ផលិតករបរទេសមិនតិចនោះទេ មកថតនៅស្រុកខ្មែរប៉ុន្មានឆ្នាំមកនេះ

2017-12-14 07:09:11
ចំនួនមតិ 0 | ចំនួនចែករំលែក 0

ចន្លោះមិនឃើញ

មានផលិតករភាពយន្ត ផលិតករឯកសារ និងផលិតករទូរទស្សន៍បរទេស មិនតិចនោះទេ បានមកថតនៅក្នុងប្រទេសកម្ពុជា ដែលចំនួននោះមានការកើនឡើងជារៀងរាល់ឆ្នាំ នេះបើតាមការឲ្យដឹងពីលោក ជៀប សុវិជ្ជា នាយកមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តនៅកម្ពុជា(CFC)។

លោក ជៀប សុវិជ្ជា បានថ្លែងឲ្យដឹងបែបនេះ គ្រាដែលលោកបានចូលរួមក្នុងសន្និសីទកាសែតកាលពីពេលថ្មីៗនេះនៅនាយដ្ឋានភាពយន្ត ដែលប្រទេសកម្ពុជាបានទទួលពានរង្វាន់ «ទីតាំងថតភាពយន្តលេចធ្លោប្រចាំឆ្នាំ២០១៧ ឬ Emergin Film Shooting Location of The Year 2017» ពីប្រទេសឥណ្ឌា ។ លោកបានរៀបរាប់ឲ្យដឹងថា ចាប់តាំងពីឆ្នាំ ២០០៩ ដែលមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តនៅកម្ពុជា(CFC) បង្កើតមក ស្ថាប័នរបស់លោកបានទទួលផលិតករភាពយន្ត ផលិតករឯកសារ និង ផលិតករទូរទស្សន៍បរទេស មកថតនៅក្នុងប្រទេសកម្ពុជាជាបន្តបន្ទាប់ក្នុងនោះ៖

នៅឆ្នាំ ២០០៩ មាន១៥ គម្រោង។
នៅឆ្នាំ ២០១០ មាន៤៣គម្រោង។ នៅឆ្នាំ២០១១ មាន៤៩គម្រោង។ នៅឆ្នាំ ២០១២ មាន ៥៥គម្រោង។ នៅឆ្នាំ២០១៣ ៤៩គម្រោង។ នៅឆ្នាំ២០១៤ មាន៣៤គម្រោង។ នៅឆ្នាំ២០១៥មាន៦៩ គម្រោង។
នៅឆ្នាំ ២០១៦ មាន១១២គម្រោង។ នៅឆ្នាំ២០១៧ ក្នុងឆមាសទី១ មាន៥១ គម្រោង ក្នុងនោះ មានរឿងហូលីវូដ៣ ថតឯកសារ១៩ និង កម្មវិធីទូរទស្សន៍២៥។

នាយកមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តខាងលើបានបន្ថែមឲ្យដឹងទៀតថា នៅឆ្នាំ២០១៦ គឺជាឆ្នាំដែលស្ថាប័នរបស់លោកធ្វើការច្រើនជាងគេ ក្នុង១១២គម្រោងនោះ CFC បានដើរតួយ៉ាងសំខាន់ ក្នុងសម្រួលការថតភាពយន្តហូលីវូដ រឿង «មុនដំបូងខ្មែរក្រហមសម្លាប់ប៉ារបស់ខ្ញុំ»។ ឆ្លងតាមបទពិសោធជាមួយផលិតករបរទេសជាច្រើនដូចជា សម្រួលការថតភាពយន្តហូលីវូដ រឿង«មុនដំបូងខ្មែរក្រហមសម្លាប់ប៉ារបស់ខ្ញុំ» ហើយថ្មីៗនេះប្រទេសកម្ពុជា ទើបតែទទួលបានពានរង្វាន់ «ទីតាំងថតភាពយន្តលេចធ្លោប្រចាំឆ្នាំ២០១៧» ពីមហោស្រពភាពយន្តឥណ្ឌា ឬ Indywood Film Carnival នៃក្រុងHyderabad ប្រទេសឥណ្ឌាផងនោះ លោកមានសុទិដ្ឋិនិយមថា ប្រទេសកម្ពុជា នឹងទទួលគម្រោងភាពយន្ត Bollywood មកកាន់ប្រទេសកម្ពុជាយើងកាន់តែច្រើនថែមទៀតក្នុងពេលឆាប់ៗនេះ។

មជ្ឈមណ្ឌលបណ្ដុះបណ្ដាលជំនាញនិងទទួលថតភាពយន្តនៅកម្ពុជា(CFC) ជាស្ថាប័នដែលមានការទទួលស្គាល់ និងគាំទ្រពីក្រសួងវិចិត្រសិល្បៈបង្កើតឡើងនៅឆ្នាំ ២០០៩ ។ ស្ថាប័នមួយនេះមានគោលបំណងក្នុងផ្សព្វផ្សាយប្រទេសកម្ពុជាជាទីតាំងសម្រាប់ថតភាពយន្ត ដល់ផលិតករបរទេស រួមជាមួយគ្នានោះដែរ ក៏មានតួនាទីពង្រឹងវិស័យភាពយន្តក្នុងស្រុកផងដែរ។ ក្នុងនោះដែរCFC ក៏មានបានរៀបចំវគ្គបណ្ដុះបណ្ដាលជំនាញផ្សេងៗ ដើម្បីជាការគាំទ្រដល់ផលិតករភាពយន្តកម្ពុជាវ័យក្មេងឲ្យពួកគេមានសមត្ថភាព ដើម្បីប្រកួតប្រជែងលក្ខណអន្តរជាតិផងដែរ៕

អត្ថបទ៖ ដេត ធន្នី