គ្រវាត់ចោលរឿងគ្មានបានការ ៦យ៉ាងនេះភ្លាម ពេលអាយុ២០ឆ្នាំ ទើបក្លាយជាអ្នកមាន

2017-11-28 02:26:46
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សម្នាក់ៗតែងប្រាថ្នាចង់មានអនាគតដ៏ល្អ ក្លាយជាមនុស្សជោគជ័យក្នុងជីវិត ភាពជោគជ័យ ឫបរាជ័យគឺស្ថិតលើខ្លួនយើងទាំងស្រុងជាអ្នកគូសវាស។ ដូចនេះហើយទាមទារឲ្យមនុស្សគ្រប់គ្នាដើរលើផ្លូវត្រូវ ចេះចាប់យកអ្វីដែលមានប្រយោជន៍ ដើម្បីអនាគតដ៏ល្អ។ ខាងក្រោមនេះជារឿងដែលគួរតែបោះបង់ចោលពេលដែលមនុស្សម្នាក់ៗឈានមកដល់វ័យ២០ឆ្នាំ៖

១. ចរិតខឹងឪពុកម្ដាយពេលមិនបានអ្វីដូចចិត្ត

កាលនៅជាកុមារភាព ជាវ័យមួយមិនទាន់ចេះគិតវែងឆ្ងាយនៅមិនទាន់ដឹងក្ដីថា អ្វីគួរមិនគួរ យល់តែពីចិត្តខ្លួនឯង ចង់បានអ្វីក៏ត្រូវតែបានហ្នឹង។ ប៉ុន្តែពេលធំពេញវ័យអាយុ២០ឆ្នាំនៅតែមានចរិតបែបនេះទៀត គឺមានន័យថា នៅមិនទាន់លះបង់ចរិតក្មេង មិនទាន់មានភាពចាស់ទុំ និងភាពជាអ្នកដឹកនាំនៅឡើយទេ។

មកដល់វ័យនេះហើយ គួរណាស់តែជួយសម្រាលបន្ទុកគ្រួសារ មិនមែននៅតែអំពល់ទុក្ខឪពុកម្ដាយទៀតទេ។ ដូច្នេះកុំគិតថាខ្លួនឯងនៅក្មេងទៀត ព្រោះបើនៅតែគិតបែបនេះមិនដឹងពេលណានឹងចាស់ទុំ យល់ការរាក់ជ្រៅ និងរៀនក្រោកឈរដោយខ្លួនឯងទេ។

២. មិត្តភក្ដិរាប់អានមិនរើសមុខតែមិនបានការម្នាក់

ការសេពគប់មិត្តភក្ដិក្នុងវ័យនេះគឺត្រូវប្រយ័ត្នបំផុត កុំព្យាយាមសម្លឹងរកតែអ្នកណាសម្បូរលុយ ចូលចិត្តដើរលេងពេក ព្រោះអ្នកទាំងនោះមិនបានផ្ដល់ប្រយោជន៍អ្វីទៅថ្ងៃអនាគតទេ គឺបានត្រឹមតែធ្វើឲ្យសប្បាយចិត្តក្នុងបច្ចុប្បន្នប៉ុណ្ណោះ។

តែផ្ទុយមកវិញគួរបង្កើតមិត្តភាពជាមួយបុគ្គលដែលផ្ដោតសំខាន់លើការសិក្សា បុគ្គលដែលមានភាពចាស់ទុំ បុគ្គលដែលតែងគិតគូរពីអនាគត ព្រោះអ្នកទាំងនោះ នឹងនាំយើងដើរទៅរកផ្លូវល្អ និងមានអនាគតល្អ។ បើមានមិត្តភក្ដិច្រើន តែសុទ្ធជាអ្នកគិតតែពីរឿងសប្បាយ រឿងដើរលេងក៏មិនបានផលប្រយោជន៍អ្វីដែរ។

៣. ការងារសព្វបែបយ៉ាងនៅឆៅទាំងអស់គ្មានចេះអ្វីសោះ'

ហេតុអ្វីបានជាការចេះធ្វើការងារសព្វគ្រប់បែបយ៉ាង ពិតជាសំខាន់សម្រាប់មនុស្សវ័យនេះ? ជាការពិតអ្នកនឹងយល់ពីតម្លៃវា នៅពេលដែលអ្នកឃ្លាតឆ្ងាយពីគ្រួសារហើយអ្វីក៏មិនចេះធ្វើទាល់តែសោះ មិនថាតែការដាំ បាយធ្វើម្ហូប បោកគក់ជាដើម។ មនុស្សដែលគិតថា ការងារកំប៉ិកកំប៉ុកគ្មានអ្វីសំខាន់ គឺជាការគិតខុសទាំងស្រុង ត្រូវចាំថាចេះអ្វីក៏ដោយ ក៏មិនចេះអត់ប្រយោជន៍ដែរ ព្រោះមុននឹងឈានដល់ការងារធំគឺផ្ដើមចេញពីការងារតូចៗទាំងអស់នោះហើយ។

ការចេះធ្វើការងារទាំងឡាយ មិនថាស្រាលធ្ងន់សុទ្ធតែមានតម្លៃទាំងអស់ នឹងបង្រៀនឲ្យអ្នកក្លាយជាមនុស្សរឹងមាំបំផុត ទៅថ្ងៃមុខមិនថា អ្នកជួបរឿងលំបាកអ្វីក៏អ្នកអាចឆ្លងកាត់បានដែរ។ ប៉ុន្តែអ្នកដែលមិនចេះអ្វីទាំងអស់សូម្បីតែរឿងតិចតួចក៏គិតថា ធំប៉ុនមេឃប៉ុនដីដែរ។

៤. មិនទានចេះគ្រប់គ្រងអារម្មណ៍

យុវវ័យអាចនិយាយថា ជាវ័យកំពុងពេញសប្បាយ តែក៏អាចនិយាយថា ជាវ័យពិបាកឆ្លងកាត់បំផុត។ បើសិនជាធ្វើអ្វីតែទៅតាមអារម្មណ៍ ទៅតាមការអូសទាញ ទៅតាមតម្រូវការភាពជាយុវវ័យភ្លើតភ្លើន ឡូយឆាយហួស ចាយលុយគ្មានគិត មិនអាណិតទឹកចិត្តឪពុកម្ដាយ នោះនឹងទាញអនាគតអ្នកឲ្យសាបសូន្យបើមិនភ្ញាក់រលឹក។

ជម្រើសដ៏ល្អបំផុត ដើម្បីក្លាយជាបុគ្គលជោគជ័យនៅថ្ងៃអនាគត គឺចេះបែងចែកឲ្យច្បាស់លាស់រវាង ការកម្សាន្តសប្បាយ និងការអប់រំ ចេះថ្លឹងថ្លែងរឿងគួរធ្វើមិនគួរធ្វើ ចេះហ្វឹកហាត់អប់រំចិត្ត មានភាពជាអ្នកដឹកនាំ ចេះសម្រេចចិត្តជ្រើសរើសអ្វីដែលគិតថាមានប្រយោជន៍សម្រាប់ខ្លួនឯង។

៥. មិនដែលគិតគូរឿងអនាគតសោះ

យុវវ័យភាគច្រើនតែងយល់ថា ខ្លួននៅក្មេងត្រូវធ្វើឲ្យសប្បាយ ឲ្យអស់ចិត្តសិន ចាំអាយុរៀងច្រើនចាំគិតពីរឿងអនាគត។ តើការយល់បែបនេះត្រឹមត្រូវឫទេ? ចម្លើយ គឺជារឿងដ៏ខុសឆ្គងបំផុត យុវវ័យមិនមានអត្ថន័យបែបនេះទេ តែជាវ័យដែលត្រូវផ្ដោតលើការសិក្សា ការស្រាវជ្រាវ ការបង្កើតទំនាក់ទំនងដ៏ល្អជាមួយបុគ្គលល្អៗក្នុងសង្គមទៅវិញទេ ទើបជាការគិតដ៏ត្រឹមត្រូវ។

អ្នកនិយាយថា ចាំអាយុច្រើនសឹមគិតពីអនាគត តែទម្រាំតែអ្នកគិត គឺវាចង់យឺតពេលទៅហើយ ព្រោះថា ជំនាញបច្ចេកទេសក៏គ្មាន ជំនាញនៅសាកលវិទ្យាល័យក៏គ្មាន ភាសាអង់គ្លេសក៏គ្មាន កុំព្យូទ័រក៏មិនចេះ ។ ដូច្នេះចុងក្រោយ អ្នកនឹងស្ដាយពេលវេលាកន្លងមកដែលមិនគិតខំប្រឹងប្រែង គិតតែរឿងសប្បាយ ក៏ព្រោះតែអ្នកមិនយល់ច្បាស់ពីអត្ថន័យភាពជាយុវវ័យនេះហើយ។

៦. មួយថ្ងៃៗគិតតែពីរឿងស្នេហាលឺសូរតែខូចចិត្តឥតល្ហែ

ស្នេហាជារឿងដែលមនុស្សគ្រប់រូបមិនអាចជៀសផុត ព្រោះជាច្បាប់ធម្មជាតិ ហើយក៏មិនអាចនិយាយថា អ្នកដែលមានស្នេហាទាំងវ័យក្មេងគឺជារឿងខុសឆ្គងដែរ ព្រោះបើជួបមនុស្សដែលស្រឡាញ់ហើយពិបាកនឹងឃាត់ឃាំងបេះដូងណាស់។

ប៉ុន្តែអ្នកដែលចេះប្រើខ្សែជីវិតបានត្រឹមត្រូវ គេនឹងអាចបែងចែកថា វ័យណាកំពុងរៀន? វ័យណាកំពុងខំធ្វើការរកលុយ និងវ័យណាត្រូវគិតពីរឿងស្នេហា? ដូច្នេះយកល្អកុំប្រញាប់យកជីវិតត្រូវប្រឡូករឿងស្នេហាទាំងវ័យក្មេងឲ្យសោះ ទាំងមិនទាន់មានភាពចាស់ទុំ ទាំងមិនមិនទាន់មានអ្វីក្នុងខ្លួន។ ស្នេហាក្នុងភាពជាយុវវ័យងាយបង្កើត តែក៏ងាយងាយបញ្ចប់ ព្រោះអ្នកទាំងពីរបង្កើតវាឡើងទៅតាមអារម្មណ៍បញ្ជា ហើយចុងក្រោយគ្មានអ្វីក្រៅពីឈឺចាប់ ខូចចិត្តនោះទេ។

បុគ្គលដែលជោគជ័យរឿងស្នេហា គឺអ្នកដែលបានត្រៀមខ្លួនរួចរាល់នឹងទទួលយកស្នេហា អ្នកដែលមានភាពចាស់ទុំ មានការងារច្បាស់លាស់ប្រាក់ខែច្រើន និងស្វែងរកដៃគូជីវិតសក្ដិសមនឹងខ្លួនឯងបំផុត៕

ចុចអានអត្ថបទពាក់ព័ន្ធ៖

អត្ថបទ៖ ថោ ច័ន្ទឬទ្ធិ

ប្រភព៖ គំនិតអ្នកជោគជ័យ