វ៉ាដាច់ Bill Gates ផឹង! ទ្រព្យមេ Amazon ឡើងដល់ ១០០ ពាន់លានដុល្លារ

2017-11-26 03:48:03
ចំនួនមតិ 0 | ចំនួនចែករំលែក 0

ចន្លោះមិនឃើញ

តម្លៃហ៊ុនរបស់ក្រុមហ៊ុន Amazon បានកើនឡើងយ៉ាងគំហុកនៅទិវាទិញ/លក់ទំនិញ Black Friday នាំឲ្យទ្រព្យសម្បត្តិលោក Jeff Bezos ដែលជាស្ថាបនិក ឡើងដល់ ១០០,៣ ពាន់លានដុល្លារឯណោះ។

នេះមិនមែនជាលើកទីមួយទេ ដែលមានអ្នកអាចបង្កើនទ្រព្យសម្បត្តិរបស់ខ្លួនដល់ ១២ ខ្ទង់ ដោយកាលពីឆ្នាំ ១៩៩៩ លោក Bill Gates ស្ថាបនិកក្រុមហ៊ុន Microsoft បានឡើងដល់ចំណុចនេះរួចមកហើយ។

គិតចាប់ពីដើមឆ្នាំ ២០១៧ មកត្រឹមសប្ដាហ៍នេះ ទ្រព្យសម្បត្តិរបស់ស្ថាបនិកវ័យ ៥៣ ឆ្នាំរូបនេះ កើនឡើង ៣២,៦ ពាន់លានដុល្លារឯណោះ ជាការកើនឡើងដ៏សន្ធឹកសន្ធាប់មួយក្នុងប្រវត្តិសាស្ត្របញ្ជីមហាសេដ្ឋីពាន់លាន Bloomberg Billionaires Index។

ជាមួយនឹងទឹកប្រាក់ដ៏ច្រើនមហាសាលបែបនេះ ធ្វើឲ្យមានសំនួរចោទសួរថាលោក Jeff នឹងប្រើប្រាស់វាដោយរបៀបណា។ បើប្រៀបធៀបនឹងលោក Bill Gates លោក Jeff បានធ្វើការបរិច្ចាគទ្រព្យសម្បត្តិរបស់ខ្លួនតិចតួចបំផុត។

មហាសេដ្ឋី Bill Gates ដែលបច្ចុប្បន្នមានទ្រព្យសម្បត្តិ ៨៦,៨ ពាន់លានដុល្លារ អាចនឹងមានទ្រព្យសម្បត្តិលើសពី ១៥០ ពាន់លានដុល្លារ ប្រសិនបើលោកមិនបរិច្ចាគហ៊ុន Microsoft ចំនួន ៧០០ លានហ៊ុន, ទ្រព្យសម្បត្តិសរុប ២,៩ ពាន់លានដុល្លារ និងទ្រព្យសម្បត្តិដទៃទៀតដល់កិច្ចការសប្បុរសធម៌ទេនោះ៕

ប្រភព៖ Bloomberg ប្រែសម្រួល៖ សុខហេង