ឃួន ឡាបូរ៉ាវី៖ ប្រកួតយប់មិញលំបាកបំផុតក្នុងអាជីពរបស់ខ្លួន

2017-12-31 06:44:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធជើងចាស់របស់ក្រុមបឹងកេត ឃួន ឡាបូរ៉ាវី ថា ការប្រកួតជាមួយក្រុមក្រសួងការពារជាតិវគ្គផ្ដាច់ព្រ័ត្រយប់មិញនេះជា ការប្រកួតមួយយ៉ាងលំបាកបំផុតបើប្រៀបធៀបការប្រកួតច្រើនឆ្នាំកន្លងទៅនេះ។

ឃួន ឡាបូរ៉ាវី បានឲ្យដឹងថា ការប្រកួតវគ្គផ្ដាច់ព្រ័ត្រជាមួយក្រុមទ័ពយប់មិញនេះពិបាកបំផុត និងមានសំពាធខ្លាំងថែមទៀតផង ជាពិសេសនៅពេលទាត់បាល់កាត់សេចក្តី ១១ម៉ែត្រ។ បើគិតពីប្រកួតសំខាន់ៗសម្រាប់ខ្សែប្រយុទ្ធខាងលើនេះមានរាប់មិនអស់មិនថាការប្រកួតនៅក្នុងប្រទេស ឬនៅក្រៅប្រទេសនោះទេ ប៉ុន្តែវាមិនសូវពិបាក និងមានសំពាធខ្លាំងដូចនេះ។

ខ្សែប្រយុទ្ធដែលជួយឲ្យបឹងកេតឈ្នះពានយប់មិននេះបន្តថា រាល់ដងការប្រកួតវគ្គផ្ដាច់ភាគច្រើនទាត់បាល់កាត់សេចក្ដី១១ម៉ែត្រ ត្រឹម៥គ្រាប់គឺដឹងចាញ់ឈ្នះហើយ ប៉ុន្តែយប់មិញទាត់រហូតដល់ជាង១០គ្រាប់ទើបរកឃើញអ្នកឈ្នះ ហើយណាមួយគ្រាប់ដំបូងរបស់ខ្លួនក៏ទាត់មិនចូលទៀត ដូច្នេះវារឹតតែមានសំពាធកាន់តែខ្លាំង។ កីឡាកររូបនេះសប្បាយរីករាយជាខ្លាំងនៅពេលដែលក្រុមខ្លួនបានលើកពានលីគកំពូលពីរឆ្នាំជាប់គ្នាដូចនេះ ហើយរដូវកាលថ្មីក្រុមទាំងមូលនឹងមានការកែប្រែនិងធ្វើបានល្អជាងនេះ។

លីគកំពូលរបស់កម្ពុជាឆ្នាំ ២០១៦-២០១៧ នេះបានបញ្ចប់ទៅហើយកាលពីយប់មិញ ដោយក្រុមបឹងកេត យកឈ្នះក្រុមក្រសួងការពារជាតិដោយទាត់បាល់កាត់សេចក្ដី១១ម៉ែត្រ បន្ទាប់ក្រុមទាំងពីរប្រកួតគ្នាអស់រយៈពេល១២០នាទីនៅតែស្មើ ១-១ ៕

អត្ថបទ៖ នួន ស៊ីណា