មកសាករសជាតិក្រឡានឆ្ងាញ់ នៅក្រចេះម្ដងមើល៎!

2018-01-18 08:38:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រឡានជាអាហារបស់ខ្មែរយើង ដែលមានប្រវត្តិយូរលង់ណាស់មកហើយ។ ភូមិថ្មគ្រែ ក្នុងខេត្តក្រចេះ ត្រូវបានគេទទួលស្គាល់ថា ជាទីដែលធ្វើនំក្រឡានឆ្ងាញ់ជាងគេ។ ដូច្នេះ ថ្ងៃនេះ Sabay សូមណែនាំ វិធីធ្វើនំមួយនេះ ពីអ្នកស្រី វ៉ាន់ មីត ប្រកបរបរដុតក្រឡានលក់ នៅភូមិថ្មគ្រែ ដូចខាងក្រោម៖

អ្នកខេត្តក្រចេះដាក់មួយឃ្លានេះ ផ្ដល់ភាពកក់ក្ដៅ ដល់ភ្ញៀវទេសចរ

1.អ្នកស្រី វ៉ាន់ មីត អាយុ ៣៥ ឆ្នាំ ប្រកបរបរដុតក្រឡានលក់ នៅភូមិថ្មគ្រែលើ ឃុំថ្មគ្រែ ស្រុកចិត្របុរី ខេត្តក្រចេះ។ អ្នកស្រីប្រកបរបរនេះ តាំងពីឆ្នាំ ២០១៣ មកម៉្លេះ។ បច្ចុប្បន្នអ្នកស្រីមានម៉ូយជាប្រចាំចំនួន ៥នាក់ ដែលអាចទទួលទិញក្រឡានពីអ្នកស្រី ប្រមាណពី ១០០ ទៅ ២៥០គីឡូក្រាម ក្នុងមួយថ្ងៃ។

2.អ្នករួមការងារ របស់អ្នកស្រី វ៉ាន់ មីត កំពុងសកសម្បកប្ញស្សីដែលមានសាច់ក្រាស់ចេញ បន្ទាប់ពីគាត់កាត់វាជាកង់ៗរួច។ ការសកនេះ ធ្វើឱ្យក្រឡានដុតឆាប់ឆ្អិន។ ប្ញស្សីដែលគេយកមកដុតធ្វើជាក្រឡាននេះ ភាគច្រើនទិញមកពីខេត្តព្រៃវែង និង ស្វាយរៀង។

3.អ្នកស្រី វ៉ាន់ មីត និងកូនស្រី កំពុងច្រកអង្ករដំណើបដែលលាយគ្រឿងរួចជាស្រេច ចូលទៅក្នុងបំពង់ប្ញស្សី។ ចំណែកស្រ្តីម្នាក់ទៀត កំពុងញាត់កម្ទេចប្ញស្សី លាយស្រកីដូង ចូលទៅក្នុងបំពង់ប្ញស្សី ដើម្បីបិទភ្ជិតមាត់បំពង់ មុននឹងយកទៅដុត។ ការច្រកអង្ករ និងដុត ធ្វើឡើងចាប់ពីម៉ោង ១២ ឬម៉ោង ១រំលងអាធ្រាត្រ រហូតទល់ភ្លឺ។

4.អ្នករួមការងារម្នាក់ទៀត របស់អ្នកស្រី វ៉ាន់ មីត កំពុងរៀបបំពង់ប្ញស្សីជាជួរ ហើយដុត។ ការដុតក្រឡាននេះ ធ្វើឡើងយ៉ាងមមារញឹក និងថែភ្លើងយ៉ាងដិតដល់។ ពេលក្រឡានឆ្អិនល្អហើយ ក្រុមការងារផ្សេងទៀត ជញ្ជូនក្រឡានទៅសកសម្បកប្ញស្សីម្តងទៀត ដើម្បីសំអាតកន្លែងឆេះខ្លោច និង សិតសម្បកប្ញស្សីឱ្យស្តើង រលោងស្អាត និងងាយស្រួលបក។

5.ក្រឡានថ្មគ្រែ គឺជាផលិតផលដ៏ល្បីល្បាញរបស់ខេត្តក្រចេះ។ ប៉ុន្តែក្នុងចំណោម៣ភូមិ (ភូមិថ្មគ្រែលើ ភូមិថ្មគ្រែកណ្តាល និង ភូមិប្ញស្សីចារ) នៅក្នុងឃុំនេះ មានតែភូមិថ្មគ្រែលើប៉ុណ្ណោះដែលមានពលរដ្ឋដុតក្រឡានច្រើនជាងគេ។ បច្ចុប្បន្នអ្នកដុតក្រឡាននៅក្នុងភូមិនេះ មានជាង៣០គ្រួសារ៕