​សប្ដាហ៍​មុន​រដ្ឋាភិបាល​ប្រទេស​ឥណ្ឌា​បាន​ប្រកាស​ពី​ការ​ដំឡើង​ពន្ធ​លើ​ការ​នាំ​ចូល​ ដែល​បាន​ធ្វើ​ឲ្យ​ប៉ះពាល់​ដល់​តម្លៃ​ iPhone លក់​ក្នុង​​ទីផ្សារ​ស្មាតហ្វូន​ធំ​លំដាប់​ទី​ពីរ​នេះ។

ឆ្លើយ​តប​នឹង​ការ​ដំឡើង​ពន្ធ​ ក្រុមហ៊ុន​ Apple ​បាន​ដំឡើង​ថ្លៃ​ iPhone គ្រប់​ម៉ូដែល​ជា​មធ្យម​ ៣,៥%​ លើក​លែង​តែ​ iPhone SE ដែល​មាន​​ដំឡើង​​នៅ​ឥណ្ឌា។ ការ​ធ្វើ​ដូច​នេះ​ បណ្ដាល​ឲ្យ​ iPhone X កាន់​តែ​មាន​តម្លៃ​ថ្លៃ​ ដោយ​បច្ចុប្បន្ន​ iPhone X ទំហំ​ ២៥៦ GB មាន​តម្លៃ​ប្រហែល​ ១ ៦៤៦ ដុល្លារ។ ចំណែក​ iPhone 8 ទំហំ​ ២៥៦ GB មាន​តម្លៃ​​ប្រហែល​ ១ ២៣០ ដុល្លារ។

គួរ​ដឹង​ថា​ពន្ធ​នាំ​ចូល​លើ​ស្មាតហ្វូន​បាន​ឡើង​ពី​ ១០% ដល់​ ១៥% ដើម្បី​លើក​ទឹក​ចិត្ត​ដល់​​សង្វាក់​ផលិតកម្ម​ក្នុង​ស្រុក។ Apple រងគ្រោះ​ខ្លាំង​ជាង​គេ​ពី​ការ​ដំឡើង​ពន្ធ​នេះ​ ព្រោះ​មាន​តែ​ iPhone SE ប៉ុណ្ណោះ​មាន​ដំឡើង​ក្នុង​ប្រទេស​នេះ ស្រប​ពេល​ដែល​ Samsung ជា​គូ​ប្រជែង​ មាន​រោងចក្រ​ដំឡើង​ទូរសព្ទ​ស្ទើរ​គ្រប់​ម៉ូដែល​នៅ​ប្រទេស​ឥណ្ឌា។

កន្លង​មក​ Apple ធ្លាប់​បង្ហាញ​គោល​បំណង​ក្នុង​ការ​ពង្រីក​សង្វាក់​ផលិតកម្ម​នៅ​ប្រទេស​ឥណ្ឌា​ ប៉ុន្តែ​បាន​និយាយ​ថា​ការ​បង្កើត​សង្វាក់​ផលិតកម្ម​ក្នុង​ស្រុក​ ត្រូវ​ការ​ពេល​វេលា៕ ​​​

ប្រភព៖ 9to5Mac   ប្រែ​សម្រួល៖ សុខហេង