កូនស្រីកើតជំងឺមហារីក ដំណាក់កាលចុងក្រោយ សុខចិត្តប្រាប់ឪពុកម្តាយ ឲ្យឈប់ព្យាបាលនាង ព្រោះហេតុផលរំជួលចិត្ត

2017-12-01 06:53:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងស្រីដែលកើតជំងឺធ្ងន់ធ្ងរម្នាក់ នៅក្នុងប្រទេសចិន បានសម្រេចចិត្តប្រាប់ឪពុកម្ដាយរបស់នាង ឲ្យឈប់ព្យាបាលនាង បន្ទាប់ពីពួកគេបានចំណាយប្រាក់សន្សំទាំងអស់ ទៅលើថ្លៃព្យាបាលរបស់នាង។

នាង Li Xiaoqing អង្គុយលើគ្រែ

ក្មេងស្រីអាយុ១៤ឆ្នាំ មានឈ្មោះថា Li Xiaoqing រូបនេះ បានប្រាប់ទៅកាន់ឪពុកម្ដាយដែលក្រីក្រ ទាំងទឹកភ្នែកថា «សូមមេត្តាបោះបង់ខ្ញុំទៅ។ ខ្ញុំមិនចង់ក្លាយជាបន្ទុករបស់ម៉ាក់ប៉ាឡើយ»។

បើយោងតាមប្រភពព័ត៌មាន បានឲ្យដឹងថា នាង Xiaoqing កើតមានជំងឺដុំសាច់ម្យ៉ាង ហៅថា Hepatoblastoma ដែលជាប្រភេទជំងឺមហារីកថ្លើមដ៏កម្រ កាលពីខែឧសភា ឆ្នាំ២០១៤។ បច្ចុប្បន្ន ជំងឺមហារីករបស់នាង បានឈានដល់ដំណាក់កាលចុងក្រោយហើយ។

នាង Xiaoqing និងក្រុមគ្រួសារមានដើមកំណើតមកទីក្រុង Puyang ខេត្ត Henan ប្រទេសចិន។ នាងរស់នៅជាមួយឪពុកម្ដាយ , បងប្រុស , ប្អូនស្រី និង ជីដូនរបស់នាងនៅកសិដ្ឋាន។ គ្រូពេទ្យមកពីមន្ទីរពេទ្យនៃទីក្រុង Puyang បាននិយាយថា ពួកគេមិនអាចព្យាបាលជំងឺរបស់នាង Xiaoqing បានឡើយ ដោយសារតែថ្នាំពេទ្យមានកំណត់។ ដូច្នេះពួកគេបានស្នើឲ្យក្រុមគ្រួសារនាង ស្វែងរកជំនួយផ្នែកវេជ្ជសាស្ត្រពីមន្ទីរពេទ្យ នៅទីក្រុងប៉េកាំងជំនួសវិញ។

ក្រោយមក ឪពុកម្ដាយរបស់ Xiaoqing បានសម្រេចចិត្តយក Xiaoqing ទៅកាន់ទីក្រុងប៉េកាំង ដែលមានចម្ងាយ ៥១០គីឡូម៉ែត្រ ឬត្រូវប្រើពេលធ្វើដំណើរ ចំនួន៥ម៉ោងទើបទៅដល់។ បន្ទាប់ពីទទួលបានការពិនិត្យ ក្រុមគ្រូពេទ្យនៅមន្ទីរពេទ្យ Beijing Children's Hospital បានស្នើឲ្យ Xiaoqing ទទួលការព្យាបាលដោយសារធាតុគីមីជាមុនសិន ព្រោះដុំសាច់របស់នាងធំពេក។ ទោះជាយ៉ាងណា ពួកគេនិយាយថា ការវះកាត់អាចធ្វើទៅបាន នៅពេលដុំសាច់របស់ Xiaoqing មានទំហំតូច។

ក្រោយពេលទទួលបានការណែនាំ ពួកគេបាននាំ Xiaqing ទៅព្យាបាលនៅមន្ទីរពេទ្យ People's Hospital ក្នុងទីក្រុង Puyang វិញ ដោយសារតែ ការព្យាបាលនៅទីក្រុងប៉េកាំងមានតម្លៃថ្លៃ។ ការធ្វើបែបនេះ ទើបពួកគេអាចមានលទ្ធភាពចេញថ្លៃព្យាបាលឲ្យកូនស្រី។

នាង Xiaoqing បានផ្អាកការសិក្សា ហើយទទួលការព្យាបាលដោយប្រើគីមី ចំនួន៥លើក ក្នុងរយៈពេលប៉ុន្មានខែជាប់គ្នា នៅក្នុងទីក្រុង Puyang។ គួរឲ្យសោកស្ដាយ ស្ថានភាពជំងឺរបស់នាងកាន់តែអាក្រក់ ហើយឪពុកម្ដាយរបស់នាង ត្រូវនាំនាងទៅទីក្រុងប៉េកាំងម្ដងទៀត ដើម្បីទទួលការព្យាបាលកម្រិតខ្ពស់។

ប្រភពព័ត៌មានបានអះអាងថា នាង Xiaoqing បានទទួលការព្យាបាលដោយគីមី រហូតដល់ទៅ ២០លើក ក្នុងចន្លោះខែវិច្ឆិកា ឆ្នាំ២០១៥ និង ខែវិច្ឆិកា ឆ្នាំ២០១៧។ គ្រួសាររបស់នាងបានចំណាយលើការព្យាបាល ដល់ទៅជិត៥ម៉ឺនដុល្លារហើយ។

យ៉ាងណាមិញ កាលពីថ្ងៃទី២១ ខែវិច្ឆិកា កន្លងទៅនេះ នាង Xiaoqing ក៏បានដឹងថា ស្ថានភាពជំងឺរបស់នាងមិនប្រសើរឡើយ ហើយនាងបានឆ្លងកាត់ការព្យាបាលដោយគីមីម្ដងទៀត។ ពេលនោះ នាងបានមើលឃើញគ្រួសាររបស់នាង ព្រួយបារម្ភ និងយំ ដោយសារតែពួកគេគ្មានប្រាក់ សម្រាប់បង់ថ្លៃព្យាបាលតទៅទៀត។

នាង Xiaoqing ក៏បានសម្រេចចិត្តប្រាប់ឪពុករបស់នាង ខណៈយំឱបម្ដាយ ថា «ប៉ា កូនមិនចង់ព្យាបាលទៀតទេ។ គ្រួសាររបស់យើងគ្មានប្រាក់ទៀតទេ។ បោះបង់ខ្ញុំចោលទៅ។ ខ្ញុំមិនចង់ក្លាយជាបន្ទុកអ្នកទាំង២ឡើយ។ គ្មានខ្ញុំ ម៉ាក់ប៉ានៅមានបងប្រុស និងប្អូនស្រីខ្ញុំទៀត»៕

ចុចអាន៖

ប្រភព៖ Dailymail ប្រែសម្រួល៖ សេង ឡុង