ផលិតករខ្មែរ ដែលចង់ថតរឿងប្រភេទភ័យរន្ធត់ គួរកុំថតរឿងបែបបន្លាច គួរថតពីរឿងបែបភ័យរន្ធត់ឱ្យមានលក្ខណៈភ័យរន្ធត់ ដោយចេះរៀបចំបរិយាកាសនៃរឿងឱ្យមានភាពភ័យរន្ធត់វិញទើបត្រូវ។

ផលិតករ ខ្មែរ អូស្រ្តាលីរូបនេះ ក៏បានលើកឡើងដែរថា តាមពិតការផលិតខ្សែភាពយន្ត អ្នកណាក៏អាចធ្វើបានដែរតែមានការគាំទ្រឬយ៉ាងណានោះ វាអាស្រ័យលើកត្តាជាច្រើន ពិសេសគុណភាពនៃភាពយន្តជាចំណុចខ្លាំង និងនាំឱ្យមានភាពជោគជ័យ។

ទស្សនាស្ប៉តខ្លី I am Angkor Wat ដែលផលិតដោយលោក ធីម បុិក និងសម្តែងដោយកញ្ញា ស៊ិន សក្កដា៖