ក្រុមហ៊ុនផលិតដែកសំណង់ធំៗមួយនៅខ្មែរ ពង្រីកបន្ថែមទ្វេ ១ ជា ២ បន្ទាប់ពីទើបបើកបានពេលខ្លី

2018-03-09 06:26:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតដែកផ្ដោតទៅលើសំណង់ធំៗដូចជា ស្ពាន អគារខ្ពស់ៗ មហាវិថី រោងចក្រផលិតថាមពល ChungKang Steel Structure Cambodia (CSSC) បានពង្រីកទីតាំងឡើងមួយកម្រិតទៀត ដោយពីមុនផលិតបាន ១ ៥០០តោនក្នុង ១ខែ ដំឡើងមក ៣ ០០០តោនក្នុង ១ខែវិញ។

លោក Sun Chin I នាយកគ្រប់គ្រង CSSC បាននិយាយថា៖ "យើងចង់ពង្រឹង និងពង្រីកតាមរយៈបណ្ដាញ ISI Group មិនមែនដើម្បីត្រឹមតែចង់ឲ្យក្លាយជាក្រុមហ៊ុនធំជាងគេក្នុងប្រទេសទេ តែជាក្រុមហ៊ុនឈានមុខក្នុងតំបន់តែម្ដង ហើយដោយមានការសហការជាមួយក្រុមហ៊ុន Fuxin Steel Buildings យើងបានសម្រេចសមិទ្ធផលគួរឲ្យកត់សម្គាល់ជាច្រើន ដូចជាគម្រោងចំណតរថយន្តដ៏ធំរបស់ AEON Mall ២ ជាដើម"។

CSSC បានបង្កើតឡើងនៅ ២០១៥ ហើយចាប់ផ្ដើមប្រតិបត្តិការឆ្នាំ ២០១៦ ដែលជាការវិនិយោគរួមគ្នារបស់ក្រុមហ៊ុន ៤ គឺ ISI Group ក្រុមហ៊ុនផលិតដែកល្បីមួយនៅកម្ពុជា Fuxin Steel Buildings ជាបុត្រសម្ព័ន្ធISI GROUP, China Steel Structure Corporation ជំនាញផ្នែកផលិតគ្រោងបង្គំដែករបស់តៃវ៉ាន់ និង Welhunt Materials Enterprise (WH) មានបទពិសោធន៍ជាង ២៥ឆ្នាំ ក្នុងការធ្វើពាណិជ្ជកម្មអន្តរជាតិលើសម្ភារដែក។

លោក កាំង ឡេង អគ្គនាយក ISI Group បានលើកឡើងថា៖ "ឆ្នាំនេះ ក្រុមហ៊ុនយើង រួមគ្នាជាមួយនឹងដៃគូ និងបណ្ដាញផ្សេងៗទៀត កំពុងតែព្យាយាមផ្សព្វផ្សាយយ៉ាងផុសផុល លើការប្រើប្រាស់គ្រោងបង្គំដែកសម្រាប់សាងសង់សំណង់អគារខ្ពស់ៗ ហើយយើងជឿជាក់ថា សំណង់គ្រោងបង្គំដែក អាចជួយផ្គត់ផ្គង់កំណើននៃតម្រូវការ ក្នុងការសាងសង់អគារខ្ពស់ៗ ហើយវានឹងដើរតួសំខាន់ ក្នុងការជួយលើកសម្រស់អគារខ្ពស់ៗក្នុងទីក្រុងរបស់យើង ក៏ដូចនៅតាមបណ្ដាទីក្រុងជាច្រើនផ្សេងទៀតផងដែរ"។

ក្នុងថ្ងៃសម្ពោធរោងចក្រ CSSC ដែលទើបពង្រីកនេះ ក្រុមហ៊ុនធំៗខាងលើ ក៏បានរៀបចំសិក្ខាសាលាស្ដីពី "ការលេចឡើងនៃការសាងសង់អគារខ្ពស់ៗធ្វើពីគ្រោងបង្គំដែកក្នុងប្រទេសកម្ពុជា" នៅសណ្ឋាគារ Raffle La Royal ដើម្បីផ្សព្វផ្សាយពីការប្រើប្រាស់គ្រោងបង្គំដែក សម្រាប់សាងសង់អគារខ្ពស់ៗ និងដើម្បីឲ្យអ្នកជំនាញក្នុងវិស័យនេះ ចែករំលែកទស្សនសំខាន់ៗចំពោះប្រធានបទ៕