មិនមែនលុយ! ភរិយាទម្លាយចំៗ ពីមូលហេតុជ្រើសរើស នាយចយ ជាគូគ្រង

2018-03-01 03:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃមង្គលការខ្លួន អ្នកនាង ប៉ិប ក្វាន់ឌី បានទម្លាយពីការពិតទាក់ទិននឹងមូលហេតុដែលនាំឲ្យនាងកើតមានចិត្តស្នេហ៍ និងសម្រេចរៀបអាពាហ៍ពិពាហ៍ជាមួយ លោក ភិច សែ ហៅ ចយ។

អ្នកនាងបានប្រាប់ថា ពួកគេបានស្គាល់គ្នាជាង១ឆ្នាំហើយ តាមរយៈបណ្ដាញទំនាក់ទំនងសង្គម Facebook។ លុះស្គាល់នេះគ្នាយូរៗក៏នាំឲ្យអ្នកទាំង២យល់ពីគ្នា ជំពាក់ចិត្តលើគ្នាទៅវិញទៅមក រហូតដល់ថ្ងៃទទួលផ្កាស្លានេះ។

ក្វាន់ឌី បញ្ចេញស្នាមញញឹមមួយទំហឹង ស្រពពេលថ្លែងថា នាងស្រឡាញ់អ្វីៗទាំងអស់ដែលនាចយ មាន មិនថាចិត្តគំនិត ឬក្ដីស្រលាញ់ដែលនាយមានចំពោះខ្លួន។ "ដូចដែលធ្លាប់បកស្រាយលើបណ្ដាញសង្គមអីចឹងថា យើងគឺស្រលាញ់ព្រោះចិត្ត និងដោយស្មោះមែន ហើយបើនិយាយថាខ្ញុំនៅជាមួយគាត់ដើម្បីលុយក៏មិនត្រូវដែរ ព្រោះយើងសុទ្ធតែអត់លុយដូចគ្នា"។ ស្រីស្អាតបន្ថែម។

អ្នកនាង ប៉ិប ក្វាន់ឌី

នាងបន្តថា ត្បិតកន្លងមកខ្លួនរងការវាយប្រហារ និងនិន្ទាខ្លាំងពាក់ព័ន្ធរឿងរ៉ាវស្នេហារបស់អ្នកទាំង២ តែនាងមិនមានក្ដីអាក់អន់ស្រពន់ចិត្តអ្វីឡើយ ព្រោះនាងគ្មានសិទ្ធហាមឃាត់យោបល់អ្នកដទៃបានទេ។ នាងថា៖ "និយាយទៅគឺធម្មតា! គេចង់ថាអីហើយ យើងមិនអាចទៅបិទមាត់គេបានទេ តែយើងក៏ព្យាយាមបកស្រាយអ្វីដែលជាយើង ដែលយើងពិតជាមានអីចឹងទៅវិញដែរ!”។

ប៉ិប ក្វាន់ឌី ជាកូនអ្នកខេត្តពោធិ៍សាត់ មានការងារជាជាងសម្អាងការ និងរៀបអាពាហ៍ពិពាហ៍ជាមួយតារាកំប្លែង ភិច សែ ហៅនាយ កាលពីថ្ងៃ២៧ ខែមករាឆ្នាំ២០១៨នេះ៕

អត្ថបទ៖ សុខណា