Selena Gomez ទទួលពាននារីឆ្នើមប្រចាំឆ្នាំ២០១៧ពី Billboard ទាំងទឹកភ្នែក

2017-12-01 08:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីយប់ថ្ងៃទី៣០ ខែវិច្ឆិកា ពានរង្វាន់នារីឆ្នើមប្រចាំឆ្នាំ២០១៧របស់ Billboard បានទៅលើតារាចម្រៀង Selena Gomez ហើយពាននេះត្រូវបានប្រកាសដោយមិត្តភក្តិជិតស្និទ្ធរបស់នាង ២រូប គឺ Elle Fanning និងFrancia Raisa។

អំឡុងពេលឡើងទទួលពានរង្វាន់ ក្នុងកម្មវិធី “Billboard‘s Women in Music” តារាចម្រៀងរូបនេះបាននិយាយទាំងទឹកភ្នែកថា៖ "និយាយតាមត្រង់ទៅចុះ ខ្ញុំគិតថា Francia គួរតែទទួលបានពានរង្វាន់នេះបានត្រូវ ព្រោះនាងបានសង្គ្រោះជីវិតរបស់ខ្ញុំ។ ខ្ញុំអរគុណដល់ក្រុមការងារនិងក្រុមគ្រួសាររបស់ខ្ញុំ ដែលពួកគេតែងតែនៅក្បែរខ្ញុំនៅពេលខ្ញុំមានការលំបាក"។

តារាវ័យ២៥ឆ្នាំនេះបានបន្ថែមទៀតថា៖ "ខ្ញុំពិតជាគោរពតំណែងរបស់ខ្ញុំក្នុងការងារនេះខ្លាំងណាស់។ ខ្ញុំចង់ឲ្យមនុស្សរាល់គ្នាដឹងថាខ្ញុំគោរពគោលការណ៍ដែលខ្ញុំមានជាខ្លាំង ខ្ញុំមិនដែលស្ងប់ស្ញែងអ្វីជាជាងក្លាយជានារីម្នាក់ដែលប្រចាំការងារផ្នែកនេះទេ។ ខ្ញុំពិតជាគោរព ដឹងគុណដល់រៀមច្បងចាស់ៗដែលបានជួយជ្រោមជ្រែងខ្ញុំកន្លងមក"។

តារាចម្រៀង Selena Gomez បានជាប់ឈ្មោះក្នុងតារាងពានរង្វាន់នារីឆ្នើមប្រចាំឆ្នាំ២០១៧រួមជាមួយតារាល្បីៗផ្សេងៗទៀតដូចជា Taylor Swift , Pink, Fergieនិង Beyoncé៕