ឡាន Prius មានដល់ទៅ ៤ ប្រភេទ កុំច្រឡំឲ្យសោះមុនទិញ

2017-11-30 23:02:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្ត Prius ជារថយន្តប្រើប្រព័ន្ធម៉ាស៊ីន Hybrid ដ៏ពេញនិយមមួយ ដោយសារតែវាអាចសន្សំសំចៃប្រេងឥន្ធនៈបានច្រើន និងមានតម្លៃធូរថ្លៃផងដែរ។ រថយន្ត Prius នេះដែរមានចែកចេញជា ៤ ប្រភេទខុសៗគ្នា រួមមាន ៖

Prius

ជារថយន្តប្រភេទដើម (Original) ដែលអាចសន្សំសំចៃប្រេងឥន្ធនៈបានយ៉ាងច្រើន និងមិនប៉ះពាល់ដល់បរិស្ថានខ្លាំងនោះទេ ហើយថែមទាំងមានបច្ចេកវិទ្យាទំនើបៗជាច្រើនផងដែរ។ ជាមួយនឹងគូថក្រោយប្រភេទ Liftback (លើកឡើងលើ) អាចឲ្យអ្នករក្សាទុកឥវ៉ាន់បានច្រើន។

រថយន្ត Prius ស៊េរីចុងក្រោយឆ្នាំ ២០១៧ មានតម្លៃចាប់ពី ២៨ ៩៨០ ដុល្លារ (សហរដ្ឋអាមេរិក) ដោយមានម៉ាស៊ីនស៊ីឡាំង ៤ ចំណុះ ១,៨ លីត្រ អមនឹងម៉ូទ័រអគ្គិសនី ដែលមានកម្លាំងសរុប ១២១ សេះ។ បើកក្នុងក្រុង ១០០ គ.ម ស៊ី ៤,៣៥ លីត្រ និងក្រៅក្រុង ១០០ គ.ម ស៊ី ៤,៧ លីត្រ។

Prius c

Prius c ជាប្រភេទរថយន្ត Prius ដែលមានរូបរាងកាន់តែតូចជាងប្រភេទដើម និងមានតម្លៃធូរថ្លៃជាង។ Toyota Prius c ស៊េរីចុងក្រោយឆ្នាំ ២០១៧ មានតម្លៃចាប់ពី ២១ ០៧៥ ដុល្លារ។ មានម៉ាស៊ីនស៊ីឡាំង ៤ ចំណុះ ១,៥ លីត្រ រួមជាមួយម៉ូទ័រអគ្គិសនីដែលអាចបង្កើតកម្លាំងសរុបបាន ៩៩ សេះ បើកក្នុងក្រុង ១០០ គ.ម ស៊ី ៤,៩ លីត្រ និងក្រៅក្រុង ១០០ គ.ម ស៊ី ៥,៤៧ លីត្រ។

Prius v

ប្រសិនបើចង់បានរថយន្ត Prius ដែលមានទំហំធំទូលាយ Prius v ជាជម្រើសមួយប្រសើរបំផុត។ វាមិនត្រឹមតែមានកន្លែងដាក់ឥវ៉ាន់បានច្រើនប៉ុណ្ណោះទេ តែថែមទាំងមានផ្ទៃខាងក្នុងធំទូលាយ អាចឲ្យអ្នកដំណើរអង្គុយបានដោយមានផាសុកភាព រួមជាមួយបច្ចេកវិទ្យាទំនើបៗជាច្រើន។

Prius v ស៊េរីចុងក្រោយឆ្នាំ ២០១៦ មានតម្លៃចាប់ពី ២៧ ៥៤០ ដុល្លារ ដែលមានម៉ាស៊ីនស៊ីឡាំង ៤ ចំណុះ ១,៨ លីត្រ អមនឹងម៉ូទ័រអគ្គិសនី បង្កើតកម្លាំងសរុបបាន ១៣៤ សេះ។ បើកក្នុងក្រុង ១០០ គ.ម ស៊ី ៥,៣៤ លីត្រ និងក្រៅក្រុង ១០០ គ.ម ស៊ី ៥,៨៨ លីត្រ។

Prius Prime

ចំណុចពិសេសរបស់ Prius Prime នេះ គឺអ្នកបើកបរអាចជ្រើសរើសការបើកដោយពឹងផ្អែកលើថាមពលអាគុយផ្ទាល់ ឬ បើកបរដោយប្រើប្រព័ន្ធម៉ាស៊ីន Hybrid។ សាកបំពេញម្ដងវាអាចធ្វើដំណើរបានចម្ងាយបាន ៤០ គ.ម។

Prius Prime ស៊េរី ២០១៧ មានតម្លៃចាប់ពី ២៧ ១០០ ដុល្លារ ប្រើម៉ាស៊ីនស៊ីឡាំង ៤ ចំណុះ ១,៨ លីត្រ។ ចំពោះការបើកបរដោយប្រើប្រព័ន្ធម៉ាស៊ីនក្នុងក្រុង ១០០ គ.ម ស៊ី ៤,២៧ លីត្រ និងក្រៅក្រុង ១០០ គ.ម ស៊ី ៤,៤៣ លីត្រ៕

ប្រភព៖ Advantage Toyota NY ប្រែសម្រួល៖ សុខហេង