ផ្ទុះការលើកឡើងថា បើក្រសួងអប់រំស្រង់ពិន្ទុខុសមែន លទ្ធផលបាក់ឌុបនឹងប្រែប្រួលទូទាំងប្រទេស
- 2018-09-11 03:32:19
- ចំនួនមតិ 0 | ចំនួនចែករំលែក 0
ផ្ទុះការលើកឡើងថា បើក្រសួងអប់រំស្រង់ពិន្ទុខុសមែន លទ្ធផលបាក់ឌុបនឹងប្រែប្រួលទូទាំងប្រទេស
ចន្លោះមិនឃើញ
បើរកឃើញកំហុសបច្ចេកទេស ដូចជាបញ្ជូលពិន្ទុខុស ច្រលំ បញ្ហា Error System ឬ Database លទ្ធផលបាក់ឌុបនឹងប្រែប្រួលទូទាំងប្រទេស ចំនួនភាគរយជាប់ក៏ប្រប្រួល ចំនួនសិស្សនិទ្ទេស A, B, C, D, E ក៏នឹងប្រែប្រួលដែរ។ នេះបើតាមការលើកឡើងពីអ្នកសង្កេតការណ៍ (ACU) ម្នាក់សុំមិនបញ្ចេញឈ្មោះ។
បេក្ខជនដែលជាអ្នកប្រឡង ក៏ដូចជាលោកគ្រូអ្នកគ្រូ មួយចំនួនធំបានលើកឡើងនៅលើបណ្ដាញសង្គមថា កំហុសនៃការកែវិញ្ញាសាដូចទៅមិនរួចទេ ព្រោះមានការកែ ត្រួតពិនិត្យកិច្ចការសិស្សម្នាក់ច្រើនគ្នា បើបានពិន្ទុខ្ពស់ក៏ត្រួតពិនិត្យឡើងវិញ បើបានពិន្ទុតិចពេកក៏ត្រួតពិនិត្យឡើងវិញដែរ ហើយមាន ACU នៅជាមួយជានិច្ច។
មន្ត្រី ACU លើកឡើងថា អ្វីដែលគួរឲ្យកត់សំគាល់គឺក្នុងថ្ងៃបញ្ចូលពិន្ទុចូលប្រព័ន្ធកុំព្យូទ័រ មានការធ្វើកោសល្យវិច័យលើសន្លឹក MCS រាប់ពាន់សន្លឹក ស្មើនឹងចំនួនសិស្សរាប់ពាន់នាក់ដែរ ពេលនោះប្រាកដជាមានបញ្ហា។
ដោយឡែកក្រសួងអប់រំ បានបញ្ជាក់ថា សិស្សបាក់ឌុបប្រឡងឆ្នាំ ២០១៨ ដឹងលទ្ធផលរួចហើយ តែកើតទុក្ខមិនសុខចិត្តនូវលទ្ធផលប្រឡងធ្លាក់មុខវិជ្ជាគណិត ឬមុខវិជ្ជាដទៃទៀតនោះ អាចដាក់ពាក្យស្នើសុំក្រសួងមកពិនិត្យពិន្ទុឡើងវិញបាន។ ទន្ទឹមនឹងនេះរដ្ឋមន្ត្រីក្រសួងអប់រំ ឯកឧត្ដមហង់ជួន ណារ៉ុន បានបង្ហើបថាក្រសួងនឹងធ្វើការបើកសន្លឹកកិច្ចការគណិតវិទ្យា របស់បេក្ខជនមួយចំនួនផ្ទៀងផ្ទាត់ឡើងវិញ។
មានបេក្ខជនរាប់ពាន់នាក់ផ្ទុះការតវ៉ាជាបន្តបន្ទាប់ ក្រោយពេលប្រកាសលទ្ធផលបាក់ឌុបមានសិស្សរាប់ពាន់នាក់ធ្លាក់មុខវិជ្ជាគណិត។ ក្នុងនោះសូម្បីសិស្សឆ្នើមលំដាប់អន្តរជាតិ ឆាយ លីអាន ធ្លាប់បានមេដាយមាសឆ្នាំ២០១៨ ក៏ធ្លាក់មុខវិជ្ជាគណិតដែរ ដែលបង្កឲ្យមានការភ្ញាក់ផ្អើលពីគ្រប់មជ្ឈដ្ឋាន។
ក្រោយមានប្រតិកម្មជាច្រើន រដ្ឋមន្ត្រីក្រសួងអប់រំស្នើឲ្យអ្នកដែលមានបញ្ហាដាក់ពាក្យបណ្ដឹងមកកាន់ក្រសួងដើម្បីធ្វើការត្រួតពិនិត្យឡើងវិញ៕