ដឹងអត់ សប្ដាហ៍មុនរឿងធំៗ មានអ្វីខ្លះ?

2018-01-15 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ធំៗដែលមិនគួររំលង គឺមានទាំងព័ត៌មានកម្សាន្ត, សង្គម និង កីឡា ដែលមហាជនចាត់ទុកជារឿងធំ និងប្លែកកើតមាននៅក្នុងអំឡុងសប្ដាហ៍មុននេះ។ ចង់ដឹងថា ព្រឹត្តិការណ៍ទាំងនោះមានអ្វីខ្លះ ចូលអានខាងក្រោមនេះ៖

ព័ត៌មានកម្សាន្ត

កូនប្រុស ព្រាប សុវត្ថិ ៣នាក់ដើរគន្លងតាមឪពុក

កូនប្រុស៣រូបរបស់កំពូលតារាចម្រៀងប្រចាំកម្ពុជា ព្រាប សុវត្ថិ ចុះកុងត្រាច្រៀងឲ្យផលិតកម្មធំជាងគេនៅកម្ពុជា។ លោក សុវត្ថិ មុន្នីវណ្ណ លោក សុវត្ថិ មុន្នីនាគ និង លោក សុវត្ថិ សិរីវុឌ្ឍ បានចុះកុងត្រាច្រៀងឲ្យផលិតកម្មហង្សមាសនៅសណ្ឋាគារ សូសហ្វីថែលភូគីត្រា កាលពីថ្ងៃទី៨ ខែមករា ដើមសប្ដាហ៍មុន ដែលមានការចូលរួមពីតារាចម្រៀងលោកព្រាប សុវត្ថិ និងភរិយា រួមនឹងតំណាងខាងផលិតកម្ម។

អម្ពរ ទេវី ហោះមកកម្ពុជាថតកុន

តារាសម្ដែងទសវត្សទី៩០ អ្នកស្រី អម្ពរ ទេវី ហោះមកកម្ពុជា ដើម្បីមកថតកុន។ នេះជាលើកទី២ហើយ ដែលតារាសម្ដែងជើងចាស់រូបនេះហោះមកថតកុននៅកម្ពុជាក្រោយបោះបង់ជាង ១ទសវត្ស។ កាលមកលើកទី១ អ្នកស្រី អម្ពរ ទេវី បានចូលរួមសម្ដែងក្នុងរឿង ទឹកចិត្តម្ដាយសម័យថ្មីរបស់ផលិតកម្មថោន លើកទី២នេះអ្នកស្រីនឹងចូលសម្ដែងក្នុងរឿងភាគ២រឿង គឺរឿង "ឆន្ទា" និងរឿង "កាកី"ដែលជារឿងសម្រិតសម្រាំងប្រចាំឆ្នាំ២០១៨។

ព័ត៌មានសង្គម

លោកស័ក្តិ៣៖ បង់លុយហើយជាប់គុកក្រោយប្រើជើងឥតស្រមោល

មន្ត្រីប៉ូលិសស័ក្ដិ៣ ត្រៀមឡើងស័ក្ដិ៤ សៅ បញ្ញា អាយុ ៣៣ឆ្នាំ បម្រើការងារនៅការិយាល័យរដ្ឋបាលសរុប នៃនាយកដ្ឋានប្រឆាំងបទល្មើសបច្ចេកវិទ្យារបស់អគ្គស្នងការដ្ឋាននគរបាលជាតិ ត្រូវបានព្រះរាជអាជ្ញា ចោទប្រកាន់ ចំនួនពីរបទល្មើស គឺ៖

ទី១. ហិង្សាដោយចេតនាមានស្ថានទម្ងន់ទោស

ទី២. ប្រើប្រាស់ដោយគ្មានសិទ្ធិនូវសញ្ញាសម្គាល់ ដែលកំណត់ដោយអាជ្ញាធរសាធារណៈ មាត្រា២១៨ និងមាត្រា៦១៤ នៃក្រមព្រហ្មទណ្ឌ។ សម្រាប់មាត្រា២១៨ ត្រូវប្រឈមជាប់ពន្ធនាគារពី ២ឆ្នាំទៅ ៥ឆ្នាំ ពិន័យជាប្រាក់ពី ៤លាន ទៅ ១០លាន និងមាត្រា៦១៤ ដែលប្រឈមជាប់ពន្ធនាគារពី១ខែ ទៅ ១ឆ្នាំ ពិន័យជាប្រាក់ពី ១០ម៉ឺន ទៅ ២លានរៀល ក្រោយប្រើអំពើហិង្សាទៅលើមន្ត្រីចរាចរណ៍ (មន្ត្រីកិច្ចសន្យា) ឈ្មោះ អឿន ចំណាន កាលពីថ្ងៃទី៩មករាឆ្នាំ២០១៨ កន្លងទៅ។

ចិនផ្ដល់កាដូធំ៥ ដល់កម្ពុជា

កាដូធំ៥ ដែលកម្ពុជាបានពីមហាមិត្តចិនក្រោយការចុះហត្ថលេខារវាងរាជរដ្ឋាភិបាលកម្ពុជា-ចិន ក្នុងកំលុងទស្សនកិច្ចផ្លូវការរបស់នាយករដ្ឋមន្ត្រីចិនលោក លឺ ខឺឈាង កាលពីសប្ដាហ៍មុនដែលក្នុងនោះរួមមាន ៖

១. ព្រលានយន្តហោះថ្មីខេត្ត សៀមរាប តម្លៃវិនិយោគប្រមាណ ៩០០ លានដុល្លារ

២. ផ្លូវល្បឿនលឿន ភ្នំពេញ ទៅ ខេត្តព្រះសីហនុប្រវែង១៩០,៦៣គីឡូម៉ែត្រ តម្លៃ ១៩០០លានដុល្លារ

៣. អាកាសយានដ្ឋានភ្នំពេញថ្មីនៅក្រុងតាខ្មៅ តម្លៃ ១៥០០លានដុល្លារ

៤. គម្រោងវិនិយោគកំពង់ផែស្ទឹងហាវ

៥. គម្រោងពង្រីក និងលើកកម្រិតផ្លូវជាតិលេខ៣។ ក្រៅពីកាដូធំទាំង៥នេះនៅមានកិច្ចព្រមព្រាងចំនួន១៤ផ្សេងទៀតផងដែរ៕

ព័ត៌មានកីឡា

កម្ពុជាប្រារព្ធកីឡាកងយោធពលខេមរភូមិន្ទលើកទី២

ព្រឹត្តិការណ៍កីឡាកងយោធពលខេមរភូមិន្ទលើកទី២ធ្វើឡើងក្នុងគោលបំណងធំ៤

១.អបអរសាទរខួបលើកទី៣៩ ទិវាជ័យជម្នះ ៧ មករា

២.រំលឹកដល់អតីតយុទ្ធជន

៣.ឲ្យមហាជនយល់ពីកងទ័ព និងតួនាទីការពារទឹកដី

៤.បង្កើនចំណងមិត្តភាពរវាងកងទ័ព និងមហាជន។ ព្រឹត្តិការណ៍នេះធ្វើឡើងរយៈពេល៣ថ្ងៃចាប់ពីថ្ងៃទី១២ ដល់ ១៤ ខែមករា នៅកោះពេជ្រ។

បាល់ទាត់លីគកំពូលកម្ពុជានឹងចាប់ផ្ដើមប្រកួតនៅដើមខែមីនា

ការប្រកួតលីគកំពូលកម្ពុជា នឹងចាប់ផ្ដើមដំណើរការចាប់ពីថ្ងៃទី៣ ខែមីនា ឆ្នាំ២០១៨ ដែលមាន១២ក្រុមចូលរួមប្រកួតដដែល ក្នុងនោះមាន អគ្គិសនីកម្ពុជា, បឹងកេត, ព្រះខ័នរាជស្វាយរៀង , វេស្ទើនភ្នំពេញ , ក្រសួងការពារជាតិ, ណាហ្គាវើល, ភ្នំពេញក្រោន, អង្គរ Tiger , អគ្គស្នងការដ្ឋាននគរបាលជាតិ , អាស៊ីអឺរ៉ុបយូណាយធីត, និងក្រុមទើបឡើងថ្មី២ សូលទីឡូអង្គរ និង ក្រុមវិសាខា ចំណែកក្រុមដែលធ្លាក់ចេញគឺ ពីលីគកំពូលនេះមាន គីរីវង់សុខសែនជ័យ និងស៊ីម៉ាក់។

ក្រុមE-Sportកម្ពុជាទៅប្រកួត MATIC 2018នៅថៃ

ក្រុមកីឡាអេឡិចត្រូនិកកម្ពុជាបានចេញដំណើរទៅប្រទេសថៃកាលពីព្រឹកថ្ងៃសុក្រសប្ដាហ៍មុនដើម្បីចូលរួមប្រកួតពានរង្វាន់អន្តរជាតិកម្រិតតំបន់ MATIC 2018ដែលប្រទេសចូលរួមមានចំនួន៦ ម្ចាស់ផ្ទះថៃ មាន៣ក្រុម កម្ពុជា មាន២ក្រុម ចិនមាន២ក្រុម សិង្ហបុរីមាន២ក្រុម ម៉ាឡេស៊ីមាន២ក្រុម និងឥណ្ឌូណេស៊ីមាន១ក្រុម។ ប្រធានក្រុមNever Care តំណាងកម្ពុជាមាន៧០% រំពឹងថាអាចការពារជើងឯកបាន៕

អត្ថបទ៖ ហ្សាឌីណា