លោក Perez ព្រលយថា Real Madrid នឹងជួយ Neymar ឲ្យឈ្នះ Ballon D'or

2017-12-08 12:15:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្លឹប Real Madrid លោក Florentino Perez ក្នុងថ្ងៃនេះ បាននិយាយថា Neymar នឹងមានលទ្ធភាពច្រើនក្នុងការឈ្នះពាន Ballon D'or បើកីឡាកររូបនេះសម្រេចមកចូលរួមក្លឹបរបស់លោក។

ពេលសារព័ត៌មានអេស្ប៉ាញ Marca សួរទាក់ទងនឹង Neymar លោក Perez បាននិយាយថា៖ "ការលេងឲ្យ Real Madrid នឹងជួយឲ្យគេ ( Neymar )មានភាពងាយស្រួលច្រើនក្នុងការឈ្នះពាន Ballon D'or"។ លោកប្រធានក្លឹប Real Madrid រូបនេះ បានបន្តទៀតថា៖ “Real Madrid គឺជាក្លឹបមួយដែលអាចផ្ដល់អ្វីៗគ្រប់យ៉ាងឲ្យគេ ដើម្បីក្លាយជាកំពូលកីឡាករមួយរូប។ នរណាក៏ដឹងដែរថា ខ្ញុំចង់បានគេ ម្ដងរួចហើយកាលពីមុន"។

តាមពិតទៅ Neymar ស្ទើរតែចូលរួមជាមួយ Real Madrid ប៉ុន្មានដងរួចទៅហើយ មុនសម្រេចមកចូលរួមជាមួយ Barcelona កាលពីឆ្នាំ ២០១៣។ កាលពីឆ្នាំ ២០០៥ កីឡាកររូបនេះ បានទៅហាត់ក្នុងក្លឹបយុវជនឲ្យក្លឹបយក្សអេស្ប៉ាញមួយនេះ និងស្ទើរតែចូលរួមជាមួយក្លឹបទៅហើយ តែចុងក្រោយ Neymar នៅស្ទាក់ស្ទើរចិត្ត ដោយសារនៅវ័យក្មេងផង ដូច្នេះក៏សម្រេចនៅបន្តលេងឲ្យក្លឹបនៅប្រេស៊ីលសិន។ នៅឆ្នាំ ២០១១ ខ្សែប្រយុទ្ធប្រេស៊ីលរូបនេះ បានទាំងទៅពិនិត្យសុខភាពនៅ Real Madrid រួចហៀបនឹងចុះកុងត្រាជាមួយក្លឹបទៅហើយ តែលោក Perez នៅពេលនោះ គិតថាមិនអាចទៅរួច ហើយក៏សម្រេចចោលលុបចោលការផ្ទេរនេះទៅវិញ។

នៅឆ្នាំ ២០១៣ Neymar បានចូលរួមជាមួយ Barcelona ដែលក្លឹបគូប្រជែងសំខាន់របស់ Real Madrid។ នៅទីនោះ Neymar បានអភិវឌ្ឍខ្លួនរហូតក្លាយជាកីឡាករដ៏ឆ្នើមមួយរូប ដែលពិភពលោកទទួលស្គាល់។ នៅបានបួនឆ្នាំ កីឡាករប្រេស៊ីលរូបនេះ សម្រេចចាកចេញពី ក្លឹបអ្នកមានបុណ្យ ទៅ PSG ក្នុងការផ្ទេរដ៏ថ្លៃបំផុតក្នុងកំណត់ត្រាបាល់ទាត់៕

ប្រភព៖ Goal | Marca ប្រែសម្រួល៖ ហ៊ីម រស្មី