ព្យុះភ្លៀងដែលផលិតករភាពយន្តខ្មែរកំពុងជួបពេលបច្ចុប្បន្ន

2018-01-24 03:06:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជម្នះផ្នត់គំនិតអ្នកទស្សនា ឧបសគ្គការហូរចូលខ្សែភាពយន្តពីបរទេស កង្វះធនធានមនុស្ស ថវិកា បច្ចេកទេស នេះគឺជាព្យុះភ្លៀងដែលផលិតករខ្មែរកំពុងជួបនាពេលបច្ចុប្បន្ន និងមានបញ្ហាជាច្រើនផ្សេងៗទៀត។

ទន្ទឹមនឹងភាពមិនទាន់រឹងមាំនៃខ្សែភាពយន្តខ្មែរដែលត្រូវយកចិត្តទុកដាក់នេះ លោក ឆាយ បូរ៉ា ប្រធានសមាគមភាពយន្តកម្ពុជា ថា ក៏មានបញ្ហាជាច្រើនទៀតដូចជាទីតាំងថត និងរឿងបង់ពន្ធជាដើម។

យ៉ាងណាក៏ដោយក្នុងនាមជាប្រធានសមាគមភាពយន្តកម្ពុជា ដែលទើបតែជាប់ឆ្នោតថ្មីៗនេះ លោកមិនព្រងើយកន្តើយ ចំពោះបញ្ហាទាំងនេះឡើយ ដោយលោកបានដាក់បញ្ហាចំបងៗចំនួន៣ចំណុច ដែលត្រូវដោះស្រាយបន្ទាន់ រួមមាន ទី១បញ្ហាពន្ធ លោកនឹងដាក់ពាក្យស្នើទៅកាន់ប្រមុខរដ្ឋាភិបាលឲ្យលើកលែងពន្ធគ្រប់ប្រភេទលើវិស័យភាពយន្តខ្មែររយៈពេល១០ឆ្នាំ។ ទី២ ពង្រឹងគុណភាពក្នុងការផលិតភាពយន្ត ដោយបង្កើតការបណ្ដុះបណ្ដាលផ្នែកតែងនិពន្ធ ថត ដឹកនាំសម្ដែង កាត់តវីដេអូជាដើម និង ទី៣ គឺរឿងដើមទុនក្នុងការផលិត ចំពោះអ្នកមានសមត្ថភាពតែមិនមានធនធានក្នុងការផលិត លោកនឹងស្វះស្វែងរកអ្នកមានធនធានឲ្យមកសហការគ្នាជាមួយអ្នកគ្មានធនធានផលិត។

ដូចគ្នានេះលោក លី វៀត ចាងហ្វាងផលិតកម្ម វីស៊ីនភីឈ័រ ក៏បានបង្ហាញក្តីព្រួយបារម្ភ និងផលលំបាកប្រាប់ថា កញ្ចប់ថវិកាក្នុងការថតខ្សែភាពយន្តភាគ នៅមានចំនួនតិច ដូច្នេះហើយផលិតករត្រូវកំណត់ភាគថត ក្នុងមួយថ្ងៃៗ ដោយមិនអាចសម្រិតសម្រាំងការសម្ដែងខ្លាំងពេកឡើយ។ លោកថា « យើងមើលកូរ៉េ ថៃ គេមានលុយច្រើន គេចង់បានសកម្មភាពល្អ ថតមិនត្រូវ គេថតម្ដងហើយម្ដងទៀត ជួនកាលមួយថ្ងៃដល់ល្ងាចគេថតតែមួយប្លង់ ចុះយើង? មួយថ្ងៃ ថត ១០ ទៅ ១៦ប្លង់ ជិតមួយភាគហើយហ្នឹង បើមិនអញ្ចឹងការសម្ដែងយើងធ្វើម៉េចនឹងល្អ បើមិនធ្វើបែបនេះយើងខាតហើយ ព្រោះចាយពេលច្រើនលុយក៏ច្រើន។»

ជុំវិញការរអ៊ូរទាំរបស់ក្រុមផលិតករ នេះ ឯកឧត្តម ថៃ នរសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានមានប្រសាសន៍ថា ជុំវិញការសំណើរបស់ផលិតករ រឿងពន្ធពេលនេះក្រសួងមិន ទាន់សម្រេចទេ ដោយរង់ចាំពិភាក្សា ជាមួយនាយកដ្ឋានក្រសួងពាក់ព័ន្ធសិន។

ចំណែកចំពោះទីតាំងថតវិញ ឯកឧត្តម ថៃ នរសត្យា សំណូពរដល់អាជ្ញាធរជួយសម្រួលដល់ផលិតករផង ដើម្បីបានផ្តិតទេសភាពស្រស់ស្អាត ក្នុងប្រទេសកម្ពុជា និងជាការផ្សព្វផ្សាយ ដល់ ប្រជាជាតិក្នុងពិភពលោកបានស្គាល់ខ្មែរ។

លោក ថៃ នរសត្យា « ផលិតករគាត់ជួបបញ្ហាច្រើនហើយ អញ្ចឹងអាជ្ញាធរ សូមជួយសម្រួល រឿងទីតាំងផង ។ កុំឲ្យអ្នកលួចថតបាន ស្រាប់អ្នកដាក់លិខិតជូនដំណឹង ទៅជាបង្កភាពលំបាកឲ្យគ្នាទៅវិញ។ ទីតាំងស្អាត ក្នុងប្រទេសយើងមានច្រើន អញ្ចឹង ដើម្បីឲ្យពិភពលោកបានស្គាល់មាន តែជួយគ្នាក្នុងការផ្សព្វផ្សាយ។»

តែប្រធានសមាគមរូបនេះបង្ហាញសុទិដ្ឋិនិយមថា បើការលើលែងពន្ធត្រូវបានអនុគ្រោះ នោះភាពយន្តខ្មែរនឹងមានគុណភាពកាន់តែប្រសើរឡើង។ «កាលណាផលិតករមានចំណូលខ្ពស់នោះគេក៏អាចអភិវឌ្ឍន៍ផ្នែក សម្ភារៈ ឧបករណ៍បច្ចេកទេស អាចបន្ថែមប្រាក់បៀវត្សន៍ដល់កម្មករកុន ដែលធ្វើឲ្យពួកគាត់អភិវឌ្ឍន៍សមត្ថភាពផ្ទាល់ខ្លួន និងដែលជាកត្តា មួយជំរុញឲ្យខ្សែភាពយន្តខ្មែរកាន់តែមានគុណភាព» លោក ឆាយ បូរ៉ា បញ្ជាក់។

យ៉ាងណាក៏ដោយអ្នកវិភាគលើវិស័យភាពយន្តខ្មែរអះអាងថា គុណភាព និងបច្ចេកទេសភាពយន្តខ្មែរនាពេលបច្ចុប្បន្នហាក់មានភាពប្រសើើរឡើង រហូតរឿងខ្លះអាចយកទៅប្រកួតប្រជែង

បញ្ហារបស់ផលិតករភាពយន្តក្រៅពីមុនការផលិតខ្សែភាពយន្តនៅមានទៀត គឺ ការស្នើសុំសិទ្ធិថត ការឆ្លងយោបល់ ការពិនិត្យសាច់រឿង និងការសុំទីតាំងថត ពេលខ្លះក្រសួងមិនបានអនុញ្ញាតឲ្យថតចំពោះសាច់រឿងនិង ទីតាំងខ្លះក៏មានដែរ។ជួនកាលការផលិតបានសម្រេចជាលទ្ធផលហើយស្រាប់តែមានភាគ ណាខ្លះរូបភាពសាហាវឬស៊ិចស៊ីពេកគឺក្រសួងត្រូវកំណត់វ័យអ្នកចូលមើល ឬត្រូវកាត់ភាគចោលជាដើម។ ជាក់ស្ដែង ដូចរឿង«បីកន្លះ» រឿង«ស្បែកគង់» រឿង « វិកលចរិក» ជាដើម៕

អត្ថបទៈ ស្រីអូន