ស្លុតចិត្ត! ធ្លាយមូលហេតុនាំឲ្យ យូឌីស្កូ ខូចក្រលៀនទាំងសងខាង(វីដេអូ)

2018-03-09 06:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកម្មវិធីមូលនិធិផ្សាយផ្ទាល់ដើម្បីរកថវិកាជូនលោក យូឌីស្កូ ដែលកើតជំងឺទឹកនោមប្រៃ និងខូចក្រលៀនទាំងសងខាងនោះ អ្នកនាង ចន ច័ន្ទលក្ខិណា ដែលជាប្រធានសមាគមសិល្បករខ្មែរបានស្រាយឲ្យដឹងពីមូលហេតុដែលតារាប្រុសរូបនេះស្រាប់តែធ្លាក់ខ្លួនឈឺជំងឺកាចសាហាវទាំង២ខាងលើ។

លោក យូឌីស្កូ ពេលមិនទាន់ធ្លាក់ខ្លួនឈឺ

នាមជាអ្នកខ្នះខ្នែង ដុតដៃដុតជើងរៀបចំឯកសារពេទ្យសម្រាប់ យូឌីស្កូ អ្នកនាង ចន ចន្ទលក្ខិណា និងសាមីខ្លួនផ្ទាល់បានប្រាប់ថា កន្លងមកលោកមិនដឹងថាមានជំងឺទាំងនេះមករុករានរាងកាយឡើយ ត្បិតគិតថាវាជាជំងឺធម្មតាៗ។

“កន្លងមកខ្ញុំចេះតែឈឺសន្លាក់ដៃ សន្លាក់ជើង ក៏ចេះតែទិញថ្នាំនោះមកលេប ហើយក៏ធូរស្រាលមួយគ្រា។ ដល់បន្ទាប់មកទៀត ខ្ញុំក៏ហើមដៃហើមជើង ខ្ញុំយល់ថាខ្លួនលើសជាតិអាស៊ីត ក៏ប្រើថ្នាំទប់ស្កាត់ទៀត។ ក្រោយប្រើថ្នាំទាំងហ្នឹងអស់យូរទៅ ក៏មានបញ្ហារលាកតម្រងនោម ហើយក៏បណ្ដាលឲ្យខូចក្រលៀនទាំងសងខាងតែម្ដង"។ លោករៀបរាប់។

លោក យូឌីស្កូ ពេលមិនទាន់ធ្លាក់ខ្លួនឈឺ

ជាមួយគ្នានោះលោកបន្ថែមថា មូលហេតុដែលលោកមិនអើពើលើចំណុចថាជំងឺលោកអាចធ្ងន់ធ្ងរ ព្រោះអាការៈឈឺសន្លាក់នឹងហើមដៃជើងនេះ គឺបន្សល់ទុកក្រោយលោករងសំបកគ្រាប់កាំភ្លើងកាលពីប្រមាណ៩ឆ្នាំមុន។

លោកលម្អិតថា វេលាមួយកាលពី៩ឆ្នាំមុន លោកធ្លាប់រងសំបកគ្រាប់កាំភ្លើងដែលគេបាញ់គ្នាក្នុងភោជនីយដ្ឋានមួយ ចំប្រអប់ជើង ហើយបានបន្សល់ជាតិរំសេវ និងដាច់សរសៃផង ដែលនេះជាមូលហេតុដែល ជើងលោកហើមជាប្រចាំ។

លោក យូឌីស្កូ ពេលធ្លាក់ខ្លួនឈឺ

លោក យូ ឌីស្កូ គឺជាអតីតមេក្រុមចម្រៀងតោមាស ក្នុងផលិតកម្មរ៉ៃមាស និងជាតារាបង្ហាញម៉ូដប្រុសដ៏ល្បីប្រចាំព្រះរាជាណាចក្រកម្ពុជា។ លោកបានធ្លាក់ខ្លួនឈឺធ្ងន់តាំងពីចុងឆ្នាំ២០១៧ ដោយជំងឺទឹកនោមប្រៃ និងខូចក្រលៀនទាំងសងខាង ដែលតម្រូវឲ្យលោកលាងឈាមជារៀងរាល់២ដងក្នុងមួយសប្ដាហ៍។ នៅវេលាខ្សោះខ្សោយនេះ មេគ្រួសារដែលមានម្ដាយ និងប្អូនជាច្រើននាក់នេះ ត្រូវការប្រាក់ចំនួន៥ម៉ឺនដុល្លារសម្រាប់ទៅព្យាបាលនៅប្រទេសឥណ្ឌា៕

អត្ថបទ៖ សុខណា