លេចសកម្មភាពប្លែកៗរបស់តារាល្បីៗក្នុងកម្មវិធីលំដាប់ពិភពលោកមួយ PNN កំពុងសម្ងំថត
- 2019-06-20 06:06:54
- ចំនួនមតិ 0 | ចំនួនចែករំលែក 0
លេចសកម្មភាពប្លែកៗរបស់តារាល្បីៗក្នុងកម្មវិធីលំដាប់ពិភពលោកមួយ PNN កំពុងសម្ងំថត
ចន្លោះមិនឃើញ
តារាល្បីៗជាច្រើនដួងបានចូលរួមក្នុងកម្មវិធីលំដាប់ពិភពលោកមួយ ដែលស្ថានីយទូរទស្សន៍ PNN បានទិញសិទ្ធិពីបរទេសមក បច្ចុប្បន្នបាន និងកំពុងសម្ងំថត ត្រៀមនឹងចាក់ផ្សាយក្នុងពេលឆាប់ៗខាងមុខ។
តារាទាំងនោះមាន លោក ទេព រិនដារ៉ូ ប៉ែន ចំរុង ខាត់ វ៉ៃហាំង ជា សំណាង នីតា វរវង្ស និង អ៊ុន សិទ្ធា ជាដើម។ ពួកទាំងនោះ ត្រូវបានអ្នកដឹកនាំកម្មវិធីតម្រូវឲ្យរំលេចស្ទីលផ្ទាល់ខ្លួនប្លែកៗរៀងខ្លួន មុនចូលដល់កម្មវិធីថ្មីបំផុតក្នុងប្រទេសកម្ពុជាយើងនេះ។ សកម្មភាពរបស់ពួកគេ ប្លែកៗ និងមើលទៅគួរឲ្យអស់សំណើច។
តាមការឲ្យដឹង កម្មវិធីនោះ មានឈ្មោះថា "Family Feud Cambodia" ជាកម្មវិធីកម្សាន្ត បែបល្បែងល្បងប្រាជ្ញា ដែលមានរបៀបលេងប្លែកពីគេ មានភាពទាក់ទាញ និងបង្កការសប្បាយទាំងអ្នកចូលរួមលេងផ្ទាល់ និងទស្សនិកជនដែលកំពុងទស្សនា។ ជាពិសេសទៅទៀតនោះ ទឹកប្រាក់ជាច្រើន ក៏ត្រៀមសម្រាប់អ្នកមានសមត្ថភាពផង។
តាមព័ត៌មានពីអ្នកដឹកនាំកម្មវិធី បានឲ្យដឹងថា កម្មវិធីមួយនេះ PNN ទើបនឹងទិញសិទ្ធិពីសហរដ្ឋអាមេរិកថ្មីៗនេះប៉ុណ្ណោះ។ លោក ប៉ែន ចំរុង ដែលត្រូវជ្រើសរើសជាពិសេសធ្វើជាពិធីករក្នុងកម្មវិធីថ្មីនេះ បានឲ្យដឹងថា "Family Feud” គឺជាកម្មវិធីដ៏ល្បីដ៏សហរដ្ឋអាមេរិក និងនៅទូទាំងពិភពលោក ក្នុងនោះប្រទេសចំនួន ៦០ បាន និងកំពុងដំណើរការកម្មវិធីខាងលើ តាមរយៈការទិញសិទ្ធិដូចគ្នា។
ដោយឡែកកម្ពុជា ជាប្រទេសទី ៦១ ដែលបានសម្រេចទិញសិទ្ធិយកមកត្រៀមនឹងដំណើរផ្ដល់ការសប្បាយដល់ប្រិយមិត្ត នៅក្នុងប្រទេសកម្ពុជា។
បច្ចុប្បន្នកម្មវិធី ស្ថិតក្នុងការថតទុក ដោយក្នុងនោះក្រុមការងារដឹកនាំកម្មវិធីរបស់ PNN បាន និងកំពុងមមាញឹកក្នុងការពន្លឿនដំណើរការថត ស្របពេលសិល្បករដែលចូលរួមក្នុងដំណាក់កាលដំបូងរបស់កម្មវិធី បានបង្ហាញនូវការពេញចិត្ត។
លោក ទេព រិនដារ៉ូ សិល្បករជើងចាស់ បានឲ្យដឹង តាមធម្មតា លោកកម្រនឹងចូលរួមក្នុងកម្មវិធីកម្សាន្តតាមទូរទស្សន៍ណាស់។ ប៉ុន្តែលោកសម្រេចចូលរួមជាមួយ "Family Feud Cambodia" ដោយសារយល់ថា ជាកម្មវិធីកម្សាន្តល្អ ផ្ដល់ទាំងការកម្សាន្ត ទាំងចំណេះដឹង និងបង្កើតភាពឈ្លាសវៃ បង្កើនសមត្ថភាពខួរក្បាលថែមទៀត។
ងាកមករៀមច្បងម្នាក់ទៀត គឺលោក ជា សំណាង បញ្ជាក់ថា លោកក៏ពេញចិត្តកម្មវិធីរបស់អាមេរិកមួយនេះដូចគ្នា។ លោកលើកឡើងថា "សម្រាប់ខ្ញុំផ្ទាល់ខ្ញុំគិតថា ល្អព្រោះកម្មវិធីបំផុសឲ្យយើងរិះគិត និងជួយបណ្ដុះល្បឿននៃការគិត ដូច្នេះបើយើង មិនមានការយល់ដឹងច្រើន ឬក៏យល់ដឹងច្រើនហើយ តែគិតមិនបានលឿន គឺយើងនឹងចាញ់ អីចឹងសម្រាប់ខ្ញុំ គិតថាល្អណាស់សម្រាប់កម្មវិធីនេះ!”។
“Family Feud” គឺជាកម្មវិធីកម្សាន្តតាមទូរទស្សន៍ដែលត្រូវបានបង្កើតឡើងដោយលោក Mark Goodson ជាផលិតករកម្មវិធីទូរទស្សន៍ដ៏ល្បីរបស់សហរដ្ឋអាមេរិក ដែលមានជំនាញក្នុងការបង្កើតកម្មវិធីកម្សាន្តលើទូរទស្សន៍នានា។ របៀបលេងនៃកម្មវិធីនេះ គឺអ្នកចូលលេងទាំងអស់មាន២ក្រុម(១ក្រុមគ្នា៤នាក់) នឹងធ្វើការប្រកួតគ្នា តាមរយៈការឆ្លើយសំណួរអំពីចំណេះដឹងទូទៅ ដើម្បីស្វែងរកក្រុមឈ្នះបន្តទៅវគ្គបន្ទាប់។បន្ថែមពីលើនេះ អ្នកឈ្នះដែលរកបានពិន្ទុដល់ ២០០ នឹងទទួលបានរង្វាន់ធំប្រចាំសប្ដាហ៍។ យ៉ាងណា ចម្លើយរបស់ក្រុមដែលចូលលេង ត្រូវយកទៅផ្ទៀងផ្ទាត់របស់ចម្លើយដែលបានមនុស្ស ១០០ផ្សេងទៀត ដែលកម្មវិធីបានរៀបចំ។
ប្រសិនបើចម្លើយដូចគ្នា ទើបសន្មត់ថា នោះជាចម្លើយត្រឹមត្រូវដែលអាចបន្តទៅកាន់សំណួរបន្តបន្ទាប់ទៀត ដែលនេះ គឺជាចំណុចខុសប្លែក និងគួរឲ្យចាប់អារម្មណ៍មួយរបស់ "Family Feud” ធៀបនឹងកម្មវិធីដទៃ។
កាន់តែពិសេសក្រុមឈ្នះប្រចាំសប្ដាហ៍ណា ដែលអាចឈ្នះដល់៥សប្ដាហ៍ជាប់គ្នាជាមួយពិន្ទុដល់ ២០០រហូត មានឱកាសកាន់តែច្រើនទទួលបានរង្វាន់ធំប្រចាំកម្មវិធីហៅថា "Jackpot Price”។ កម្មវិធីនេះ គ្រោងនឹងផ្សាយផ្លូវការលើកញ្ចក់ទូរទស្សន៍ PNN ក្នុងរង្វង់ដើមខែកក្កដានេះ។ ដើម្បីចុះឈ្មោះចូលរួមបាន សូមចូលទៅកាន់ទំព័រហ្វេសប៊ុករបស់កម្មវិធី https://www.facebook.com/familyfeudcambodia/ ៕