វីវរហើយ! ម៉ាឡេស៊ីកំពុងខ្វះខាតទឹកជិតពាក់កណ្ដាលប្រទេស ដោយសារការឡើងកម្តៅអាកាសធាតុ

2019-03-24 01:15:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ខេត្តចំនួន៦ក្នុងចំណោមខេត្តសរុបទាំង១៣ក្នុងប្រទេសម៉ាឡេស៊ី ត្រូវគេរំពឹងថាកំពុងខ្វះខាតទឹកប្រើប្រាស់ដោយសារអាកាសធាតុក្តៅខ្លាំង។ នេះបើតាមការចុះផ្សាយរបស់ Channel News Asia កាលពីថ្ងៃសៅរ៍។

ទឹកត្រូវបានបញ្ចេញពីទំនប់វារីអគ្គិសនីនៅក្នុងប្រទេសម៉ាឡេស៊ី

រដ្ឋមន្ត្រីក្រសួងធនធានទឹក ដែនដី និង ធនធានធម្មជាតិ Xavier Jayakumar បាននិយាយថាទំនប់វារីអគ្គិសនីចំនួន៣ ដែល១ក្នុងខេត្ត Kedah និង ២ទៀតនៅ Johor បច្ចុប្បន្នកំពុងខ្វះខាតទឹកប្រមាណ៥០%។

ស្ទើរតែទូទាំងប្រទេសម៉ាឡេស៊ី អាកាសធាតុបានឡើងកម្តៅរហូតដល់ ៤០ អង្សាសេ ហើយត្រូវរង់ចាំយ៉ាងហោចណាស់ពី ៣១ ទៅ ៥៦ថ្ងៃ ទម្រាំមានភ្លៀងធ្លាក់ទើបអាចកាត់បន្ថយការឡើងកម្តៅក្នុងប្រទេស និង មានទឹកគ្រប់គ្រាន់មកវិញដើម្បីប្រើប្រាស់។

ម៉ាឡេស៊ីដែលមានទាំងផ្ទៃដី និង ប្រជាជនច្រើនជាងកម្ពុជាជិត២ដង កំពុងជួបវិបត្តិមិនខុសពីកម្ពុជា ពោលគឺខេត្តចំនួន៦ដែលរួមមាន៖ ចូហរ (Johor) , ណេហ្គឺរី សេមប៊ីឡាន់ (Negeri Sembilan), ផេរ៉ាក់ (Perak), ខេដា (Kedah), ប៉ាហាំង (Pahang) និង កេឡានតាន (Kelantan) កំពុងខ្វះខាតទឹកប្រើប្រាស់។

ដោយសារអាកាសធាតុក្តៅ និង ស្ងួតបានបណ្តាលឱ្យមានភ្លើងឆេះព្រៃជាង ២៩៧ ហិកតា នៅថេរ៉ាន់ហ្គានូ (Terrengganu) កាលពីថ្ងៃពុធទម្រាំអ្នកពន្លត់អគ្គីភ័យអាចពន្លត់ភ្លើងទាំងស្រុងនៅថ្ងៃសៅរ៍នេះ៕

ប្រភព៖ Channelnewsasia ប្រែសម្រួល៖ សុខ លាងហ៊ត