Mourinho ថាបើខ្លួនហ៊ានធ្វើរឿងមួយដូច Pep នោះ FA នឹងពិន័យភ្លាម

2017-12-09 01:59:38
ចំនួនមតិ 0 | ចំនួនចែករំលែក 0

ចន្លោះមិនឃើញ

Jose Mourinho គិតថារូបលោកនឹងត្រូវ FA ពិន័យភ្លាមបើហ៊ានពាក់សញ្ញាពាក់ព័ន្ធនឹងនយោបាយលើអាវ ហើយឈរបញ្ជាកូនក្រុមដូច Pep Guardiola។

Mourinho

Guardiola ថ្មីៗនេះបានពាក់ខ្សែបូពណ៌លឿងនៅលើអាវ ជាសារប្រឆាំងនឹងការដាក់គុកអ្នកនយោបាយកាតាឡាន់។ ក្រៅពីនោះអតីតអ្នកចាត់ការ Barcelona និង Bayern ក៏បានផ្ញើជ័យជម្នះលើ Napoli កាលពីខែមុនដល់ក្រុមអ្នកតស៊ូទាមទារឯករាជ្យផងដែរ។

ពាក់ព័ន្ធនឹងបញ្ហាខាងលើ Mourinho បានប្រតិកម្មថា ការនយោបាយមិនត្រូវអនុញ្ញាតឲ្យប្រើលើទីលានបាល់ទាត់ទេ។ បុរសសញ្ជាតិព័រទុយហ្គាល់និយាយថា៖ "បើខ្ញុំជាអ្នកពាក់សារនយោបាយបែបនេះវិញនោះគេនឹងពិន័យភ្លាម"។

គួររម្លឹកថា Guardiola ដែលកើតនៅតំបន់កាតាឡាន់បានពាក់ខ្សែបូពណ៌លឿងប្រឆាំងនឹងការចាប់មន្ត្រីរដ្ឋាភិបាល៨នាក់ពីបទពាក់ព័ន្ធនឹងសកម្មភាពទាមទារឯករាជ្យរបស់ក្រុមអ្នកតវ៉ាកាលពី ថ្ងៃទី១ ខែតុលា។

កាលពី១៨ឆ្នាំមុន UEFAបានពិន័យ Robbie Fowler ខ្សែប្រយុទ្ធ Liverpool ចំនួន៩០០ផោនដោយសារបង្ហាញអាវយឺតប្រឆាំងនឹងការបណ្ដេញកម្មករលីសែងនៅក្នុងទីក្រុង។ ករណីផ្សេងទៀតក្រុមអង់គ្លេស, ស្កុតឡែន, វែល និងអៀរឡង់ខាងជើង ក៏ធ្លាប់ពិន័យព្រោះពាក់ផ្កាអាភៀនលើអាវកាន់ទុក្ខអ្នកស្លាប់ក្នុងសង្គ្រាមលោកផងដែរ៕