អភិបាលខេត្តកំពតរៀបរាប់ពីប្រយោជន៍ដែល វឌ្ឍនាកា ទទួលបាននៅក្រៅស្រុក
- 2017-12-15 23:06:00
- ចំនួនមតិ 0 | ចំនួនចែករំលែក 0
អភិបាលខេត្តកំពតរៀបរាប់ពីប្រយោជន៍ដែល វឌ្ឍនាកា ទទួលបាននៅក្រៅស្រុក
ចន្លោះមិនឃើញ
ឯកឧត្តមអភិបាលខេត្តកំពតពេញចិត្តដែលបានឃើញកូនប្រុស ចាន់ វឌ្ឍនាកាទទួលបានឱកាសចេញទៅប្រកបអាជីពនៅក្រៅប្រទេស ពីព្រោះបាននាំអត្ថបទប្រយោជន៍ច្រើនដល់ខ្លួនឯង គ្រួសារ និងវិស័យកីឡានៅកម្ពុជា។
ពេលទៅទទួលកូនប្រុសនៅអាកាសយានដ្ឋានអន្តរជាតិភ្នំពេញ ឯកឧត្តម ចាន់ ចេស្តាបានរៀបរាប់ថា រាល់ការសម្រេចចិត្តចេញទៅលេងនៅក្រៅប្រទេសរបស់ ចាន់ វឌ្ឍនាកាទទួលបានការគាំទ្រពីប្រមុខដឹកនាំប្រទេសគឺសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្តមសូមអរគុណដល់សម្តេចនាយករដ្ឋមន្ត្រីដែលតែងតែគាំទ្រ និងអរគុណដល់សហព័ន្ធបាល់ទាត់កម្ពុជា។
ឯកឧត្តមបានរៀបរាប់ថា ការចេញទៅលេងនៅក្រៅប្រទេសនេះ ចាន់ វឌ្ឍនាកាទទួលបានអត្ថប្រយោជន៍ច្រើនសម្រាប់ខ្លួនឯង និងសង្គមជាតិ។ ទីមួយរូបគេទទួលបានបទពិសោធថ្មីៗដើម្បីអភិវឌ្ឍខ្លួន និងជួយដល់វិស័យបាល់ទាត់កម្ពុជា។ ទី២ រូបគេជួយធ្វើឲ្យវិស័យបាល់ទាត់កម្ពុជាកាន់តែមានមុខមាត់ និងកិត្តិយសនៅលើឆាកអន្តរជាតិ។ ទី៣ រូបគេក៏ទទួលបានប្រាក់ចំណូលសមរម្យដើម្បីខ្លួនឯង និងក្រុមគ្រួសារ។
សម្រាប់ការទៅលេងនៅជប៉ុនមួយរដូវកាលកន្លងមក ឯកឧត្តមបានសង្កេតឃើញថា ចាន់ វឌ្ឍនាកាមានការរីកចម្រើនច្រើនតាមរយៈកម្លាំងកាយ កម្លាំងប្រាជ្ញាស្មារតី និងបច្ចេកទេសកាន់តែល្អប្រសើរ។ ជាពិសេសទៀតនោះ រូបគេបានយល់ដឹងកាន់តែជ្រាលជ្រៅអំពីរបៀបនៃការរស់នៅក្នុងសង្គម។
ប្រភពព័ត៌មានទុកចិត្តបានឲ្យដឹងថា ការចុះកុងត្រានៅក្លឹបកំពូលម៉ាឡេស៊ី ចាន់ វឌ្ឍនាកា ទទួលបានតម្លៃខ្លួនអាចជា ១៥០០០ដុល្លារអាមេរិកឯណោះ។ បន្ទាប់ពីធ្វើដំណើរទៅកាន់ទឹកដីប្រទេសម៉ាឡេស៊ីកាលពីព្រឹកថ្ងៃព្រហស្បតិ៍ទី១៤ ខែធ្នូម្សិលមិញ តារាបាល់ទាត់កម្ពុជា ចាន់ វឌ្ឍនាកា បានចុះកុងត្រាជាផ្លូវការកាលពីម្សិលមិញជាមួយក្លឹបថ្មី PAHANG FA រយៈពេល១រដូវកាល៕