គ្រាន់តែមើលលើការបើកបរ ដឹងថាពលរដ្ឋចេះគោរពច្បាប់ឬអត់បាត់

2018-12-13 06:37:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីជំនាញលើកឡើងថាជនបរទេសអាចដឹងថាប្រជាពលរដ្ឋរបស់ប្រជាជាតិមួយមានសេចក្តីថ្លៃថ្នូរកម្រិតណានោះតាមរយៈការមើលលើឥរិយាបទក្នុងការបើកបររបស់ប្រជាជនទាំងនោះ។

(លោកជំទាវ មឹន មាណវី អគ្គលេខាធិការនៃគណៈកម្មការជាតិសុវត្ថិភាពចរាចរណ៍ផ្លូវគោកថ្លែងក្នុងសន្និសីទប្រចាំឆ្នាំស្តីពីសុវត្ថិភាពចរាចរណ៍ផ្លូវគោកនៅកម្ពុជានាព្រឹកមិញ)

លោកជំទាវ មឹន មាណវី អគ្គលេខាធិការនៃគណៈកម្មការជាតិសុវត្ថិភាពចរាចរណ៍ផ្លូវគោកថ្លែងក្នុងសន្និសីទប្រចាំឆ្នាំស្តីពីសុវត្ថិភាពចរាចរណ៍ផ្លូវគោកនៅកម្ពុជានាព្រឹកមិញថាឥរិយាបទក្នុងការធ្វើដំណើរបង្ហាញពីចរិតរបស់ប្រជាពលរដ្ឋរបស់ជាតិមួយថាចេះគោរពច្បាប់ឬអត់។

លោកទំទាវបន្តថាអំពើល្មើសច្បាប់ផ្សេងៗដូចជាការលួច ឬអំពើពុករលួយជាដើមអាចលាក់កំបាំងភ្នែកមហាជនបាន តែថាអំពើល្មើសនឹងច្បាប់ចរាចរណ៍បានបង្ហាញឲ្យឃើញស្តែងៗនឹងភ្នែកតែម្តង។

លោកជំទាវបន្តថា៖ «យើងត្រូវធ្វើយ៉ាងម៉េចដើម្បីបង្ហាញថាគោរពច្បាប់ចរាចរណ៍ហ្នឹង ការធ្វើដំណើរតាមដងផ្លូវបង្ហាញពីអត្តចរិត...សេចក្តីថ្លៃថ្នូរ...ពីស្អីដែលពលរដ្ឋយើងមានក្នុងការគោរពច្បាប់របស់ជាតិ របស់ប្រទេសរបស់យើង បើយើងមិនគោរពច្បាប់ចរាចរណ៍គេថា សម្ដីសជាតិ មាយាទសពូជ នោះណា វាបង្ហាញតាមហ្នឹង»។

បើតាមលោក ជំទាវ មឹន មាណវី គ្រោះថ្នាក់ចរាចរណ៍កើតឡើងច្រើនពីការបើកបរលើសល្បឿនកំណត់ និងការជែងដោយប្រថុយប្រថាន។ លោកជំទាវបន្តថា៖ «វាជាបញ្ហាធំដែលយើងត្រូវយកចិត្តទុកដាក់ ហើយករណីនេះច្រើនកើតលើយុវជនរបស់យើង ដែលក្មួយៗប្រញាប់ទៅរៀន ទៅធ្វើការដោយការនាំឲ្យមានការវ៉ាជែង បត់ដោយគ្រោះថ្នាក់»។

បើតាមរបាយការណ៍របស់សមត្ថកិច្ចក្នុងមួយខែវិច្ឆិកា ឆ្នាំ២០១៨ កន្លងទៅនេះមានអ្នកស្លាប់ដោយគ្រោះថ្នាក់ចរាចរណ៍ចំនួន២៨៧លើក ថយចុះ១២លើកបើប្រៀបធៀបទៅនឹងខែតុលា។ សម្រាប់អ្នកស្លាប់ដោយគ្រោះថ្នាក់ចរាចរណ៍វិញមានចំនួន១៤២នាក់ ថយចំនួន១៩នាក់បើធៀបទៅនឹងខែតុលា។

បើតាមរបាយការណ៍ដដែលមនុស្ស១២២ក្នុងចំណោមអ្នកស្លាប់សរុបគឺជាអ្នកធ្វើដំណើរដោយម៉ូតូ និងមាន៧៧ភាគរយមិនពាក់មួកសុវត្ថិភាព។

(លោកស្រី កាន់ ណារ៉ា នាយិកាគ្រប់គ្រងនាយកដ្ឋានអតិថិជន និងទីផ្សារក្រុមហ៊ុនមេនូឡាយហ្វ៍)

ដោយឃើញពីគ្រោះថ្នាក់ច្រើនលើអ្នកធ្វើដំណើដោយម៉ូតូ ក្រុមហ៊ុន Manulife តាំងពីឆ្នាំ២០១២មកដល់បច្ចុប្បន្នបានចែកមួកដល់សិស្សចំនួនប្រាំពីរសាលា ឬស្មើនឹងជិត៦ពាន់មួក ដោយថាក្នុងន័យរួមចំណែកកាត់បន្ថយការស្លាប់ដោយគ្រោះថ្នាក់ចរាចរណ៍។

លោកស្រី កាន់ ណារ៉ា នាយិកាគ្រប់គ្រងនាយកដ្ឋានអតិថិជន និងទីផ្សារក្រុមហ៊ុនមេនូឡាយហ្វ៍ ដែលចូលរួមក្នុងសន្និសីទប្រចាំឆ្នាំស្តីពីសុវត្ថិភាពចរាចរណ៍ផ្លូវគោកនៅកម្ពុជាប្រាប់Sabay ឲ្យដឹងដែរថាដោយមើលឃើញពីចំនួនអ្នកស្លាប់ដោយគ្រោះថ្នាក់ចរាចរណ៍ប្រហែលជា៧០ភាគរយជាអ្នកជិះម៉ូតូទើបក្រុមហ៊ុនចូលរួមចែកមួកដល់សិស្ស និងអាណាព្យាបាលជាដើម។

លោកស្រីបន្តថា៖ «យើងឃើញថាអ្នកជិះម៉ូតូប្រឈមនឹងគ្រោះថ្នាក់ចរាចរណ៍ច្រើនជាងជិះឡាន...យើងនៅតែបន្តផ្តល់មួកសុវត្ថិភាពទៀតនៅឆ្នាំ២០១៩ហ្នឹង...វាជាការងាររួមក្នុងការជួយជាតិរបស់យើង បើយើងបានជួយចូលរួមកាន់តែច្រើនយើងនឹងជួយកាត់បន្ថយគ្រោះថ្នាក់ចរាចរណ៍បានកាន់តែច្រើន»។

សម្រាប់លោក គឹម បញ្ញា នាយកប្រចាំប្រទេសនៃអង្គការមូលនិធិបង្ការរបួសអាស៊ី ថ្លែងក្នុងសន្និសីទនេះ ដែថាបញ្ហាគ្រោះថ្នាក់ចរាចរណ៍អាចកាត់បន្ថយបានបើភាគីពាក់ព័ន្ធប្តេជ្ញាចិត្តចូលរួមទាំងអស់គ្នា។

លោកបន្ថែមថា៖ «ប្រាដកជាអាចកាត់បន្ថយបានប៉ុន្តែត្រូវមានការប្តេជ្ញាចិត្តយ៉ាងមុតមាំពីអ្នកពាក់ព័ន្ធ ត្រូវមានវិធានការជាក់ស្តែងបន្ថែមទៀតដើម្បីឆ្លើយតបនឹងបញ្ហា និងត្រូវមានការចូលរួមពីអ្នកប្រើផ្លូវផង»។

បើតាមលោក គឹម បញ្ញា អ្នកស្លាប់ដោយគ្រោះថ្នាក់ចរាចរណ៍បានធ្លាក់ចុះពីជាង២ពាន់នាក់នៅឆ្នាំ២០១៦ មកនៅជាង១ ៩០០នាក់នៅឆ្នាំ២០១៧ ដែលការធ្លាក់ចុះនេះ លោកថាបានពីការប្តេជ្ញាចិត្តរបស់រដ្ឋាភិបាល និងការចូលរួមពីភាគីពាក់ព័ន្ធនានា៕

អត្ថបទ៖ ទូច សុខា