ព្រោះរឿងអាម៉ាស់ពី១៤ឆ្នាំមុន Janet Jackson ស្បថលែងសម្ដែងកម្មវិធី Super Bowl

2018-02-04 07:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងត្រកូល Jackson, Janet Jackson បានបដិសេធនូវពាក្យចចាមអារ៉ាម ដែលថានាងនឹងសម្ដែងជាមួយតារាចម្រៀង Justin Timberlake ក្នុងកម្មវិធីប្រគំតន្ដ្រី Super Bowl halftime show ឆ្នាំនេះ។

Janet Jackson

Janet និយាយថា៖ "ដើម្បីកុំឲ្យមានការយល់ច្រឡំ ជាមួយនឹងពាក្យចចាមអារ៉ាមដែលថា ខ្ញុំនឹងសម្ដែងនៅក្នុងកម្មវិធី Super Bowl ថ្ងៃស្អែកនេះ ខ្ញុំសុំប្រាប់ថាខ្ញុំនឹងមិនសម្ដែងទេ។"

នាងបាននិយាយដូច្នេះក្នុងសេចក្ដីថ្លែងការមួយកាលពីថ្ងៃសៅរ៍ ដោយបន្ថែមទៀតថា៖ "អរគុណចំពោះការគាំទ្ររបស់អ្នកទាំងអស់គ្នា ហើយខ្ញុំរំពឹងថានឹងជួបអ្នកទាំងអស់គ្នាឆាប់ៗនេះ"។

តារាចម្រៀង Justin Timberlake ត្រឡប់មកសម្ដែងក្នុងកម្មវិធី Super Bowl ម្ដងទៀត បន្ទាប់ពីការសម្ដែងកាលពី ១៤ឆ្នាំមុន។ ក្នុងការសម្ដែងនោះ បានធ្វើឲ្យ Janet Jackson លេចសុដន់ជាយថាហេតុ ធ្វើឲ្យមនុស្សទូទាំងសហរដ្ឋអាមេរិកមានការខឹងសម្បារ និងតក់ស្លុតជាខ្លាំង ព្រោះកម្មវិធីនេះត្រូវបានគេចាក់ផ្សាយគ្រប់ទីកន្លែងទូទាំងប្រទេស ដោយមានអ្នកទស្សនាជាកុមារផងដែរ។

ហេតុការណ៍កើតឡើងកាលពី ១៤ ឆ្នាំមុន

ដូច្នេះហើយទើបតារាទាំង២ ត្រូវបានក្លាយជាប្រធានបទក្ដៅ ដែលមនុស្សជាច្រើនទូទាំងពិភពលោក តែងតែលើកឡើងមកនិយាយ។ បើតាមការរៀបរាប់របស់ Janet ខាងលើ គេអាចទស្សន៍ទាយបានថា អ្នកទាំង២នឹងមិនសម្ដែងជាមួយគ្នាជាលើកទី២នោះទេ៕