ដឹងប្រវត្តិបទ"អានី"ដែលអ្នកស្ដាប់ច្រឡំថា ជាសំនៀងដើមរបស់អធិរាជសំឡេងមាស ស៊ីន ស៊ីសាមុត

2018-01-03 07:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

"អានី" គឺជាចម្រៀង១បទ ដែលនៅតែអាចរក្សាភាពល្បីល្បាញបានយូរអង្វែង និងទទួលបានការនិយមចូលចិត្តអ្នកស្ដាប់ស្ទើរគ្រប់សម័យកាល។ ជាក់ស្ដែង សូម្បីតែយុវវ័យសម័យបច្ចេកវិទ្យានេះ ក៏អាចច្រៀងចម្រៀងដែលមានអាយុកាលជាង៦០ឆ្នាំនេះ យ៉ាងចាំស្ទាត់ដែរ។

បទ "អានី" សំនៀងលោក ស៊ិន ស៊ីសាមុត

សង្កេតឃើញថា នាពេលបច្ចុប្បន្ន បទ "អានី" តែងតែរណ្ដំចិត្តអ្នកគាំទ្រជានិច្ច នៅតាមក្លិប និងភោជនីយដ្ឋាននានា ព្រោះអ្នកចម្រៀងក្មេងៗសម័យនេះ មិនដែលភ្លេចឡើយក្នុងការលើកយកមកបកស្រាយ ដើម្បីកំដរបរិយាកាសជូនអតិថិជន។ លើសពីនោះ បទនេះថែមទាំងត្រូវបាន តារាចម្រៀងប្រុសល្បីៗគ្រប់ជំនាន់ដូចជា លោក ហួរ ឡាវី ព្រាប សុវត្ថិ ឯក ស៊ីដេ និង ឆាយ វីរៈយុទ្ធ យកមកថតឡើងវិញ ថែមទៀត។

បទ "អានី" សំនៀងលោក ហួរ ឡាវី

កន្លងមក អ្នកស្ដាប់ច្រើនយល់ថា ចម្រៀងខាងលើ គឺជាសំនៀងដើមរបស់ អធិរាជសំឡេងមាស ស៊ិន ស៊ីសាមុត តែការពិតលោកគ្រាន់តែជាបុគ្គលទី២ដែលច្រៀង ក្រោយទទួលបានសិទ្ធិស្របច្បាប់ក្នុងការថតបទនេះឡើងវិញតែប៉ុណ្ណោះ។

លោក ស៊ិន ស៊ីសាមុត

បើតាមការរកឃើញពីអ្នកនិយមស្រាវជ្រាវប្រវត្តិបទចម្រៀងជាច្រើននាក់បានឲ្យដឹងថា ***ដើមឡើយ "អានី" គឺជាស្នាព្រះហស្ថនិពន្ធទំនុកច្រៀង បទភ្លេង និងច្រៀង ដោយអ្នកអង្គម្ចាស់ ស៊ីសុវត្ថិ ប៉ាណ្ណារ៉ា សិរីវុឌ្ឍ រួមជាមួយទឹកដៃសម្រួលតន្ត្រី ដោយលោក ហួរ ឡុញ នៅដើមទសវត្សរ៍ឆ្នាំ៦០ ក្នុងវង់តន្ត្រី "អប្សរាតន្ត្រី" របស់ទ្រង់*** ។ ជុំវិញដើមកំណើតបទនេះ ព្រះអង្គផ្ទាល់ក៏ធ្លាប់មានបន្ទូលបញ្ជាក់ក្នុងកិច្ចសម្ភាសជាមួយសារព័ត៌មានក្នុងស្រុកមួយដែរ កាលពីពាក់កណ្ដាលឆ្នាំ២០១៧ កន្លងទៅ។

អ្នកអង្គម្ចាស់ ស៊ីសុវត្ថិ ប៉ាណ្ណារ៉ា សិរីវុឌ្ឍ

ក្រៅពីនោះ មានការលើកឡើងបន្ថែមទៀតថា ចម្រៀងលួងលោមក្រោមនាមនារីម្នាក់នេះ ជាសាច់រឿងរបស់អ្នកអង្គម្ចាស់ផ្ទាល់ ដោយកាលណោះទ្រង់ទតឃើញនារីម្នាក់ក្នុងរង្គសាល១ ហើយនាងមានឈ្មោះ អានី ។

ប្រភពពីអ្នកនិពន្ធសៀវភៅ "មាសស្រោបនគរ" សេង តារា ធ្លាប់លម្អិតក្នុងកម្មវិធី "ចម្រៀងសំណូមពរប្រិយមិត្ត" របស់ CTN ថា បន្ទាប់ពីទ្រង់លើកយកមកច្រៀងក្នុងវង់តន្ត្រី និងមានការចាក់ផ្សាយតាមវិទ្យុជាតិ បទ "អានី" ទទួលបានការគាំទ្រយ៉ាងសម្បើម រហូតត្រូវបានគេយកទៅបញ្ចូលក្នុងប្រលោមលោកល្បីរឿង "បាត់អូនម្ដេចបាន?”។

ក្រោយមកទៀត ប្រលោមលោកដដែល ត្រូវបានលើកមកថតជាភាពយន្ត ក្នុងផលិតកម្មដែលជាកម្មសិទ្ធិរបស់ អ្នកអង្គម្ចាស់ក្សត្រី នរោត្តម រស្មី ជាមួយគ្នានេះ អ្នកអង្គម្ចាស់ក្សត្រីបានសម្រេចទិញសិទ្ធិចម្រៀង "អានី" មកថតឡើងវិញដោយឲ្យ លោក ស៊ិន ស៊ីសាមុត ច្រៀងថតដាក់ថាស ក្នុងអំឡុងទសវត្សរ៍ឆ្នាំ៦០ និងបន្សល់កិត្តិនាមល្បីល្បាញរហូតមក៕

ចុចអាន៖

អត្ថបទ៖ សុខណា