អ្នកខេត្តទាំងនេះគួរដឹងទឹកទន្លេមេគង្គអាចនឹងឡើងលើសកម្ពស់ប្រកាសឲ្យប្រុងប្រយ័ត្ន
- 2019-09-03 08:45:25
- ចំនួនមតិ 0 | ចំនួនចែករំលែក 0
អ្នកខេត្តទាំងនេះគួរដឹងទឹកទន្លេមេគង្គអាចនឹងឡើងលើសកម្ពស់ប្រកាសឲ្យប្រុងប្រយ័ត្ន
ចន្លោះមិនឃើញ
ក្រសួងធនធានទឹកឲ្យដឹងថាទឹកទន្លេមេគង្គលើអាចនឹងហក់ឡើងខ្ពស់ជាងកម្រិតប្រកាសឲ្យប្រុងប្រយ័ត្ននៅប៉ុន្មានថ្ងៃខាងមុខ ខណៈភ្លៀងកំពុងធ្លាក់ខ្លាំងនៅតំបន់ផ្ទៃរងទឹកភ្លៀងទន្លេមេគង្គ។
ក្រសួងធនធានទឹកចេញសេចក្ដីជូនដំណឹងលើកទីបីរបស់ខ្លួនក្នុងថ្ងៃនេះថាការបន្តធ្លាក់ភ្លៀងជោគជាំនៅតំបន់ផ្ទៃអាងទន្លេមេគង្គនេះ នឹងជំរុញឲ្យទឹកទន្លេមេគង្គកម្ពុជាផ្នែកខាងលើនឹងបន្តកើនឡើងថែមទៀត។
ក្រសួងឲ្យដឹងថាស្ថានីយជលសាស្រ្តខេត្តស្ទឹងត្រែង ទឹកអាចនឹងឡើងដល់កម្ពស់១១,៦០ម៉ែត្រ នៅថ្ងៃទី៧ ខែកញ្ញា ឆ្នាំ២០១៩ ខណៈកម្ពស់ឲ្យប្រុងប្រយ័ត្នត្រឹម១០,៧០ម៉ែត្រ។
សម្រាប់ស្ថានីយជលសាស្រ្តខេត្តក្រចេះវិញក្រសួងថាទឹកអាចឡើងដល់២២,៣៥ម៉ែត្រ នៅថ្ងៃទី៨ ខែកញ្ញា ឆ្នាំ២០១៩ ខណៈកម្ពស់ប្រកាសឲ្យប្រុងប្រយ័ត្ន២២ម៉ែត្រ។
បន្ទាប់មកទៀតគឺស្ថានីយជលសាស្រ្តខេត្តកំពង់ចាម ក្រសួងព្យាករថានៅថ្ងៃទី៩ ខែកញ្ញា ឆ្នាំ២០១៩ ទឹកនឹងអាចឡើងដល់កម្ពស់១៥,២៥ម៉ែត្រ ខណៈកម្ពស់ប្រកាសឲ្យប្រុងប្រយ័ត្ន១៥,២០ម៉ែត្រ។
បើតាមក្រសួងមានតែស្ថានីយជលសាស្រ្តចតុមុខ បាសាក់ រាជធានីភ្នំពេញទេដែលទឹកឡើងមិនទាន់ដល់កម្រិតឲ្យប្រកាសប្រុងប្រយ័ត្ន ពោលគឺនៅថ្ងៃទី១០ ខែកញ្ញា កម្ពស់ទឹកអាចនឹងឡើងដល់៩,១៥ម៉ែត្រ ខណៈកម្ពស់ឲ្យប្រុងប្រយ័ត្នគឺ១០,៥០ម៉ែត្រ។
ក្រៅពីនេះក្រសួងឲ្យដឹងដែរថាកម្ពស់ទឹកនៅតាមដងទន្លេមេគង្គក្រោម ទន្លេបាសាក់ ទន្លេរសាប និងក្នុងបឹងទន្លេសាប ក៏នឹងមានការកើនឡើងបន្តបន្ទាប់ផងដែរ៕