នាយ ពែកមី ពីកម្មករសំណង់ក្លាយជាតារាកំប្លែង

2016-01-03 17:51:06
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយ ពែកមី ជាតារាកំប្លែងរបស់បណ្តាញស្ថានីយ៍ទូរទស្សន៍ CTN និង កំពុងទទួលបានការគាំទ្រជាខ្លាំងពីសំណាក់មហាជនទាំងចាស់-ក្មេងតាមរយៈទេពកោសល្យនិយាយកំប្លុកកំប្លែងដ៏ប៉ិនប្រសព្វ។ តារាកំប្លែងរូបនេះបានរៀបរាប់ពីដំណើរជីវិតធ្លាប់តស៊ូធ្វើជា កម្មករសំណង់យ៉ាងលំបាកវេទនាជាមួយSabay។

ប្រវត្តិរូបសង្ខេប

ឈ្មោះ

ថ្ងៃ ខែឆ្នាំកំណើត

ទីកន្លែងកំណើត

ជនជាតិ

សញ្ជាតិ

កម្ពស់

ទម្ងន់

ចែម ចាន់ដារ៉ា

ហៅ ពែកមី

០១ កក្កដា ១៩៨១

ស្វាយរៀង

ខ្មែរ

១៧០សង់ទីម៉ែត្រ

៧៥គីឡូក្រាម

លោក ចែម ចាន់ដារ៉ា ហៅនាយ ពែកមី កើតនៅថ្ងៃទី០១ ខែកក្កដា ឆ្នាំ១៩៨១នៅភូមិពពែត ឃុំពពែត ស្រុកស្វាយទាប ខេត្តស្វាយរៀង។ នាយជាកូនច្បងក្នុងចំណោមបងប្អូន៧នាក់(ប្រុស៥ស្រី២)ដែលមានឪពុក ឈ្មោះ ងួន សារឹម ជាកសិករ ម្តាយឈ្មោះ ស៊ឹម ស៊ីម៉ាន ជាកសិករ។ នាយពែកមីក៏មានប្អូនប្រុសម្នាក់ឈ្មោះ ចែម សារឿន ហៅនាយ គ្រឿន ដែលមាននិស្ស័យខាងសិល្បៈ និងបានចូលរួមកំប្លែងនៅក្នុងក្រុមរបស់នាយផងដែរ។

កាល ពីកុមារភាព ចែម ចាន់ដារ៉ា ជួបការលំបាកច្រើនដែលមិនសូវទទួលបាននូវភាពស្រណុកសុខស្រួលឡើយ ដោយសារក្រុមគ្រួសាររស់នៅក្រោមបន្ទាត់ភាពក្រីក្រ។ ក្រៅពីទៅក្រេបជញ្ជក់យកចំណេះដឹងនៅសាលា ចាន់ដារ៉ា ត្រូវទៅរកត្រីយកទៅលក់ដើម្បីជួយឪពុកម្តាយ។ «បន្ទាប់ពីខ្ញុំត្រឡប់មកពីសាលាវិញខ្ញុំតែងតែទៅរកត្រីដាក់ ទ្រូដាក់មងដាក់ប្រកៃយកត្រីទៅលក់នៅផ្សារជីភូគឺមិនសូវមានពេល ទំនេរនោះទេ» ពែកមីនិយាយ។ បើតាមការឲ្យដឹងកុមារា ចាន់ដារ៉ា ជាក្មេងឧស្សាហ៍ព្យាយាមនិងមាននិស្ស័យរប៉ិលរប៉ូចធ្វើឲ្យអ្នកផង ទាំងពួងស្រលាញ់ចូលចិត្តហើយត្រូវបានគេសរសើរថា ជាក្មេងឆ្លាតទៀតផង។

ប្រវត្តិសិក្សា

ចែម ចាន់ដារ៉ា ត្រូវបានឪពុកម្តាយបញ្ជូនឲ្យចូលសិក្សានៅសាលាបឋមសិក្សាថ្នល់កែង ចាប់តាំងពីអាយុ៦ឆ្នាំហើយនៅឆ្នាំ១៩៩៣ នាយក៏បានសិក្សាបន្តនៅអនុវិទ្យាល័យជីភូស្ថិតនៅស្រុកស្វាយទាប ខេត្តស្វាយរៀង ប៉ុន្តែដោយសារសាលានៅឆ្ងាយពីផ្ទះជាង១០គីឡូម៉ែត្រ និងគ្មានមធ្យោបាយធ្វើដំណើរផងនោះ នាយក៏បង្ខំចិត្តឈប់សិក្សាត្រឹមថ្នាក់ទី៩ ដោយងាកមកបំរើខាងព្រះពុទ្ធសាសនាបួសជាព្រះសង្ឃនៅវត្តសុវណ្ណរង្សី នៅស្រុកកំណើតរបស់ខ្លួន។

ពែកមី ពោលថា «ពេលនោះគ្រួសារខ្ញុំជួបការលំបាកខ្លាំងណាស់ក្រីក្រខ្វះខាត គ្រប់បែបយ៉ាងគឺរស់នៅពឹងលើមុខរបរធ្វើស្រែទាំងស្រុងដែលមាន ដីស្រែតិចតួចបំផុត ហើយដោយសារគ្មានលទ្ធភាពទិញកង់ជិះទៅរៀនខ្ញុំក៏ឈប់សិក្សាត្រឹម អនុវិទ្យាល័យចូលបួសជាព្រះសង្ឃតែម្តង»។ បន្ទាប់ពីបួសបានបីវស្សា(៣ឆ្នាំ) ដោយសំឡឹងឃើញស្ថានភាពគ្រួសារកាន់តែយ៉ាប់យឺនទៅៗនោះ នាយក៏សម្រេចចិត្តលាចាកសិក្ខាបទឆ្ពោះមករកការងារធ្វើនៅទីក្រុង ភ្នំពេញក្នុងក្តីរំពឹងជួយសម្រាលបន្ទុកគ្រួសារ។

ជីវិតតស៊ូ

នៅអំឡុងឆ្នាំ២០០០ ចែម ចាន់ដារ៉ា បានតំរង់គោលដៅរបស់ខ្លួនមកស្វែងរកការងារធ្វើនៅទីក្រុងភ្នំពេញ ជាមួយនឹងបង្វិចខោអាវបីបួនកំប្លេរ និងមានប្រាក់តែ៤ទៅ៥ម៉ឺនរៀលសម្រាប់ធ្វើសោហ៊ុយតាមផ្លូវតែ ប៉ុណ្ណោះ។ ការងារដែលនាយចាប់ផ្តើមក្នុងឆាកជីវិតលើកដំបូងនោះគឺធ្វើជា កម្មករសំណង់ដោយទទួលបានប្រាក់កំរ៉ៃតិចតួចបំផុតដែលតម្រូវឲ្យអត់ ធ្មត់ក្នុងការចាយវាយត្បិតត្បៀតដើម្បីសន្សំប្រាក់ជួយផ្គត់ផ្គង់ គ្រួសារ។ ពែកមីនិយាយទាំងទឹកមុខស្រពោនថា «ពេលខ្ញុំចូលធ្វើកម្មករសំណង់លើកដំបូងគឺទទួលបានប្រាក់កំរ៉ៃតែ ៦០០០រៀលប៉ុណ្ណោះក្នុងមួយថ្ងៃហើយខ្ញុំពិតជាមិនហ៊ានចាយវាយផ្តេះ ផ្តាសនោះទេ ដោយក្នុងមួយថ្ងៃខ្ញុំចំណាយតែ២០០០រៀលដើម្បីទិញម្ហូបហូបចំនួន ពីរពេល។ ចំពោះប្រាក់ដែលខ្ញុំសន្សំបានខ្ញុំត្រូវផ្ញើរទៅឲ្យឪពុកម្តាយ»។ តារាកំប្លែងរូបនេះបញ្ជាក់ថា ថ្ងៃណាដែលនាយគិតថា ហ៊ានចាយធំបំផុតនោះនៅពេលនាយសម្រេចចិត្តទិញបាយស្រូបមួយប្រអប់ តម្លៃ២០០០រៀលសម្រាប់អាហារពេលព្រឹក។

បន្ទាប់ ពីពែកមីតស៊ូធ្វើជាកម្មករសំណង់ដែលគ្មានទីស្នាក់អាស្រ័យពិតប្រាក ដ រយៈពេលមួយឆ្នាំនាយក៏ចូលធ្វើជាកម្មកររោងចក្រវិញម្តងដែលពេល នោះធ្វើនៅរោងចក្រសាន់ហាន់ម្តុំទួលសង្កែរផ្នែកតំបាញ។ ពែកមីនិយាយថា «ខ្ញុំគិតថា ការងាររោងចក្រធ្វើនៅក្នុងម្លប់ត្រជាក់ស្រួលជាងការងារសំណង់ ប៉ុន្តែការងារនោះមិនបានជួយឲ្យជីវភាពខ្ញុំធូរធារនោះទេ ពោលគឺប្រាក់ខែដែលខ្ញុំទទួលបានគ្រាន់តែចំណាយលើថ្លៃផ្ទះជួល និងការហូបចុកស្ទើរមិនគ្រប់ផង»។ ក្រោយពីធ្វើជាកម្មកររោងចក្របានមួយឆ្នាំដោយគិតថា មិនអាចជួយឲ្យជីវភាពរីកចំរើនបាន ណាមួយខ្លួនមិនមានចំនេះវិជ្ជាជ្រៅជ្រះពិបាកនឹងស្វែងរកការងារ បានល្អជាងនេះ នាយក៏ស្ម័គ្រចិត្តចូលបំរើកងទ័ពដោយស្ថិតនៅក្នុងកងពលតូច អន្តរាគមន៍លេខ១ប្រចាំតំបន់លង្វែក ខេត្តកំពង់ឆ្នាំង។

ខណៈ ពេលចូលបំរើជាតិការពារទឹកដីសុវណ្ណភូមិបានរយៈពេល២ឆ្នាំដោយសារ គ្រួសារជួបការលំបាកកាន់តែខ្លាំង និងមានតែរូបនាយជាគោលជំហរនៅក្នុងគ្រួសារនោះពែកមីក៏ងាកមកចាប់ អាជីពជាកម្មករសំណង់សាថ្មី។

ពែកមីពោលថា «ក្នុងអំឡុងពេលខ្ញុំនៅបំរើកងទ័ពគ្រួសារខ្ញុំកំពុងជួបភាពទី ទាល់ស្ទើរតែគ្មានអង្ករច្រកឆ្នាំងទើបខ្ញុំសម្រេចចិត្តដកខ្លួនពី ជួរកងទ័ពមកធ្វើកម្មករសំណង់ម្តងទៀតដើម្បីជួយយឹតយោងគ្រួសារ»។ ដោយសារការខិតខំប្រឹងប្រែងយកចិត្តទុកដាក់គួបផ្សំនឹងភាពវ័យ ឆ្លាតក្នុងការងារទៀតនោះមិនយូរប៉ុន្មានពែកមីក៏ក្លាយជាមេការ សំណង់គ្រប់គ្រងការដ្ឋានទាំងមូល។«បន្ទាប់ពីខ្ញុំមកចាប់យកអាជីព នេះសាជាថ្មីជាមួយនឹងការតស៊ូរអត់ធ្មត់គ្រប់បែបយ៉ាងបានរយៈពេល មួយឆ្នាំខ្ញុំក៏បានឡើងតួនាទីជាមេការសំណង់រហូតខ្ញុំមានលទ្ធភាព ជួយសម្រាលបន្ទុកគ្រួសារបានមួយកម្រិត» ពែកមីរៀបរាប់។

ចំណងអាពាហ៍ពិពាហ៍

នាយ ពែកមី បានរៀបការនៅឆ្នាំ២០០៨ ជាមួយនារីជាកម្មការិនីកាត់ដេរឈ្មោះជា សុធីម ហៅ ច្រិប បច្ចុប្បន្នមានវ័យ២៤ឆ្នាំ។ នាងជាកូនអ្នកចំការមានស្រុកកំណើតនៅអ្នកលឿង ខេត្តព្រៃវែង។ នាយមានកូនពីរនាក់ជាចំណងដៃនៃអាពាហ៍ពិពាហ៍។ កូនស្រីច្បងឈ្មោះ រឹម សុរ៉ាស៊ី វ័យ២ឆ្នាំ និងកូននៅក្នុងផ្ទៃទើបមានអាយុ៥ខែនៅឡើយ។ ពែកមីមិនមានគម្រោងយកបុត្របន្ថែមទៀតទេ បើទោះបីជាកូនទីពីរប្រសូត្រមកប្រុសឬស្រីក្តី។

ជំហានចូលសិល្បៈ

នាយ ពែកមី មាននិស្ស័យខាងសិល្បៈតាំងតែពីតូចម្ល៉េះ គឺស្រលាញ់ផ្នែកចម្រៀង ហើយក៏ធ្លាប់ដាក់ពាក្យប្រឡងចម្រៀងនៅទូរទស្សន៍ប៉ុស្តិ៍លេខ៩កាលពី អំឡុងឆ្នាំ២០០០ម្តងដែរ តែសំណាងមិនល្អត្រូវធ្លាក់ដោយស្វ័យប្រវត្តិពោលគឺចាប់តាំងពីធ្វើ តេស្តលើកដំបូងម្ល៉េះ។ ចាប់តាំងពីពេលនោះមក ពែកមី មិនធ្លាប់រំពឹងថា នឹងបានក្លាយជាអ្នកសិល្បៈតាមការស្រមើស្រមៃនោះឡើយ។ ទើបនៅឆ្នាំ២០០៩ស្ថានីយទូរទស្សន៍CTNបានជ្រើសរើសតារាកំប្លែងតាម រយៈកម្មវិធី«មហាកំប្លែង»ហើយនាយ ពែកមីក៏មានឱកាសដាក់ពាក្យប្រឡងប្រជែងរហូតឆ្លងកាត់ការជម្រុះ៥ វគ្គ និងបានជាប់ដោយជោគជ័យរួចក៏បានក្លាយជាតារាកំប្លែងប្រចាំស្ថានីយ ទូរទស្សន៍CTN។

ពែក មី រៀបរាប់ថា «ពេលខ្ញុំដាក់ពាក្យប្រឡងកំប្លែងដំបូងខ្ញុំមិនសង្ឃឹមថាបានជាប់ នោះទេ គ្រាន់តែគិតថាបានចេញមុខតាមកញ្ចក់ទូរទស្សន៍ម្តងក៏អស់ចិត្តដែរ តែខ្ញុំពិតជារំភើបចិត្តខ្លាំងណាស់ពេលខ្ញុំបានឆ្លងផុតវគ្គទី ១”។ នាយបន្ថែមថា បន្ទាប់មកលោកក៏មិនរំពឹងថាអាចបានជាប់នៅវគ្គផ្តាច់ព្រ័ត្រនោះ ដែរត្បិតអីត្រូវឆ្លងកាត់ឧបសគ្គជាច្រើនទៀតដែលមានបេក្ខជនប្រឡង រាប់រយនាក់ តែលោកក៏ទទួលបានជោគជ៏យនៅវគ្គទី២។ ខណៈនោះលោកចាប់ផ្តើមជឿជាក់លើខ្លួនឯង និងគិតថាត្រូវតែប្រឹងប្រែងដើម្បីយកពានរង្វាន់ឲ្យបាន។ ទីបំផុតលោកក៏ទទួលបានជោគជ៏យស្ទើរមិននឹកស្មានដល់។

ពែកមី បន្ថែមថា នាយអត់បានដឹងថា ខ្លួនឯងមានទេពកោសល្យខាងផ្នែកកំប្លែងនោះទេ ត្បិតតាំងពីតូចចូលចិត្តតែខាងច្រៀង។ ប៉ុន្តែតារាកំប្លែងរូបនេះក៏ជាបុគ្គលចូលចិត្តខាងតែងនិពន្ធផង ដែរ។ ជាងនេះទៅទៀតនាយជាមនុស្សរប៉ិលរប៉ូចចូលចិត្តនិយាយប្រូឲ្យគេសើច ។ នាយ ពែកមី ចាប់ផ្តើមមានឈ្មោះបោះសម្លេងតារយៈរឿងកំប្លែង«ថាងចេង»ហើយកាន់តែ ល្បីល្បាញទៀតនោះនៅពេលនាយបាននិពន្ធកំណាព្យកំប្លែងជាច្រើនដែល ត្រូវបានអ្នកគាំទ្របាញ់ប្លូធូសតៗគ្នារួមមានកំណាព្យ «ទំនួញឆ្កែ»«ច្បាប់ផឹកស៊ី»«ច្បាប់សុំទាន»«លក់ថ្នាំស្រែង» «អង្វរម៉ែក្មេក»…។

ការ ឈោងចាប់នូវភាពល្បីល្បាញនៅលើវិថីសិល្បៈនាយ ពែកមីបានប្រើពេលវេលាតិចបំផុតបើធៀបនឹងតារាកំប្លែងដទៃទៀត។ ពែកមីថ្លែងថា«កត្តាដែលជំរុញឲ្យខ្ញុំឆាប់ទទួលបានប្រជាប្រិយភាព យ៉ាងឆាប់រហ័ស ដោយសារខ្ញុំស្ថិតនៅក្នុងស្ថាប័នដែលល្បី ខ្ញុំបានកំប្លែងក្នុងកម្មវិធីល្បីៗមានអ្នកដឹកនាំល្អជាមួយនឹង ការខិតខំប្រឹងប្រែងរបស់ខ្ញុំទៀតនោះ ទើបធ្វើឲ្យខ្ញុំមានឱកាសច្រើនក្នុងការទាក់ទាញសម្លេងគាំទ្រ »។ តារាកំប្លែងរូបនេះបញ្ជាក់ថា បើគ្មានការជួយជ្រំជ្រែងពីប៉ុស្តិ៍CTNទេនោះ នាយក៏មិនមានថ្ងៃនេះដែរ។

បច្ចុប្បន្ន តារាកំប្លែងដែលជាប់កុងត្រានៅប៉ុស្តិ៍CTNរូបនេះបានកំប្លែងនៅ ក្នុងកម្មវិធីមួយចំនួនដូចជាកម្មវិធី«រាត្រីកំសាន្ត» «សំណើចតាមភូមិ»«សុខគាលក្ខិណាប៊ីអាយជី»«Sunday concert» និងកំប្លែង show នៅក្នុងកម្មវិធី «A 1 Concert»។ ក្រៅពីនេះនាយ ពែកមីក៏កំពុងមមាញឹកយ៉ាងខ្លាងនឹងការចេញកំប្លែងតាមកម្មវិធី Concert នានា ក៏ដូចជាកម្មវិធីមង្គលការផ្សេងៗដែលទទួលបានប្រាក់ចំនូលយ៉ាង ច្រើនគួរសមផងដែរ។ ពែកមីបានទទួលស្គាល់ថា អាជីពកំប្លែងពិតជាបានជួយឲ្យជីវភាពរបស់នាយគេចផុតពីភាពទីទាល់ ខ្វះខាតដូចពេលមុន។ «ចាប់តាំងពីខ្ញុំចូលប្រឡូកសិល្បៈ ខ្ញុំជួយគ្រួសារបានច្រើន ត្បិតអីខ្ញុំទទួលបានប្រាក់ចំនូលច្រើនគួរសមដែរ។ ម្យ៉ាងទៀតខ្ញុំមានលទ្ធភាពជួយយឹតយោងប្អូនប្រុស(នាយគ្រឿន)ម្នាក់ ឲ្យចូលកំប្លែជាមួយខ្ញុំដែរ។ ជាពិសេសនោះបានជួយសម្រាលបន្ទុកភរិយាមិនឲ្យគាត់ធ្វើការលំបាកដូច មុនទេ»ពែកមីនិយាយ។

គោល បំណងទៅថ្ងៃអនាគត ពែកមី មិនទាន់គិតអ្វីក្រៅពីការងារសិល្បៈនោះទេ។ តារាកំប្លែងរូបនេះថ្លែងថា«សព្វថ្ងៃខ្ញុំរវល់ច្រើនជាមួយអាជីព កំប្លែងស្ទើតែគ្មានពេលសម្រាក។ ដូច្នេះខ្ញុំមិនទាន់បែងគំនិតគិតអ្វីផ្សេងក្រៅពីការងារនេះឡើយ ពោលគឺខ្ញុំត្រូវតែបន្តអភិវឌ្ឈន៍គំនិតខិតខំរិៈរកនូវអ្វីដែល ថ្មីៗប្លែកដើម្បីបំរើទស្សនិកជន និងបង្កើនប្រជាប្រិយភាពឲ្យកាន់តែប្រសើរជាងនេះ»។

លោក ចែម ចាន់ដារ៉ា ហៅនាយ ពែកមី ដែលមានស្រុកកំណើតនៅខេត្តស្វាយរៀងជាតារាកំប្លែងមុខស្ងួតពោរពេញ ដោយភាពប៉ិនប្រសប់ និងទេពកោសល្យក្នុងការនិយាយស្តី។ លោកជាតារាកំប្លែងដែលទទួលបានការគាំទ្រយ៉ាងខ្លំាងពីមហាជន បន្ទាប់ពីបានក្លាយជាសមាជិកក្រុមកំប្លែងនៅទូរទស្សន៍ស៊ីធីអិន។ មុននឹងមានថ្ងៃនេះលោកឆ្លងកាត់ការលំបាកគ្រប់បែបយ៉ាងសម្រាប់ ភាពយុវវ័យរបស់លោកដែលត្រូវធ្វើជាកម្មករ និងរោងចក្រកាត់ដេរ៕

អត្ថបទ៖ សុខមេត្តា

កែសម្រួល៖ ជាន ចាន់រ៉ា