បំណងប្រាថ្នាមួយរបស់សេដ្ឋីកសិកម្មគឺនាំផ្លែស្វាយខ្មែរទៅលក់គ្រប់ទីផ្សារលើពិភពលោក

2017-11-28 09:28:01
ចំនួនមតិ 0 | ចំនួនចែករំលែក 0

ចន្លោះមិនឃើញ

បំណងប្រាថ្នាមួយរបស់អ្នកជំនួញជើងចាស់នៅក្នុងវិស័យកសិកម្មឧកញ៉ា ម៉ុង ឫទ្ធី គឺចង់នាំផ្លែស្វាយដែលផលិតដោយដៃរបស់ប្រជាជនខ្មែរទៅដាក់លក់នៅលើទីផ្សារទាំងអស់ជុំវិញពិភពលោក។ បំណងប្រាថ្នារបស់សេដ្ឋីកសិកម្មរូបនេះ បានកើតឡើងស្របពេលដែលលោកបានធ្វើដំណើរទៅក្រៅប្រទេសញឹកញាប់ ប៉ុន្តែនៅទីនោះមិនមានផលិតផលកសិកម្មខ្មែរលក់ឡើយ។

ឧកញ៉ា ម៉ុង ឫទ្ធី បានរៀបរាប់ថាៈ "ខ្ញុំមានបំណងប្រាថ្នាថា ថ្ងៃណាមួយខ្ញុំនឹងនាំយកផ្លែស្វាយដែលដាំដោយដៃប្រជាជនកម្ពុជាយើង យកមកដាក់តាំងនៅលើទីផ្សារទាំងអស់ឲ្យបាន"។

មកទល់បច្ចុប្បន្នបំណងប្រាថ្នារបស់អ្នកជំនួញជើងចាស់រូបនេះ បានសម្រេចមួយផ្នែកហើយ ពោលគឺលោកឧកញ៉ា បាននាំផ្លែស្វាយកែវរមៀតរបស់ខ្មែរទៅលក់នៅលើទីផ្សារអឺរ៉ុប។

ថ្លែងក្នុងបទសម្ភាសជាមួយ Sabay កាលពីកន្លងទៅ ឧកញ៉ា ម៉ុង ឫទ្ធី បានឲ្យដឹងថា ទីផ្សារអឺរ៉ុបបានទទួលស្គាល់ផ្លែស្វាយកែវរមៀតរបស់ខ្មែរមានគុណភាពល្អ និងបានសុំឲ្យបង្កើនជើងនាំចេញដល់ ២ជើង ក្នុងមួយសប្ដាហ៍។

លោកឧកញ៉ា ឲ្យដឹងថា ស្វាយដែលនាំចេញ មិនតិចជាង ៤តោនឡើយក្នុងមួយជើង ហើយបន្ទាប់ពីបញ្ជូនដល់ប្រទេសបារាំង នឹងមានការចែកចាយបន្តទៅតាមបណ្ដាប្រទេសនានានៅអឺរ៉ុបទៀត។ លោកឧកញ៉ា បានបញ្ជាក់ថា ការដឹកជញ្ជូនមានតម្លៃថ្លៃបន្តិច ឯការវេចខ្ចប់ក៏ត្រូវប្រុងប្រយ័ត្នខ្ពស់ ព្រោះសូម្បីជាំបន្តិចក៏មិនអាចនាំចេញបានដែរ។

គួរជម្រាបថា នៅថ្ងៃទី ២៦ ខែវិច្ឆិកា ថ្មីៗនេះ ក្រុមហ៊ុនឧកញ៉ា ម៉ុង ឫទ្ធី បាននាំចេញស្វាយទៅកាន់ទីក្រុងបារីស ប្រទេសបារាំងប្រមាណ ៤តោន ៨០០គីឡូក្រាម តាមជើងហោះហើរQATAR AIRWAY ។ ដោយកន្លងមក ក្រុមហ៊ុនកសិកម្មមួយនេះ បានសម្រេចនាំចេញស្វាយចំនួន ២២ជើង និងមានបរិមាណចំនួន ១៣០តោន៕

អត្ថបទ៖ ស៊ិន សាវ៉េត