ដូណាល់ ត្រាំ បោះសំដីធ្ងន់ៗ ក្រោយកូរ៉េខាងជើង បាញ់មីស៊ីលចូលសមុទ្រជប៉ុន ព្រឹកនេះ

2017-11-29 02:31:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកព្រលឹមថ្ងៃទី២៩វិច្ឆិកានេះ កូរ៉េខាងជើង បានធ្វើតេស្តបាញ់មីស៊ីលឆ្លងទ្វីប១គ្រាប់ ចេញពីតំបន់ Pyongsong ស្ថិតនៅភាគខាងជើងក្រុងព្យុងយ៉ាង ចូលទៅក្នុងសមុទ្រជប៉ុន។ នេះបើតាមការបញ្ជាក់ពីយោធាកូរ៉េខាងត្បូង និងអាមេរិក។

មន្ទីរបញ្ចកោណអាមេរិក បានឲ្យដឹងថា តាមការវាយតម្លៃជាបឋមបង្ហាញថា មីស៊ីលនោះ គឺជាប្រភេទមីស៊ីលបាលីស្ទីកអន្តរទ្វីប (ICBM)។ វាបានហោះក្នុងចម្ងាយប្រហែល ១ពាន់គីឡូម៉ែត្រ មុនធ្លាក់ចូលក្នុងតំបន់សេដ្ឋកិច្ចផ្ដាច់មុខរបស់ជប៉ុន។ ចំណែកយោធាកូរ៉េខាងត្បូងថា មីស៊ីលនោះហោះបានចម្ងាយ ៩៦០គីឡូម៉ែត្រ។

មេដឹកនាំកូរ៉េខាងជើង គីម ជុងអ៊ុន

ក្រោយពេលបាញ់សាកល្បងគ្រាប់មីស៊ីលរួច រដ្ឋមន្ត្រីក្រសួងការពារជាតិអាមេរិក លោក James Mattis បានបង្ហាញថា វាមានសមត្ថភាពវាយប្រហារ គ្រប់ទីកន្លែងនៅលើពិភពលោក។

ក្រុងព្យុងយ៉ាង បានបាញ់មីស៊ីលដែលហោះខ្ពស់ និងឆ្ងាយជាងការធ្វើតេស្តនាពេលកន្លងមក ទោះបីជាមានការព្រមានម្ដងហើយម្ដងទៀតពី ប្រធានាធិបតីអាមេរិក ដូណាល់ ត្រាំ ដែលបាននិយាយថា លោកនឹងប្រឆាំងនឹងប្រទេសផ្ដាច់ការនេះ ជាមួយនឹង ភ្លើងនិងកំហឹង ប្រសិនបើប្រទេសនេះគំរាមកំហែងដល់សហរដ្ឋអាមេរិក។

ប្រធានាធិបតីអាមេរិក ដូណាល់ ត្រាំ

មិនតែប៉ុណ្ណោះ រយៈពេលប៉ុន្មានម៉ោងក្រោយពេលធ្វើតេស្តរបស់កូរ៉េខាងជើង លោក ត្រាំ មានការរឹតត្បិតកាន់តែខ្លាំង ដោយប្រាប់អ្នកយកព័ត៌មាននៅសេតវិមានថា សហរដ្ឋអាមេរិកនឹងចាត់វិធានការណ៍។

«យើងនឹងចាត់ការវា។ កូរ៉េខាងជើង គឺជាស្ថានការណ៍ដែលយើងនឹងដោះស្រាយ»។ នេះបើតាមសម្តី លោក ត្រាំ៕

ចុចអាន៖

ប្រភព៖ CNN ប្រែសម្រួល៖ សេង ឡុង