សូមប្រយ័ត្ន! ជីវិតអាចធ្លាក់ដល់សូន្យ បើយកខ្លួនបៀតជាមួយមនុស្ស៦ប្រភេទនេះ
- 2018-03-19 05:12:05
- ចំនួនមតិ 0 | ចំនួនចែករំលែក 0
សូមប្រយ័ត្ន! ជីវិតអាចធ្លាក់ដល់សូន្យ បើយកខ្លួនបៀតជាមួយមនុស្ស៦ប្រភេទនេះ
ចន្លោះមិនឃើញ
មុនអនុញ្ញាតឲ្យនរណាម្នាក់ចូលមកជីវិត គឺសំខាន់ណាស់ មនុស្សខ្លះចូលមកនាំនូវភាពរីកចម្រើន តែមនុស្សខ្លះអាចនាំជីវិតឲ្យដុនដាបបាន ប្រសិនបើភ្លេចខ្លួនតែបន្តិច។ ខាងក្រោមនេះ គឺជាការលើកឡើងរបស់ លោក នឹម លាងហេង ជាគ្រូបង្រៀនភាសាបរទេស អាចប្រើប្រាស់រហូតជិត២០ភាសា និងកំពុងជោគជ័យក្នុងជីវិត បានចែករំលែកពីប្រភេទមនុស្សមួយចំនួនមិនគូរសេពគប់ឡើយ៖
**១. មនុស្សមានខ្លាំងចូលចិត្តសម្ញែងទ្រព្យសម្បត្តិ**
លោក នឹម លាងហេង និយាយថា ការបង្កើតទំនាក់ទំនងជាមួយបុគ្គលជោគជ័យដោយការខិតខំ និងបុគ្គលមានខ្លាំងដោយសារគ្រួសារ គឺជារឿងខុសគ្នាស្រឡះ។ ការមានទំនាក់ទំនងជាមួយមនុស្សចូលចិត្តបង្អួតសម្ភារៈនិយម ឬមនុស្សចូលចិត្តភាពហ៊ឺហា បានត្រឹមនាំយើងទៅរកការចំណាយតាមបែបអ្នកមាន ស្គាល់ការសប្បាយឡូយឆាយហួសមាឌ។
ដូចពាក្យចាស់តែងពោលថា «ចាយឲ្យមើលមាឌ កុំឃើញដំរីជុះធំ ជុំតាមដំរី» ដូចនេះហើយ គួរបង្កើតទំនាក់ទំនងជោគជ័យដោយការតស៊ូ មនុស្សមិនចេះអួតអាងទ្រព្យសម្បត្តិ ទើបអាចទទួលបានបទពិសោធន៍ល្អៗ។
២. មនុស្សដែលរកបានប៉ុណ្ណាចាយប៉ុណ្ណឹងគ្មានគិតវែងឆ្ងាយ
បុគ្គលតស៊ូក្នុងការសិក្សារមិនធម្មតានេះបនតទៀតថា ភាគច្រើនមនុស្សប្រភេទនេះ តែងចាយលុយដោយគ្មានគោលការណ៍ គ្មានការសន្សំ គ្មានគោលដៅ ដឹងតែថា ចាយលុយឲ្យសប្បាយតាមចង់។ ការសេពគប់មនុស្សប្រភេទនេះ គ្មានចំណុចណាមួយគួររៀនសូត្រតាមនោះទេ តែផ្ទុយមកវិញនាំឲ្យយើងលង់ខ្លួនជាមួយទឹកលុយ ភ្លេចគិតពីរឿងអនាគត ចុងក្រោយបានត្រឹមសោកស្ដាយប៉ុណ្ណោះ។
៣. មនុស្សដែលយកការសប្បាយជាធំក្នុងបច្ចុប្បន្នកាល
ជាការណ៍ពិតមនុស្សគ្រប់រូបមិនអាចរស់ជាមួយ តែការងារ និងរៀនសូត្រនោះទេ គឺត្រូវមានពេលវេលាលម្ហែខ្លះដែរ។ ប៉ុន្តែត្រង់ចំណុចនេះ គឺសំដៅទៅដល់មនុស្សដែលមិនគិតគូរពីរឿងអនាគតសោះ ការងារក៏មិនច្បាស់លាស់ រៀនសូត្រក៏មិនខំស្រវាប្រទាញ គិតតែរឿងសប្បាយ។ ការសេពគប់មនុស្សបែបនេះនឹងធ្វើឲ្យរីករាយក្នុងបច្ចុប្បន្ន តែបើនាំទៅរកអនាគតដ៏ល្អ គឺមានមិនមានឡើយ។
៤. មនុស្សដែលមានទំនាក់ទំនងច្រើនតែសុទ្ធតែអត់ប្រយោជន៍ដូចគ្នា
មែនហើយ ការរាប់អានគ្នា មិនមែនទាល់តែមានផលប្រយោជន៍ឲ្យខ្លួនទើបរាប់អាននោះទេ តែក៏មិនមែនមានន័យថា ត្រូវតែសេពគប់មនុស្សគ្មានប្រយោជន៍អ្វីនោះដែរ។ មុនសម្រេចចិត្តយកអ្នកណាមកធ្វើជាកល្យាណមិត្ត ក៏ត្រូវសង្កេតដែរថា តើមិត្តភក្ដិគេជាមនុស្សបែបណា? ជាអ្នករៀនសូត្រ ឬបុគ្គលល្អក្នុងសង្គមឬទេ? បើមើលទៅឃើញថា មនុស្សដែលគេសេពគប់ភាគច្រើនសុទ្ធតែអ្នកចូលចិត្តសប្បាយ បងធំបងតូច មិនគួរយកខ្លួនទៅបៀតឡើយ ព្រោះគ្មានបានប្រយោជន៍អ្វី និងមានអ្វីគួរឲ្យយកគំរូតាមឡើយ។
៥. មនុស្សដែលមានបញ្ហាចាក់ស្រេះច្រើន
ត្រង់ចំណុចនេះ មិនមែនសំដៅថា ឲ្យតែមនុស្សមានបញ្ហាច្រើនមិនរាប់អាននោះទេ តែត្រូវដឹងថា បញ្ហាមនុស្សវាមានច្រើនខុសគ្នា។ មនុស្សមានបញ្ហាចាក់ស្រេះមិនគួរសេពគប់ជាមួយដូចជា៖ មនុស្សញៀនល្បែង សេពគ្រឿងញៀន ធ្វើបាបចិត្តឪពុកម្ដាយ ឬមានជម្លោះទាស់ទែងជាមួយអ្នកជិត ខាងរឿងជំពាក់លុយមិនសង។ល។ ដូច្នេះការយកខ្លួនទៅប្រឡូកជាមូយមនុស្សបែបនេះ ស្រួលមិនស្រួលអាចនាំរឿងដាក់ខ្លួនបាន។
៦. មនុស្សដែលយកជាការមិនបានពេលមានការសំខាន់
ដោយឡែកមនុស្សបែបនេះវិញ សំដៅថា អ្នកដែលបានត្រឹមតែលេងសើចឡេះឡោះអត់ប្រយោជន៍ តែបើយកជាសាច់ការគឺគ្មានបានការអ្វីសោះ។ ការសេពគប់មិត្តភក្ដិ មិនមែនឲ្យតែច្រើនចំនួន តែគ្មានគុណភាពនោះទេ មិត្តភក្ដិដែលល្អ គឺអ្នកដែលចេះព្រឹក្សាយោបល់ល្អៗពេលមានបញ្ហា មិត្តភក្ដិដែលចេះលើកទឹកចិត្តជាដើម។ ដោយឡែកមនុស្សខ្លះ ស្គាល់យើងតែពេលសប្បាយប៉ុណ្ណោះ តែពេលមានបញ្ហារត់ចោលបាតជើងសព្រាត៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
