ក្ដៅ! លទ្ធផលប្រលងបាក់ឌុបមានការប្រែប្រួល ខណៈចំនួនសិស្សនិទ្ទេស A មានការកើនឡើង
- 2018-09-13 12:21:30
- ចំនួនមតិ 0 | ចំនួនចែករំលែក 0
ក្ដៅ! លទ្ធផលប្រលងបាក់ឌុបមានការប្រែប្រួល ខណៈចំនួនសិស្សនិទ្ទេស A មានការកើនឡើង
ចន្លោះមិនឃើញ
អម្បាញ់មិញនេះ ក្រសួងអប់រំ យុវជន និងកីឡា បានប្រកាសពីលទ្ធផលនៃការរកឃើញរបស់គណៈកម្មការកោសល្យវិច័យពិន្ទុសិស្សប្រលងបាក់ឌុបហើយ ដើម្បីឆ្លើយតបចំពោះការមិនពេញចិត្តនឹងលទ្ធផលបាក់ឌុបសម័យប្រលង ២០ សីហា ២០១៨ កន្លងទៅ។
លទ្ធផលថ្មីនេះ បង្ហាញថា លទ្ធផលប្រលងបាក់ឌុបទាំងមូលមានការប្រែប្រួល ពោលគឺ កើនឡើងអ្នកជាប់ ហើយអ្នកជាប់និទ្ទេស A ក៏កើនឡើងដែរ។
គណៈកម្មការបានរកឃើញថា "ដំណើរការបូកស្រង់ពិន្ទុតាមប្រព័ន្ធកុំព្យូទ័រមានបញ្ហាបច្ចេកទេស ដែលបានប៉ះពាល់ដល់ពិន្ទុវិញ្ញាសាគណិតវិទ្យារបស់ថ្នាក់វិទ្យាសាស្ត្រ ក្នុងមណ្ឌលមួយចំនួន ដោយសារកម្មវិធីកុំព្យូទ័រមិនបានបូកស្រង់ពិន្ទុមុខវិជ្ជាគណិតវិទ្យាចំនួន ៧៤០ បន្ទប់"។
ក្រោយដោះស្រាយបញ្ហារួច ក្រសួងអប់រំបានលើកឡើងថា លទ្ធផលបាក់ឌុបមានការប្រែប្រួលដូចទៅ៖ បេក្ខជនជាប់សរុប ៧៦ ០៣៤ នាក់(តួលេខចាស់ ៧៥០៥៩នាក់) ត្រូវជា ៦៧,០៧ ភាគរយ។ បេក្ខជនជាប់និទ្ទេស A មានចំនួន ៤០៨ នាក់(តួលេខចាស់ ២៩០) B មានចំនួន ២ ២២២ នាក់, C មានចំនួន ៦ ០៤១ នាក់, D មានចំនួន ១៥ ១៨០ នាក់ និង E មានចំនួន ៥២,១៨៣ នាក់។ ក្រសួងក៏បានបញ្ជាក់ផងដែរថា ថ្នាក់វិទ្យាសាស្ត្រសង្គមមិនមានការប្រែប្រួលឡើយ។
ក្រសួងអប់រំនឹងប្រកាសលទ្ធផលប្រឡងថ្មី សម្រាប់ថ្នាក់វិទ្យាសាស្ត្រនៅថ្ងៃស្អែកទី ១៤ កញ្ញា ២០១៨ នៅទំព័រហ្វេសប៊ុករបស់ក្រសួង និងតាមមន្ទីរអប់រំនៅមួយថ្ងៃបន្ទាប់៕