KaKa អតីតកីឡាឆ្នើមជម្រើសជាតិប្រេស៊ីលប្រកាសចូលនិវត្តន៍

2017-12-18 02:46:49
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករឆ្នើមប្រេស៊ីល ឈ្មោះពេញ Ricardo Izecson dos Santos Leite ដែលគ្រប់គ្នាស្គាល់ថា KaKaនោះ បានប្រកាសចូលនិវត្តន៍ពីពិភពបាល់ទាត់ហើយ ក្នុងវ័យ៣៥ឆ្នាំ។

KaKa បានចំណាយពេលសម្រាប់រដូវកាលចុងក្រោយរបស់ខ្លួនលេងនៅលីគអាមេរិក MLS ជាមួយក្រុម Orlando City។ អតីតជម្រើសជាតិប្រេស៊ីលរូបនេះលេងប្រកួតចុងក្រោយបង្អោះទល់នឹងក្រុម Colombus Crew កាលពីខែ តុលាឆ្នាំនេះ គ្រានោះ Orlando City ចាញ់ ១-០។

ដំណឹងនៃការចូលនិវត្តន៍នេះអតីតកីឡាករ AC Milan បានប្រកាសនៅលើបណ្ដាញសង្គម Twiltter ផ្លូវការរបស់ខ្លួន។ KaKa ចាប់ផ្ដើមអាជីពលេងបាល់ដំបូងក្នុងឆ្នាំ២០០១ ជាមួយក្រុមក្នុងស្រុកកំណើត Sao Paulo។ ឆ្នាំ២០០៣ក៏បានផ្លាស់មក AC Milan ក្នុងប្រទេសអ៊ីតាលីដែលជាកន្លែងធ្វើឲ្យពិភពលោកស្គាល់រូបគេ។ លេងនៅទីនោះបាន៦ឆ្នាំ បុរសសង្ហារូបនេះក៏បានផ្លាស់មកក្លឹបយក្ស Real Madrid ក្នុងតម្លៃខ្លួន៦៨,៥លានអឺរ៉ូក្នុងឆ្នាំ២០០៩។ បន្ទាប់មកឆ្នាំ២០១៣ ក៏បានត្រលប់ទៅ AC Milan វិញ មុនពេលទៅលេងឲ្យ Sao Paulo មួយរយៈនាឆ្នាំ២០១៤។ ចុងក្រោយ២០១៤ដល់២០១៧ KaKa លេងនៅ Orlando City រហូតចប់អាជីព។

និយាយពីសមិទ្ធផលខ្សែប្រយុទ្ធជំនាញជើងស្ដាំបានជួយក្រុម ប្រទេសនិងខ្លួនឈ្នះពានជាច្រើនដូចជា នាំប្រេស៊ីលលើកពាន World Cup ២០០២ ជួយ Milanឈ្នះ Serie A, Italian super cup និង Champions League ជាដើម។ ចំណែកអំឡុងពេលនៅ Madrid គេបាននាំក្រុមលើកពាន La Liga និង Spanish cup។ ចំពោះពានរង្វាន់ផ្ទាល់ខ្លួនដែលទទួលបានមាន FIFA Ballon d'Or ២០០៧ និង UEFA best player in Europe ២០០៧៕