ក្រុមតន្រ្តី Tony Memmel និង យឹង យន បង្កការផ្ញាក់ផ្អើលដល់អ្នកបាត់ដំបង

2017-11-29 02:08:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ប្រគុំតន្រ្តី ដើម្បីផ្សាភ្ជាប់ទំនាក់ទំនងអាស៊ីនិងអាមេរិច ដែលមានក្រុមតន្រ្តីដ៏ល្បីរបស់សហរដ្ឋអាមេរិក Tony Memmel & His Band រួមជាមួយសិល្បករខ្មែរ លោក យឹង យន និងកញ្ញា អ៊ុន ស្រីលីស ធ្វើឱ្យមានការចាប់អារម្មណ៍យ៉ាងខ្លាំងពេលសម្តែង នៅក្នុងបរិវេណសាលាហ្វាពន្លឺសិល្បៈ ខេត្តបាត់ដំបងយប់មិញ ជាមួយទេពកោសល្យសម្តែងចម្រៀងដ៏ពិសេសរបស់សិល្បករខ្មែរ រួមឆាកជាមួយសិល្បករបរទេស។

ទោះក្នុងបរិយាកាសស្រុកស្រែ សម្បូរទៅដោយសត្វល្អិតហោះហើរ រំខានម្តេចក្តី ក៏ការប្រគុំតន្រ្តីដ៏កម្រនេះ បានធ្វើឱ្យប្រជាពលរដ្ឋដែលរស់នៅក្បែរសាលា ហ្វាពន្លឺសិល្បៈ មានការរីករាយ និងផ្តល់ស្នាមញញឹម ពិសេសកោតសសើរដ៏សិល្បករ លោក Tonny Memmel ដែលដៃរបស់លោកម្ខាងត្រូវពិការតាំងពីកុមារ បាត់មួយកំណាត់ខាងស្តាំ ម្តេចក្តីក៏ សិល្បករម្នាក់នេះនៅតែអាចប្រគុំតន្រ្តីបានយ៉ាងល្អ ហើយការតស៊ូ និងសម្ថភាព សម្តែង របស់លោកបង្ហាញយើងថាគ្មានអ្វីដែលមិនអាចធ្វើទៅរួចនោះទេ។

Tony Memmel ក៏ថ្លែងប្រាប់ទៅមហាជនទៀតថា៖ «ពិការភាពមិនមែនជាឧបសគ្គទេដរាណាអ្នកមិនបោះបង់ការស្រលាញ់ និងកិច្ចខិតខំប្រឹងប្រែងរបស់ខ្លួន»។ ហើយរូបលោក និងក្រុមរបស់លោក និងធ្វើដំណើរជុំវិញពិភពលោកដើម្បីបង្ហាញមនុស្សគ្រប់គ្នាថា សិល្បៈធ្វើឱ្យមនុស្សមានសង្ឃឹម បង្កើតស្នាមញញឹម និងជួយជម្រុញលើកទឹកចិត្តដល់មនុស្សគ្រប់គ្នាឱ្យមានសង្ឃឹម និងមានការតស៊ូក្នុងជីវិត ពិសេសមិនត្រូវបោះបង់ក្តីស្រមៃរបស់ខ្លួនជានិច្ច។

ការសម្តែងតន្ត្រី របស់ក្រុម Tony Memmel & His Band នឹងប្រព្រឹត្តនៅក្នុងប្រទេសអាស៊ីក្នុងរយៈពេលយូរមួយ ហើយបច្ចុប្បន្នក្រុមតន្រ្តីកំពុងធ្វើដំណើរនៅកម្ពុជា ហើយនៅបាត់ដំបងនេះជាការសម្តែងទីពីរបន្តពីការសម្តែងជាមួយក្រុម តន្ត្រី SmallWorld SmallBand ដែលជាក្រុមតន្រ្តី Original Song ល្បីមួយនៅភ្នំពេញក្នុងបរិវេណវិទ្យាភាសាបរទេសកាលពីសប្តាស៍មុន។

អត្ថបទ៖ Sunny