ផ្សារទេសចរណ៍លក់ផលិតផលខ្មែរចម្រុះដំបូងនៅកម្ពុជា លេចរូបរាងជាផ្លូវការ

2017-12-19 06:58:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនសូរិយា សេនធ័រ ភ័នធ៍ ចំណាយទុនប្រមាណ ៥លានដុល្លារ កែប្រែមុខមាត់ផ្សារទំនើបសូរិយាឡើងវិញ និងដំណើរការផ្សារទេសចរណ៍ខ្មែរថ្មីដំបូងនៅកម្ពុជាជាផ្លូវការនាព្រឹកថ្ងៃទី ១៩ ធ្នូ ឆ្នាំ ២០១៧។

ផ្សារទេសចរណ៍ខ្មែr ឬឈ្មោះថា The Bazaar ត្រូវបានសង់ឡើងនៅជាន់ទី៤នៃផ្សារទំនើបសូរិយា ដោយមានសំណង់ស្ថាបត្យកម្មល្បីៗ និងអគារបុរាណប្រមាណ ១០អគារ ប្រមូលផ្ដុំគ្នាលើទីធ្លាប្រហែលជាង១ពាន់ម៉ែត្រការ៉េ។ សំណង់ស្ថាបត្យកម្មទាំងនោះ មានដូចជា មហោស្រពចតុមុខ ស្ថានីយប៉ុស្តិ៍បូលីស វិមានឯករជ្យ ផ្សារថ្មី ស្តាតអូឡាំពិក សារមន្ទីរជាតិ អគារធនាគារចាស់ និង សំណង់អគារបារាំងជាដើម។

អគារទាំងនោះ សុទ្ធតែជាកំពូលស្ថាបត្យកម្មល្បីៗរបស់ខ្មែរធ្លាប់ផុសឡើងនៅកណ្ដាលរាជធានីភ្នំពេញកាលពីសតវត្សន៍ទី៦០ ប៉ុន្តែសព្វថ្ងៃសំណង់ឯកជនប្រភេទនេះមួយចំនួនត្រូវបានបាត់បង់ទៅហើយ នៅឡើយតែសំណង់ចាស់ៗរបស់រដ្ឋប៉ុណ្ណោះ។

លោកឧកញ៉ា ពង្ស ខៀវសែ ប្រធានក្រុមប្រឹក្សាភិបាលនៃសូរិយា សេនធ័រ ភ័នធ៍ បានឲ្យដឹងថា ការកែប្រែមុខមាត់ថ្មីនៃផ្សារទំនើបសូរិយា ថែមទាំងបង្កើតផ្សារទេសចរណ៍ខ្មែរដោយបញ្ជូលស្នាដៃស្ថាបត្យកម្មខ្មែរនេះ គឺដើម្បីទាក់ទាញភ្ញៀវទេសចរ និងគាំទ្រផលិតផលខ្មែរ។

(លោកឧកញ៉ា ពង្ស ខៀវសែ ប្រធានក្រុមប្រឹក្សាភិបាលនៃសូរិយា សេនធ័រ ភ័នធ៍)

លោកស្រី ជា សុខហៀក នាយកប្រតិបត្តិនៃសូរិយា សេនធ័រ ភ័នធ៍ បានបញ្ជាក់យ៉ាងច្បាស់ថា នៅក្នុងផ្សារទេសចរណ៍ មានផលិតផលខ្មែរស្ទើរទាំងអស់ និងមានតម្លៃសមរម្យ។ លោកស្រីបន្ថែមទៀតថា ដើម្បីអបអរដល់ការបើកសម្ពោធថ្មីនេះ ក៏មានផ្ដល់នូវកម្មវិធី លក់ លាងឃ្លាំង ដែលមានការបញ្ចុះតម្លៃរហូតដល់ ៧០%៕