នី មុន្នីនាថ ឲ្យមេធាវីចូលបំភ្លឺជំនួសនៅតុលាការ អាចជាការគេចវេះទេ?
- 2017-11-30 07:37:34
- ចំនួនមតិ 0 | ចំនួនចែករំលែក 0
នី មុន្នីនាថ ឲ្យមេធាវីចូលបំភ្លឺជំនួសនៅតុលាការ អាចជាការគេចវេះទេ?
ចន្លោះមិនឃើញ
សាលាដំបូងរាជធានីភ្នំពេញ បានផ្តើមនីតិវិធីត្រៀមរបស់ខ្លួនលើកដំបូងលើបណ្ដឹងលោក អ៊ឹង សូឡាង ប្ដឹងអតីតគូដណ្ដឹងរបស់ខ្លួនគឺកញ្ញា នី មុន្នីនាថ ទាមទារប្រាក់ចំនួន ១២ម៉ឺនដុល្លារ កាលពីរសៀលម្សិលមិញនេះ។
នីតិវិធីលើកដំបូងនេះពុំមានវត្តមានតារាសម្ដែងរូបនេះចូលរួមទេ គឺមានតែមេធាវី របស់កញ្ញាតែប៉ុណ្ណោះ។ យ៉ាងណាទាក់ទងបញ្ហានេះ លោក មេធាវី រ៉ូ ប៊ីនណៃ បាននិយាយថា ករណីនេះ តុលាការកំពុងចាត់ការតាមនីតិវិធី ពុំទាន់មានលទ្ធផលយ៉ាងណានោះទេ តែលោកបានបញ្ជាក់ថា ពុំមានករណីឆបោក ឬបណ្តឹងឆបោកប្រឆាំងកូនក្តីខ្លួន ដូចសារព័ត៌មានមួយចំនួនបានចុះផ្សាយឡើយ។
លោកបានបញ្ជាក់បន្ថែមថា កូនក្តីខ្លួនពុំបានគេចវេស ឬមិនចង់ចូលបំភ្លឺនៅតុលាការដូចសារព័ត៌មានមួយចំនួនបានចុះផ្សាយនោះដែរ។ យោងតាមនីតិវិធីក្រមរដ្ឋប្បវេណី នៃព្រះរាជាណាចក្រកម្ពុជា មេធាវីតំណាងដោយអាណត្តិ អាចឆ្លើយជំនួសកូនក្តីបាន ដោយពុំចាំបាច់មានវត្តមានរបស់គូភាគីទេ ដូច្នេះមេធាវី អាចចូលជំនួស កញ្ញា នី មុន្នីនាថ គ្រប់នីតិវិធីរបស់តុលាការបាន មិនខុសច្បាប់ទេ។
ពុំទាន់មានប្រភពច្បាស់ការណាមួយពីសាលាដំបូងរាជធានីភ្នំពេញថា តើតុលាការនឹងកោះហៅគូភាគីលើកទី២ នៅថ្ងៃណាឡើយ។
យោងតាមពាក្យបណ្ដឹង លោក អ៊ឹង សូឡាង បានប្តឹងទាមទារសំណងសរុបមានចំនួន ១២ម៉ឺនដុល្លារ ពីកញ្ញា នី មុន្នីនាថ ដោយក្នុងនោះលោកបានទាមទារឲ្យ នី មុន្នីនាថ សងប្រាក់ចំនួន ៧ម៉ឺនដុល្លារ និងសំណងជំងឺចិត្តចំនួន ៥ម៉ឺនដុល្លារ។