Alba ស្វាគមន៍ដៃពីរ បើ Griezmann មក Barca មែន
- 2017-12-18 13:35:15
- ចំនួនមតិ 0 | ចំនួនចែករំលែក 0
Alba ស្វាគមន៍ដៃពីរ បើ Griezmann មក Barca មែន
ចន្លោះមិនឃើញ
ខ្សែការពារស្លាបឆ្វេង Jordi Alba កាលពីពេលថ្មីៗនេះបាននិយាយថា ខ្លួនស្វាគមន៍បើកីឡាករបារាំង Antoine Griezmann ចាកចេញពី Atletico Madrid មកចូលរួមជាមួយ Barcelona មែន។
Alba បាននិយាយប្រាប់ Onda Cero ថា៖ "គេ (Griezmann) គឺជាកីឡាករមួយដ៏កំពូល ដែលលេងបានយ៉ាងល្អណាស់នៅក្លឹប Atletico ប៉ុន្មានឆ្នាំចុងក្រោយនេះ។ អ៊ីចឹងបើគេមកចូលរួមជាមួយយើងមែន ខ្ញុំស្វាគមន៍ណាស់"។ ខ្សែការពារអេស្ប៉ាញរូបនេះបានបន្តទៀតថា៖ "ប៉ុន្តែ ក្រុមយើងបច្ចុប្បន្នក៏មិនណយដែរ យើងលេងបានល្អណាស់ក្នុងពេលឥឡូវហ្នឹង។ យើងនឹងចាំមើលទាំងអស់គ្នាថាតើនឹងមានអីកើតឡើងក្នុងទីផ្សារដោះដូរកីឡាករខាងមុខ"។
ការថ្លែងរបស់ Alba ធ្វើឡើងបន្ទាប់ពីមានសារព័ត៌មានអេស្ប៉ាញជាច្រើនរាយការណ៍ថា ប្រធានក្លឹបអ្នកមានបុណ្យ Josep Maria Bartomeu បានធ្វើការជួបគ្នាជាមួយក្រុមគ្រួសាររបស់ Griezmann កាលពីពេលថ្មីៗនេះ។ អ្វីដែលគួរឲ្យកត់សម្គាល់នោះ គឺរបាយការណ៍ទាំងអស់នេះ លេចឡើងបន្ទាប់ពីអ្នកចាត់ការ Atletico លោក Diego Simeone កាលពីសប្ដាហ៍មុន បាននិយាយថា Griezmann អាចចេញពីក្លឹបបាន បើសិនជាចង់។
Antoine Griezmann បានមកចូលរួមជាមួយក្លឹប Atletico ពី Real Sociedad កាលពីឆ្នាំ ២០១៤ ហើយបានអភិវឌ្ឍខ្លួនរហូតក្លាយជាកីឡាករដ៏ល្អមួយរូបក្នុងលោក។ កន្លងមក ពាក្យចចាមអារាមជាច្រើនបានលេចឡើងថា Griezmann នឹងចូលរួម Manchester United នៅរដូវកាលក្រោយ។ ទោះជាយ៉ាង មួយរយៈចុងក្រោយនេះ មានរបាយការណ៍ជាច្រើនដែលថា កីឡាករវ័យ ២៦ឆ្នាំរូបនេះ អាចទៅចូលរួមជាមួយBarcelona ទៅវិញ៕