ខ្លាំងបាត់! ក្រុមហ៊ុនចិន Geely ចង់ទិញភាគហ៊ុនរបស់មេ Mercedes
- 2017-12-18 11:57:45
- ចំនួនមតិ 0 | ចំនួនចែករំលែក 0
ខ្លាំងបាត់! ក្រុមហ៊ុនចិន Geely ចង់ទិញភាគហ៊ុនរបស់មេ Mercedes
ចន្លោះមិនឃើញ
ក្រុមហ៊ុនចិន Geely បានបង្ហាញមហិច្ចតារបស់ខ្លួនទិញយកភាគហ៊ុន Daimler ក្រុមហ៊ុនមេរបស់ Mercedes បន្ទាប់ពីក្រុមហ៊ុនបង្កើតតាំងពី៣១ឆ្នាំមុនទិញបានភាគហ៊ុនរបស់ក្រុមហ៊ុន Terrafugia (ផលិតរថយន្តហោះ), Lotus និងភាគហ៊ុនមួយផ្នែករបស់ Proton ។
ទូរទស្សន៍គ្រប់គ្រងដោយរដ្ឋ China Central Television បានរាយការណ៍ថា Geely ដែលបច្ចុប្បន្នគ្រប់គ្រងក្រុមហ៊ុនរថយន្ត Volvo និងក្រុមហ៊ុន Lynk & Co គ្រោងនឹងទិញភាគហ៊ុនចន្លោះពី ៣% ទៅ ៥% ពីក្រុមហ៊ុនមេ Daimler របស់ Mercedes ក្នុងកិច្ចព្រមព្រៀងមួយដែលមានតម្លៃប្រហែល ៤,៧ ប៊ីលានដុល្លារហើយបើសិនកិច្ចចរចារទៅយ៉ាងរលូននោះមានន័យថា Geely នឹងក្លាយជាម្ចាស់ភាគហ៊ុនធំជាងគេលំដាប់ទីពីររបស់ Daimler ហើយក្រុមហ៊ុននឹងនាំមុខ Renault Nissan Mitsubishi Alliance ដែលកាន់កាប់ភាគហ៊ុន ៣,១% ។ ចំណែកម្ចាស់ភាគហ៊ុនធំបំផុតគឺប្រទេស គូវ៉ែតមាន ៦,៨% ហើយភាគហ៊ុននៅសេសសល់គ្រប់គ្រងដោយបណ្តាវិនិយោគិនរដ្ឋនិងឯកជន ។
Geely កំពុងសម្លឹងមើលការប្រើប្រាស់បច្ចេកវិទ្យារបស់ Daimler ក៏ដូចជាការបង្កើតក្រុមហ៊ុនបណ្តាក់ទុនរួមគ្នាផលិតរថយន្តអគ្គិសនីក្នុងប្រទេសចិនខណៈ Daimler បានបង្កើតក្រុមហ៊ុនជាមួយក្រុមហ៊ុនចិន BYD កាលពីឆ្នាំ ២០១២ ដែលវានឹងទទួលខុសត្រូវសម្រាប់ផលិតម៉ាករថយន្តអគ្គិសនី Denza ។ យ៉ាងណាមិញសារព័ត៌មាន Reuters ឱ្យដឹងកាលពីខែវិច្ឆិកាថា Daimler បានទាត់ចោលសំណើរសុំទិញភាគហ៊ុន ៥%ពី Geely នៅចំណុចតថ្លៃមួយដែលអាចធ្វើឱ្យភាគហ៊ុនរបស់ម្ចាស់ភាគហ៊ុនដែលមានស្រាប់ធ្លាក់ចុះតែ Daimler ប្រាប់ Geely ថា ខ្លួនអាចទិញភាគហ៊ុនក្នុងទីផ្សារបើកចំហរបាន ។
គួរបញ្ជាក់ថា Geely ក៏ដូចជាក្រុមហ៊ុនរថយន្តដទៃទៀតក្នុងប្រទេសចិនស្ថិតក្រោមសម្ពាធក្នុងការផលិតរថយន្តអគ្គិសនីឬត្រូវបានគេស្គាល់ថាជា "រថយន្តថាមពលថ្មី" នៅក្នុងតំបន់ដើម្បីបំពេញតាមស្តង់ដារថ្មីដែលចេញដោយរដ្ឋាភិបាល ។ ស្តង់ដារទាំងនោះរួមមានគោលដៅសម្រាប់រថយន្តអគ្គិសនីផលិតឱ្យបានយ៉ាងហោចណាស់មួយភាគប្រាំនៃការលក់រថយន្តនៅឆ្នាំ ២០២៥ ជាមួយនឹងប្រព័ន្ធកូតាដោយចាប់ផ្តើមនៅដើមឆ្នាំ ២០១៨ ខាងមុខ ។ លើសពីនេះទៅទៀតក្រុមហ៊ុនផលិតរថយន្តធំៗត្រូវតែផលិតរថយន្តអគ្គិសនីយ៉ាងតិចណាស់ ១ គ្រឿងសម្រាប់លក់នៅឆ្នាំ ២០១៩ ខណៈប្រទេសចិនកំពុងពិចារណាលើការហាមឃាត់ទាំងស្រុងរថយន្តប្រើសាំង និងម៉ាស៊ូត ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
